Hesu ñono vaishu Fariseo hareka Moise mbypara vekua pyrỹmboi'iheare 1 Haivi Hesu ĩnjetashu kuaretare hareka mboireare hãrã hei: 2 Moise mbypara vekua pyrỹmboi'iheare hareka Fariseore ĩmẽre mbaikatu kuaaka verã Moise mbypara vekua. 3 Hãrãpo pyhẽndushu hareka pijaposhu haire heiva; tẽvã avy pijapo haire japova rãĩmi, shara haire heiva japoã. 4 Ñapĩnti mbai pohyva katumba jajepyhea hãrã ñono kuaretare ñyvãpenkare, opa mbai haire ipo pẽnte pẽimba pota pysyvare. 5 Hãrã haire opa mbai japovare kuaretare hesha verãĩ. Syvare ñono hareka jyvare, vakapi haikaviveva Ñanderu Tumpa ĩñẽẽ koipĩ; hareka mondevare pukuhe. 6 Hãrã haire pota vapypy vapyhahea mãshyãva ñymyngaruha õpe hareka Judiore ñymbaty õpe, 7 hareka potãĩ mãrãnduhashu reta karai vasure rãĩmi vataha õĩpi, hãrã kuaretare heihe verã pyrỹmboi'ia. 8 Tẽvã pee avypo kuaretare pynymbyhee pyrỹmboi'ia, shara pee pẽnte jipiva retaĩma hãrã pyrỹmboi'ia rãnga pẽntẽĩ ẽ, vokava hai Kristo. 9 Hãrã avy pymbyhee peru ko yvy ĩãre, shara pẽntẽĩ ẽ pe Ru vate arapy õ. 10 Avy piñymbyhee mburuvisha, shara koñẽĩ Ñanderu Tumpa hai punduruvisha. 11 Hãrã vateve ia pynymbytepe jokueha rea rãĩmipo jokueha jyve. 12 Hãrã pota vateve ĩñonova mba'ẽãpo hai tẽvã õñemomishĩva haipo vateve ñonõhashu. 13 “Pypavete pokui Moise mbypara vekua pyrỹmboi'iheare hareka Fariseore hapisha tamba iare! Pymboty piva Mburuvisha vasurã vate araivi ouva hõche potãã ỹngavare icherã, hãrã peeave picheã jyve hareka pyma ẽĩahe iche pota ichevare. 14 Hãrã pypavete pokui pyrỹmboi'ia hareka Fariseore hapisha tamba iare! Pyheky piva ĩmẽ manoshiare hoo haivi pymbyhasa verã puku rã ãngaĩ pirure. Hãrã pee pipity pokui ñunũpa pohyveva. 15 Pavete pokui pyrỹmboi'iare hareka Fariseore hapisha tamba iare! Peho opa rupii ko yvy ĩãrẽ hareka yyvasu hỹmbeyipi piminje verã mbava ñakape, pehohea hãrã vokava pijapomarã pijaposhi ãña tay mõkuejy pyndyheviva. 16 Pypavetepo pee pyrỹmboiva heshamba kũvãĩpia! pereva: “Ĩmẽ'ẽ ĩñẽẽ mẽẽva tupao heepe, vokava mba'ẽã hai, hãrã ĩñẽẽ mẽẽva mãĩnunga haikaviva reherã, japopo ĩñẽẽ." 17 Pee mbaimba kuavare hareka heshamba kũvãipiare! Mbaivara haikavive, mãĩnunga mãshyava ti mãĩnunga tupaope mymãshyãva? 18 Pee pere jyve: “Ĩmẽ'ẽ ĩñẽẽ mẽẽva altar tupaope õ rehe, vokava mba'ẽãshu; tẽvã ĩñẽẽ mẽẽva Ñanderu Tumpape mẽ'ẽãva altar ĩãrẽ õvã reherã, vokava japopo hai ĩñẽẽ." 19 Pee tykove mbaimba kuaava heshamba kũvãĩpiare! Mbavara haikavive: Ofrenda ti altar mbyharuva? 20 Hãrã ĩñẽẽ mẽẽva altar rehe, mẽ ẽã altar reheĩ, mẽẽ jyve ĩñẽẽ opaite altar ĩãrẽ õ rehe. 21 Ĩmẽ'ẽ ĩñẽẽ mẽẽva tupao rehe, iñẽẽ ha'ẽã tupaoreĩ ĩñẽẽ mẽẽva, ĩñẽẽ mẽẽ jyve Ñanderu Tumpa haipe õ rehe. 22 Ĩmẽ'ẽ ĩñẽẽ mẽẽva vate arapy õ reheva, ĩñẽẽ mẽẽ jyvehe Ñanderu Tumpa ẽvãpe õ rehe hareka Ñanderu Tumpa haipe vapy õ rehe. 23 Pypavete pokui pee pyrỹmboi'ia hareka Fariseore hapisha tamba iare! Pee pymẽẽva diezmo Ñanderu Tumpa pevarã kyrypoti, hãndi menta, anís hareka komino. Haivi pyndysarehe Ñanderu Tumpa hei vekua pyrỹmboi'ia pyndyreko jyvache tẽvẽrã, pypareko tẽvẽrã hareka piroja Ñanderu Tumpare. Kovare rãnite pijapo verã haivi ỹngavare pijapo tẽvẽrã. 24 Pee rãnga pyrỹmboiva heshamba kũvãĩpiare, pyndy yyvi pymbova ñatĩ ũ hãrã pymõkue kamello! 25 Pypavetepo Moise mbypara vekua pyrỹmboi'iheare hareka Fariseore hapisha tamba iare! Pijoheva timbipory ĩãrẽ tẽvã hapype tynyhẽ opava mãĩnunga piñomi vekua mbai pipota raivirã. 26 Pyhẽndu Fariseore heshamba kũãĩpiare: Johe rãni yy ho uapyare hareka yare hapype, hãrã ky ãpo jyve kupere. 27 Pypavetepo pyrỹmboi'ia hareka Fariseore hapisha tamba iare, pyndy ova tã õvẽ ñonoavape, ĩãrẽĩ mashyãva tẽvã hapype tynyhẽ ẽ tã õve kãvẽkue hareka mãrãrãgãtu kya vekua. 28 Kỹrãĩ jyve pee, pynymashyãva rãĩmi heshaha pyrehe katuaivi kuaretare hỹnonde tẽvã pyndypyape tynyhẽ papisha tamba hareka piniñarõkuevi. 29 Pypavetepo pyrỹmboi'ia hareka Fariseore hapisha tamba iare, pumũpũava ñimiñẽẽ iare ñotỹva hẽnda hareka pymymashyã heko kavi vekuare. 30 Tẽvã haivi perepi: “Jaiko teri ñanytynondevare araperã, ñãĩme mbatẽ hãndi verãre opaiteTumpa ĩñẽẽ mbeu'iare jukaha rãvẽkua." 31 Hãrã vokavare pee pikua kavi jyve hai Tumpa ĩñẽẽ mbeu'iare juka vekuare. 32 Pymby opama pijapo kova pyny tynondevare õñepyrũ vekua! 33 Pee mboi rayre! Mãrãrapo peho jepe shikui ñunũpa Ãña ẽvãpe? 34 Hãmẽãra amondo pokuiTumpa ĩñẽẽ mbeu'ia pyrỹmboi'ia mbai kuaava. Tẽvã peepo pijuka hareka puhupi pokui kurusure hai retavape, hãrã ĩrũre punũpa pokui Judiore ñymbaty õpe hareka pymoña pokui hẽnta ia retape. 35 Kỹrãpo opa oa pyndyrehekui pijapo vekua hareka heko kavivare jukaha vekuare ko yvy ĩãrẽ, Abel heko kavi vekua manovive, Zacarias Berequias tay manopeve, hai vokava pee pijuka vekua tupao altarpe. 36 Ãñete hai pee, kova mbai porãmba ryheva pijapo vekua, opa ñõĩpo oa ĩãrẽ ã'ẽva kuaretare yvy ĩãrẽ. 37 Jerusalen, Jerusalen, rijukavaTumpa ĩñẽẽ mbeu'iare hareka pijapiva ikuimbai Ñanderu Tumpa mbouvape! Mbovy jyramba potatẽ ambatyva ndyrayre, uru membyre mbatyva rãĩmi hypepo ipe, tẽvã ripotã! 38 Hãrã nderokuemi kỹrã reipo pyta. 39 Hãrã hai pee kova shyresha veama pokui vãhẽ peve ara perepi verã: “Toñemombai vasushu ouva Ñanderu Tumpa heepe.”