Ñee ñymy hã anga õmendava ryheva ¹ Hesu pyryjy ñee ñymy hã anga injetajy verã opavape. Heishu reta: Hesu pyryjy ñee ñymy hã anga injetajy verã opavape. ² Mburuvisha vasurã vate araivi ouva rãnga ova mburuvisha japova karu vasu tay õmendapo ẽrã. ³ Mondo jokuereare hẽno verã opaite hai hẽnoka vare. Hai reta ny ñatey ou reta. ⁴ Hykuaĩ mondojy jokuevare tarã, heishu reta: "Pymbeushu opaite tou reta ãhẽnokavare, opama'ẽẽ hou verãre, pymbeushu reta ajukama shurũmba kyrava". ⁵ Opaite jurureshu vekuare ou verã ny mba'ẽã kuahase ñynoi. Penteva oho mãihe jy yvy, ĩrũ oho mba ova. ⁶ Ĩrũ hembyva reta ny opa oushurã pysy reta mburuvisha vasu jokueva, heta nupã juka peve. ⁷ Haipe mburuvisha poshyite irã, mondo ñy syndarore opa juka verã jokueva juka vekuare hareka opa hapyshi verãre hẽntare. ⁸ Haivi heishu jokue vare: “Opaitema ẽ jykaru vasu shy ray õmenda verã. She airuretẽ shukue ou verã retavara, jave'ãĩ hai reta she ro ou verãre. ⁹ Hãrã pekua oparupii pyheshava pereshu ou verã jykaru vasupe. ¹⁰ Haipe jokuereare oho opa rupii mbaty hesha vavive, heko kavi hareka porãmba opaite oho, kyrã mynyhẽ reta õ. ¹¹ Hãrã mburuvisha vasu iche hesha verã ou vare, haipe hesha pẽnte kuimbai mondembava õmendavare ẽvãpe mondeava. ¹² Heishu: “Shi ĩrũ, marãra riche kope rymonde mba õmenda vare ẽvãpe mondeava?." Ko kuimbai ny jasakãi i. ¹³ Haivi mburuvisha vasu heishu jokuereare: “Pijokuashi ipy hareka ipo, pymombo katuape pyntu vape, haipe tija heo hãire tyrorokua ijehe." ¹⁴ Hesu poi injeta verã hei: Hetavape rãnga hẽno hã, tẽvã mbovyi ẽ pyhyrõã vare. ¹⁵ Fariseore ĩnjeta ijupi retarã pẽnte ñẽẽpe ñynoĩ pysyka verãre Hesu, hareka heivare ñonovaishu verãre. ¹⁶ Fariseore mondo mboireare hareka Herode ẽ hãndiare. Heishu reta: Pyrymboi'ia, kuaa rãnga ãẽteite vai rererã, hareka hekope kavi rymboi Tumpa hape. Kuaa hãijy rymby vapyã ndije he, he ia ndearã hãndi ryma ẽa vãijy he marãvara. ¹⁷ Pota kuaaha mbaivara rereshu kova: Haikavira me'ẽhãshu kyrypoti mburuvisha vasu Romape'õ, mba'etyra? ¹⁸ Hesu kuaa potai kyrã hei jy reshurã, heishu: Pee heko porãmbava, marã ĩrãra pota shiñono vaipi? ¹⁹ Shymby hesha kapi, kyrypoti kuei pyme ẽsea. ²⁰ Hesu mai he rã pyrãndushu reta: Mbaa rã'angara hareka mba heera ẽhe? ²¹ Haire heishu: Mburuvisha Romape'õ. Hesu heishu reta: Akuarã, pymẽẽshu mburuvisha vasu, mburuvisha vasu ña'ãpova, Tumpape pymẽẽ, Tumpa ña'ãmpova. ²² Hẽndu voka varã opa kuirirĩ reta. Haipe hejashurã opa jy oho reta. ²³ Voka arape vãi Saduseore oho reta Hesu ẽvãpe. Saduseore rojamba hai manova kuerajy verã, hãrã heishu reta Hesu: ²⁴ Pyrymboi'ia, Moise rãnga heja kuatiape, pẽnte kuimbai manoshi hyreko membymba vekuarã, tyvypo rekojy hyrekokue mimoña verã tichey mano vekua. ²⁵ Iko rãnga aryka'e 7 kuimbai pẽnte iare. Tynondei teva õmendateã mano, hyreko memby mba vekua, hãrã pytashu tyvy. ²⁶ Kyrãi jehu jyveshu monkuehea hareka mba hapy hea, ipity peve kõñẽma hea. ²⁷ Haivi kõñeitema hea mano jyve taupe. ²⁸ Hãrã manovare pũã jymarã, mbavara pokui ko taupe, hyrekoite ko 7 iare õmendãa hevekuare mbytepe? ²⁹ Hesu heishu reta: Tivisha rãnga pijavy. pee pikuã Ñanderu Tumpa ĩñẽẽe ti Tumpa ñymbaikatu. ³⁰ Mba'erã manovare pũãjymarã, kuimbai hareka taupe õmendaveãmapo ijehe. Ikoposhi reta, Tumpa jokuereare vate arapy'õre rãimi. ³¹ Pyrojã manovare pũãjy verãrã, pikuãmba Tumpa heipeva? Hai heimba aryka'e: ³² “She hai Abraham, Isaac hareka Jacob ñu Tumpa." Hai ha'ẽã manovare ñu Tumpa. Ĩmẽi teri'iare ñu Tumpa rãnga hai. ³³ Hẽndu vokavarã, opavare hãirã hesha ko mbai Hesu pyrỹmboi hea. ³⁴ Fariseore hẽnduma Hesu opa mikuirĩrĩ Saduseo retarã, ñembaty jyraha Hesu ẽvãpe. ³⁵ Penteva, Moise mbypara vekua pyrỹmboi ihea ity verã pyrãndushu: ³⁶ Pyrymboi'ia, marãvara Tumpa ĩñẽẽ haikaviveva? ³⁷ Hesu heishu: “Haihu Tumpa ndy pyaivive, ndy kove ryheve hareka opaite mbai kuakue ryheve." ³⁸ Kova hai haikavi veva hareka tynonde õ. ³⁹ Haivi haykue ouva ovajy, kyrã hei: “Haihu ndapisha nde rijy haihuva rãimi." ⁴⁰ Kova monkue japoa verãre opa ẽ Moise mbypara vekua hareka Tumpa ĩñẽẽ mbeu'ia pyrỹmboi hevekua. ⁴¹ Hesu injeta Fariseore jaty õperã. ⁴² Pyrãndushu reta: Mbaivara pere Mesiare? Mbavaivi ñymoña vara hai? heishu reta: David vi ñymoñava rãnga. ⁴³ Haipe Hesu heishu reta: Marã ĩrãra David Espiritu Santo rupii heishu: “Sheru”? David rãnga heimba: ⁴⁴ Ñanderu Tumpape hei Sheru pe: “Vapy sha kata kyry, tã ñono nde py ẽvãpe ndy raihu mba iare." ⁴⁵ David teiva rãnga heishu. “Sheru”? Hãmerã marã irã David vi ñymoña vapojy? ⁴⁶ Haipe mbaveã mbai heijyshu. Haivi vãi mbavea mbaiva pyrandujyshu.