Hesu iche Jerusalenpe ¹ Hesu hareka mboireare hãndi vãhẽ serima jyraha Jerusalenperã, vãhẽ tẽnta Betfage yvy olivo heta õpe. Hesu hareka mboireare hãndi vãhẽ serima jyraha Haivi Hesu mondo mõkue mboireare hỹnonderã. ² Heishu reta: Pekua pyvãhẽ tẽnta ñany nonde õpe, haipepo pyhesha pẽnte mbirika ñapintĩãva memby hãndi. Pijora perushe. ³ Ĩmẽ'ẽ potamba perushiarã pereshukui: “Yreja rãnga pota ẽ, areãndapo verukajy ndekui." ⁴ Kỹrã jehu iko verã hekope kaviTumpa ĩñẽẽ mbeu'ia hei vekua jykuatiape: ⁵ Pereshu Sionpe õre: “Pymãĩhe, kõõ ou punduruvisha vasu mbirikare, jyrojã ijehe." ⁶ Haivi mboireare oho japo Hesu heishua rãĩmi. ⁷ Hãrã rahashu reta Hesu mbirika memby hãndi hareka haire ñonohe reta mondevarã Hesu jupihe. ⁸ Hãrã kuaretare mbipyso mondeare haperãpe, ĩmẽ'ẽjy jasyjava yvyra hãkarã ñono rahava pehupi. ⁹ Hãrã kuaretare tynonde hareka taykue ohovare õñepyrõ sapukerã hei: Tumpa tymaĩ kavihe mburuvisha vasu David Tay! Toñemombai Ñanderu Tumpa heepe ouva! Toñemombai Ñanderu Tumpa! ¹⁰ Vãhẽma oho Hesu Jerusalenperã, opaite haipe õre myngyjerã heta ẽ pyrãnduva: Mbavarajy kova? ¹¹ Hãrã kuaretare hei: Ko rãnga hai Tumpa ĩñẽẽ mbeu'ia Hesu, tẽnta Nazaretvi ouva, Galileape õ. ¹² Haivi Hesu iche tupaope hãrã opa mõhẽ haipe mãvendeva hareka mba ova õre. Haipe opa mbijapara mesa kyrypoti mbyhepyha ẽvãpe, hareka pykasu mẽẽ õre vapy ñynõĩheare. ¹³ Hãrã heishu reta: Ñanderu Tumpa ĩñẽẽpe rãnga hei: “Shero rãnga mbyheeapo, oo jurureha ipe verã”, tẽvã pee pijaposhi manarõ'iare ikua. ¹⁴ Hãrã tupaope ñymboja reta Hesu ẽvãpe heshamba kuvãĩpiare hareka japava, hãrã hai opa mynguera. ¹⁵ Pai ruvishare hareka Moise mbypara vekua pyrỹmboi'iheare heshama mbaikavi heshaha verã Hesu japova, hãrã hẽndu mãrãra sanjayre sapuke tupaope: “Ñanderu Tumpa tymãĩ kavihe mburuvisha vasu David tay!”, hãrã poshy jyre. ¹⁶ Hãrã hei jyreshu Hesu: Ryhẽndura mãrãra hei jyre? Haipe Hesu heishu reta: Ãhẽndu rãnga ãĩ. Mbairã pimbijeta ãĩteira Ñanderu Tumpa ĩñẽẽ heiva kova mbai rehe? Kyrã hei: Rymbypyrahe opaite sanjaymire hareka kambu teri iare hekope kavi shemombai verã. ¹⁷ Hãrã mã ẽĩhe retarã, õhẽ oho tẽnta Betania kytyrã, voka pyhare haipe pyta ¹⁸ Kõ ẽĩ Hesu oujy tẽnta Jerusalenperã ñandu ñymbahy. ¹⁹ Hãrã hesha pẽnte igo jypy pee hỹmbeype õ, ñymbojaherã mba'ẽã heshapy; koñẽĩ hokykue rei. Haipe Hesu heishu igo jypy: - Ynteñomapo ndi iakui! Haipe vãĩ igo jypy opa jipi. ²⁰ Hãrã mboireare vokava hesharã mbyry mãĩ reta hãrã pyrãndushu Hesu: Mãrãĩra are ãĩte opa jipi igo jypy? ²¹ Hesu heishu reta: Ãñete hai pee, piroja pyndypya mõkuemba ryhe verã, ko igo jypyre ajapova rãĩmi pee katupo pijapo jyve, katupo pereshu yvyturusu: “Syry koivi hãrã ekua eapy yyvasu” hãrã kyrãpo iko. ²² Hãrã opava mãĩnunga pee pirureshuva Ñanderu Tumpa rupii, pirojarã pipitypo. ²³ Hãrã Hesu ichejy tupaope, haipe pyrỹmboi teri'õ vãhẽ jyveru hai ẽvãpe pai ruvishare hareka Israelva huvishare, pyrãndu jyreshu: Mbavara heinderã rijapo kova mbai? Mbavara mẽẽ nde ko mbaikatu? ²⁴ Hesu heishu reta: Apyrãndupo jyve pee pẽnte mbai, hãrã peresherãpo ambeu jyvepe, mbava ñymbaikatu rupiira ajapo ãĩ kova. ²⁵ Pereshe: Mbavara mẽẽshu mbaikatu, Juan pyrỹmyngarai verã? Ñanderu Tumpa ti kuaretare? Hãrã haire õñepyrõ ĩnjeta ijupi retarã hei: “Ñanderu Tumpa rãnga mboushu jairã, heipojy ñande: Akuarã mãrã'ĩrara pyrojãmbashu?." ²⁶ Hãrã kuaretare jaishurã, opavapo pũã ñandyrehe. Shara haire roja Juan, Ñanderu Tumpa mbouvarã." ²⁷ Hãrã haire heishu Hesu: Kuaahãny. Haipe Hesu heishu reta: Akuarã ambe'ũãpo jyve pee, mbava ñymbaikatu rupiira ajapo ãĩ kova. ²⁸ Hesu heishu reta: Mãrãra perereshu kova. Pẽnte Kuimbai ĩmẽre mõkue tayre. Tynondevape hei: “Shy ray, ekua mba'aposhu uva rẽndape." ²⁹ Hãrã tay hei: “Shatẽyny aha." Tẽvã kỹma ẽrã pya mbijeta jyrã oho mba'apo. ³⁰ Haivi ohojy tay taykuitea ẽvãperã, kỹrãĩ heijyshu oho mba'apo verã. Hãrã heishu tuu: Akuarã, ahapokui, tẽvã ohoã mba'apo. ³¹ Mbavara mõkue iare japoshu tuu heiva? Hãrã haire heishu: Tay tynondeiteva. Hesu heishu reta: Ãñẽte hai pee, kyrypoti mbaty iare Roma pevarã hareka taupe heko porãmba ichepo Ñanderu Tumpa Mburuvisha vasurãpe, tẽvã pee picheãpo!l ³² Juan Bautista rãnga ou pynymboihe mãrãrapo piko, tẽvã pyrojãshu. Kyrypoti mbaty iare Roma pevarã hareka taupe heko porãmba rojashu reta. Vokava pee pyhesha tẽvã pyhejã pyndyreko porãmba vekua hareka peijyvyã, pyrojashu verã. ³³ Pyhẽndu jyve ko ñymyhã'ãnga: Pẽnte kuimbai ñotỹka uva jy yvype; opama mangorarã haivi japoka jyshu uva ñamĩã verãpe. Mupũãjy pẽnte o vate õvã, haipe ẽvẽrã mãĩ õ hareka ñyngareko verã jy yvype. Haivi porykashu hepyre ñimĩty iare jy yvyrã, mbyry oho. ³⁴ Vãhẽma ara uva ia myno õã verãperã, ko karai mondo jokuereare mba'apo iare ẽvãpe, hai ña ãporã veru verã. ³⁵ Tẽvã mba'apo iare pysy reta jokueava pẽntevape hãrã nũpa retarã ĩrũ juka, yngavape japi itape. ³⁶ Tẽvã ko karai hetave mondojy jokuevare, mba'apo iare kỹrãĩ japo jyhe reta ĩrũre japohea rãĩmi. ³⁷ Koñemahea tay mondojy shara pyape hei: “Shyray rãnga amondo hãrã mba'ẽãpo japohe reta." ³⁸ Heshama reta yvy ija tayrã, mba'apo iare hei: “Kovape rãnga opapo pytakui opa mbai, jajuka hãrãpo pyta ñandekui ko yvy." ³⁹ Haipe pysy reta nohẽ uva rẽndaivirã, juka. ⁴⁰ Haivi Hesu pyrãndu: Yvy ija oujymarã, mbaivara japo pohe retakui mba'apo iare? ⁴¹ Hãrã hei reta: Opapo juka parekoãpo ko heko porãmba retape. Haivi mẽ ẽãposhu jy yvy ỹnga mba'apo iare ña ãpõrã. ⁴² Haipe Hesu heishu reta: Pee rãnga pikua Ñanderu Tumpa ĩñẽẽpe heirã: Kova ita, oo japo iare mombo vekua, voka ĩãrẽ ã'ẽ mupũ'ãhã. Vokava Ñanderu Tumpa japo hãrã kova mbaikavi heshaha verã. ⁴³ Hãmẽãra hai pee, Ñanderu Tumpa Mburuvisha vasurã hekypo pyhevi hãrã ỹngavapepo mẽẽ, kuaretare mynõva Mburuvisha vasurã pevarã. ⁴⁴ Tẽvã ĩmẽ'ẽ ita oahearã opapo my õpe, ĩmẽ'ẽ oava ita ĩãrẽrã opapo mungui. ⁴⁵ Pai ruvishare hareka Fariseore hẽndu voka ñẽẽ ñimbivacheva Hesu mbeuva, heshahe reta haire he'iha ẽshua. ⁴⁶ Hãrã pota pysyka jyre Hesu. Kuaretare kyje jyreshi rãmeĩ, shara rekoshu reta Tumpa iñẽẽ mbeu'ia rãĩmi.