Ñẽẽ ñymyha ãnga mba'apo iare ryheva ¹ Mburuvisha vasurã vate araivi ouva ova koo ija õhẽva kõ'ẽĩ heka mba'aposhu verã ju'uva rẽndape. Mburuvisha vasurã vate araivi ouva ova koo ija õhẽva kõ'ẽĩ ² Opa ĩnjeta kavi hãndi reta mba'apo verãre, hareka mbyhepyshu verã voka arape mba'apova hepykue, haivi mondoshu reta ju uva rẽndape. ³ Haivi kõ ẽĩ nũnga õhẽjyrã heshajy iko rei iare plazape. ⁴ Hãrã heishu reta: “Pekuã pymba'apo jyveshu uva rẽndape, hekope kavipo ãmbyhepy pekui." Hãrã haire opa jyraha. ⁵ Koo ija õhẽjy ndoceipi, haivi ka'arumima ohorã kyrãi japojy. ⁶ Haivi ka'aruitemarã hykuãĩ õhẽ ohojy plazape, heshajy haipe mbaimba japo õre, hãrã heishu reta: “Mãrã'ĩrãra pee pikorei mbaimba pijapo pẽĩva?." ⁷ Haire heishu: “Mbaveã rãnga yrokue mba'apoha verã." Haipe heishu reta: “Pekua pymba'apoveshu uva rẽndape, hekope kavipo ãmbyhepy pekui." ⁸ Pyntumarã, koo ija heishu ju uva ñyngareko ẽheã: “Hẽno mba'apo iare mẽẽshu reta japova hepykue. Tynõnde mẽẽshu taykueite ichevare, koñemahea mẽẽshu tynondeite ichevare." ⁹ Hãmã jyveru ka'aruiterã ichevare, pẽnte ara mba'apova rãĩmi pepẽntẽi mẽ ẽãshu reta kyrypoti. ¹⁰ Haivi vãhẽ jyveru jyve tynondeite ichevare, moãtẽ hetave mẽ ẽãshu hai retarã, tẽvã ĩrũre rãĩmi mẽ ẽã jyveshu reta. ¹¹ Hãrã mẽ ẽãmashu mba'apoheare hepyrã, õñepyrõ injeta porãã jyreshu koo ija. ¹² Hãrã hei reta: “Taykue icheva reta rãnga sapy'aiteĩ mba'apo, tẽvã rymẽẽshu reta ore rymẽẽva rãĩmi, ore rãnga ko ara pukukue mba'apoava kuarasy hakupe.” ¹³ Tẽvã koo ija heishu pẽnteva: Shi ĩrũ, ajapoã rãnga ndyrehe porãmbava. Ja ẽãra ijupeje ambyhepy nde verã pẽnte ara repy rymba'apovare? ¹⁴ Mẽ ẽãma rãnga nde rijapova hepy, ekuajy nyrẽtape. Potai ãmẽẽ jyveshu taykue icheva ãmẽẽ ndeva rãĩmi. ¹⁵ Katuãra she sha'ãmpova ajaposhi pota ajapova? Ti shypya kavirãra ndyposhy she? ¹⁶ Kyrãpo tynonde õre mbytaykueha, hareka taykue õre mytynõndeapo." Hetavape rãnga hẽno hã, tẽvã mbovyi ẽ pyhyrõã vare. ¹⁷ Hesu oho Jerusalen kytyrã raha 12 mboireare hã'ẽĩ õpe, hãrã heishu reta: ¹⁸ Jaha rãnga jai Jerusalen kyty. Haipe, she Kuareta tay rãĩmi ai vekua, ẽpo shymẽẽva pai ruvishare hareka Ñanderu Tumpa ĩñẽẽ pyrỹmboi'iheare ipope, haire jurureposhukaha verã. ¹⁹ Haivipo shymẽ'ẽãkui tẽnta ỹngavare ipope, ñymbyhory shy rehe verã,shu nũpa hareka shymby savavaha verã kurusure. Tẽvã mbahapy arapepo shykove jyrã ãpuãjykui manovare mbyteivi. ²⁰ Haivi ñymboja Hesu ẽvãpe Zebedeo hỹreko, membyre hãndi Santiago hareka Juan, hãrã ĩñẽẽsu Hesu hỹnonde jurureshu verã pẽnte mbai. ²¹ Hesu pyrãndushu: Mbaivara ripota? Hãrã taupe heishu: Ereshu, kova shymemby mõkue'iare tyvapykui rẽivape mburuvisha vasurã, pẽnte ndakata kyty hareka ĩrũ ndasu kyty. ²² Tẽvã Hesu heishu reta: Pee pikuã pirureva. Peera pẽĩ pyhasa asy verã, she ahasa asy verã rãĩmi?j Haire hei: Ôĩhã rãnga hasaha verã. ²³ Hesu heishu reta: Ãñete rãnga pyhasa asypokui she rãĩmi. Tẽvã pyvapy verã shasu hareka shakata kyty sheeãpo ãmẽẽpe, Sheru po mẽẽ vokava hai mỹhẽvã ẽshua retape. ²⁴ Hãrã ĩrũre (10) mboireare hẽndurã, poshy jyreshu Santiago hareka Juan. ²⁵ Hesu hẽnoshu retarã hei: Pee rãnga pikua mãrãra mburuvishare ñimbi ijahe hẽnta õre, hareka mãrãra karaivasure reko asyshu reta. ²⁶ Tẽvã pynymbytepe ha'ẽã kyrã verã. Imẽ'ẽ pota vateve ia pynymbyteperã, opava retape jokueha reihapo. ²⁷ Hãrã pota tynonde ia pynymbyteperã, opava retape tymbory. ²⁸ She, kuareta tay rãĩmi ouva yyy ĩãrẽ, aiã apyrokue verã, shokueha i verã rãnga jyve hareka ãmẽẽ verã shyrykove, ãnohẽ verã hetavape mbai porãmbaivi. ²⁹ Hesu hareka mboireare õhẽma tẽnta Jerikoivirã, heta ẽ kuaretare ohova haykue. ³⁰ Hãrã haipe ẽ mõkue heshamba kuvãĩpiare vapy ñynõĩ pe hỹmbeype. Hẽnduma Hesu hai hasa ohovarã, sapuke jyre: Yryparekomĩ tẽvẽ, David tay! ³¹ Heta ẽ poshyshuare pota jasakarã, tẽvã haire hỹnãtuve sapuke jyrerã hei: Yryparekomĩ tẽvẽ, David tay! ³² Haipe Hesu oho ñymboyrã, hẽno mõkue heshamba kũvãipiarã heishu: Mbaivara pipota ajapo pyndyrehe? ³³ Haire heishu: Karai, pota rãnga heshaha jyve kũvãĩpi. ³⁴ Haipe Hesu parekoiterã pokoheshu hesare, hãrã haipe vãĩ heshamba kũvãĩpiare, heshajy.