Hesu pyrỹmboihe omẽndava poi ijuhuviva ryheva ¹ Haivi Hesu opa hei kova mbairã, õhẽ Galileaivirã vãhẽ oho yvy Judeape, yy syryva Jordan kyty. Haivi Hesu opa hei kova mbairã, õhẽ Galileaivirã vãhẽ oho ² Kuareta hetava oho haykue, hãrã haipe mynguera ñymbairasyvare. ³ Hãrã Fariseore ñymboja Hesu ẽvape pyahãshu verãrã pyrãndushu: Katura mbaiva reheĩ pẽnte teme poishi hỹreko? ⁴ Hesu heishu: Pimbijetãmba Ñanderu Tumpa jykuatiape heiva, Ñanderu Tumpa japo vekua jypyiterã kuimbai hareka taupe? ⁵ Haivi heijy Ñanderu Tumpa: “Hãrã kuimbai hejapo tuu hareka ishy, hyreko hãndi iko verã, hãrã mõkue õre ñymy pẽnteĩma verã." ⁶ Hãrã kỹrã mokue veama jyre, koñẽĩ pẽnteĩma, hãrã Tumpa omomẽndavare, kuaretare avy typoi ijuhuvi. ⁷ Haipe Fariseore pyrandushu: Mbaiva rehera akuarã Moise mẽ'ẽka tỹrekope kuatia õmendava poishia ryheva, hãmã haipe poi ijuhuvi? ⁸ Hesu heishu reta: Pyndypya tãtaivi Moise mã'ẽĩmbahe pee pypoishi pyndyreko; õñepỹrũape katy kỹrã mba tẽvekua. ⁹ Tẽvã she hai pee, “Hỹreko poishia mbaimba reherã, haivi õmendajyhe ỹngava tauperã, opa mymgya õmendavare; heja reipo hỹreko, ha'ẽĩ ỹnga kuimbai ñeno hãndirã rehe.” ¹⁰ Hãrã mboireare heishu Hesu: Kỹrã potarã, vokava kuimbai hareka hỹreko hãndi haikavivepo õmendã reta. ¹¹ Hesu heijyshu reta: Ha'ẽã kuaretare katu japova kova, koñẽĩ Ñanderu Tumpa mẽẽshu vãĩpo. ¹² Hãrã heta mbai rehe rãnga kuimbaire hỹrekõa; ĩmẽ'ẽ oarãvãĩ ñymbairã hỹrekomba verã, hãrã ĩmẽ'ẽjy yngava õmendambava shara kuareta ñymbai jeperã, tẽvã ĩmẽ'ẽ õmendambava shara mba'apo Mburuvisha vasurã vate araivi ouva reherã. Hãrã kova pota kuaa kaviva, tikuaa kavi. ¹³ Hãrã sanjaymire veruhashu Hesu ẽvãpe, ipo ñono ĩãrẽ verã hareka ñymboihe verã; tẽvã mboireare poshy jyreshu veru õ retape. ¹⁴ Tẽvã Hesu hei: Pyma ẽĩhe sanjay tou shyvache hareka avy pijocha, shara haire rãĩmiva Mburuvisha vasurã vate araivi ouva. ¹⁵ Hãrã ipo ñono ĩãre sanjaymire, haivi oho. ¹⁶ Pẽnte kunumi vãhẽ ou Hesu õpe hãrã pyrãndushu: Pyrỹmboi'ia heko kaviva, mbaiva haikavivara katu ajapo apity verã tykove opambava? ¹⁷ Hesu heishu: Mãrã'ĩrãra rereshe heko kaviva? Pẽnteĩ rãnga ẽ heko kaviva, vokava hai Ñanderu Tumpa. Pota riche tykove opambavaperã, japo Ñanderu Tumpa ĩñẽẽ japoa verã heiva. ¹⁸ Kunumi heishu: Mãrãvara? Hesu heishu: Avy puruka; avy mbai õmendavare, avy manarõ, avy ĩnjeta porãhe ndapishare. ¹⁹ Japoshu nderu hareka ndesy, hãrã haihushu ndapisha rijyhaihuva rãĩmi. ²⁰ Hãrã kunumi heishu Hesu: Shyndei ai rãvãi rãnga opa ajapo vokava, mbaivara ĩmẽve ẽjy ajapo verã? ²¹ Hesu heishu: Pota opa rijapo hekope kavirã, ekua opa evende ĩmẽ ryreare, mẽẽshu pavete'iare hãrã ĩmẽpo ryrekui opa mbai vate arapy, Ñanderu Tumpa ẽvãpe; haivi ei shimi'ĩrũ. ²² Hãrã ko kunumi hẽndu vokovarã vy ã ohojy, shara ikokatu. ²³ Haipe Hesu heishu mboireare: Ãñete hai pee, javaiposhu hai ikokatuvare iche verã Mburuvisha vasurã vate araivi ouva. ²⁴ Hãrã haijy pee, javaiãshu kamello hasa verã ju sakuaipi, kuimbai ikokatuvare iche verã Mburuvisha vasurã vate araivi ouvape. ²⁵ Mboireare hẽndu vokavarã mbyry mãĩ retarã heishu: Mbavara akuarã katu oho jepekui? ²⁶ Hesu mãĩhe retarã heishu: Kuaretare katuã japo vokava, tẽvã Ñanderu Tumpa ĩmẽre mbaikatu opa mbai japo verã. ²⁷ Haipema Pedro heishu: Ore rãnga opa mbai hejaha nimi ĩrũha verã. Mbarãrapo mbyhekoviaha jy orekui vokava? ²⁸ Hesu heishu reta: Ãñete hai pee, vãhẽma ara opa mbypy'ahuajy verã, hareka she, Kuareta tay rãĩmi ouva yvy iãrẽ, avapypo vapyhapya hĩmbipevape. Hãrã pee shimi'ĩrũ vekua pyvapypo jyve 12 ẽvãpe, mbaikavikue japo verã 12 ñymoñare Israelva retape. ²⁹ Hãrã opaite hoo heja vekua hareka tyvyre, hĩndyre, tuu, ishy, hỹreko, tayre ti jy yvy, shy rehe, hãrã hetaitevepo mẽ'ẽãjyshukui hareka hipitypo tykove opambava. ³⁰ Kyrãpo heta tynonde'õ mbytaykueha, hareka taykue õre mytynõndehapo.