Mbavara hai mbaivasuveva ¹ Haivi, Hesu mboireare ñymboja ẽvãperã pyrãndushu: Mbavara Mburuvisha vasurã vate araivi ouva haikaviveva? ² Haivi hẽno pẽnte sanjaymi ñono mbyteperã, ³ hei: Ãñẽteite hai pee, pyhejã piko vekua rãĩmirã hareka pikoã sanjay rãĩmirã picheãpo Mburuvisha vasurã vate araivi ouvape. ⁴ Ko sanjay rãimi ñimimishĩva, vokavapo mbai vasuve Mburuvisha vasurã vate araivi ouvape. ⁵ Ĩmẽ'ẽ kuareta shyreepe myvãheva ko sanjay rãimi, sheepepo shymyvãhe. Mbai porambape katu ñandirity ryheva ⁶ Ĩme'ẽ mbai porãmba japokashua kova sanjay rãĩmi jyroja shyreheva, haikavivepo jajure ñapitĩha pẽnte jytaky vasu momboha yyvasupe. ⁷ Pirirityva, mbai porãmbape oho porãpo. Shara ẽẽñoĩpo mbai porãmba tẽvã pavetepo ko kuareta mbai porãmba japokava. ⁸ Hãrã ndepo hareka ndepy ndyraha po porãmba kytyrã, jasyja hareka mombo mbyry, haikavi vepo riko Tumpa hãndi ndepy hareka ndepo mbape, hãima avypo ny momboha tata vasu ovemba õpe ndepy hareka ndepo mokue ryheve. ⁹ Hãma ndyresa hai ndyraha i'mbai porãmba kytyrã, heky hareka mombo mbyry; haikavi vepo nde riche tykove opa mbape pẽnte ndyresa ryheve, mãhẽ nymomboha aña ẽvãpe tatavasupe mokue ndyresa ryheve. ¹⁰ Avy pijahe he sanjay rãimi jyroja shy ryheva. Haipe Tumpa jokuevare haire ĩmẽ'ẽ Ñanderu hynonde hareka hesha reta hova. ¹¹ She Kuareta tay rãimi aiva ko yvy ĩare, ai anohẽ opavape mbai porãmbape jeky verã. ¹² Mãrãra pope? Pente kuareta ĩmere 100 avisharã, kañyshi pẽntevarã, hejarapo 99 õ yvyturusu kyty irũre hãrã oho hekajy pẽnte kañyshia? ¹³ Vãhẽ jymashurã, pya horyiteve po voka avishare haipe (99) kañy mbaivi. ¹⁴ Kyrã jyve py nde Ru vate arapy õ potã mbava kañy ko sanjay ndeiveva rãimi jyroj ¹⁵ Ndapisha japo ndyrehe porãmbarã, ĩnjeta hãndi hã'ẽĩvape hãrã mbeu kavishu mbai porãmba japo vekua. Nyrẽndurãpo rẽi kavijy hãndi ndapisha. ¹⁶ Hãrã ny rẽndusearã katu rỹ hẽno pẽnte o mokue hẽndu verã, katu mapo “opaite he iava he ia verã mokue o mbahapy õ hyvache”, heiva rãimi Ñanderu Tumpa ĩñẽẽ. ¹⁷ Hãma potã hẽndushu retarã, mbeu tapaope, hãrã hẽnduseãjy tupaoperã tevãrã, pijaposhu haimba py ndy ryhevava tẽnta Roma pevarã okorã ia rãimi. ¹⁸ Ãñete vape hai pee, pee piña pintiva ko yvy ĩãrẽ, ñapintia po jyve vate arapy, hareka pee pijora ko yvy ĩãrẽva jorahapo jyve vate arapy. ¹⁹ She hai jyve pe, mõkue pẽeva pi ñiñono pẽnte ñeepe ko yvy ĩãrẽ, pee pota pirureva ñymboipe, Sheru arapy õva ẽvãpe mee pope. ²⁰ Hãma mõkue o mbahapy ñymbatya shy reepe, haipe she ãĩ hãndi reta. ²¹ Hãrã Pedro ñymboja Hesu ẽvãpe heishu: She Ja, Mbovy jyrapo ahejarei shi shapishape, porãmba japo vai shy reherã? 7 jy rapo? ²² Hesu heishu: Ha'eande 7 jy peveĩpo, 70 hai 7 jy peve rãnga. ²³ Hãrã Mburuvisha vasurã vate araivi ouva ova jyve huvisha vasu pyrandushu vekua mba'apo õvape japovare. ²⁴ Hãma õñepyrõ japo voka verua hỹnonde pẽnte hetaiteve oreveshuape. ²⁵ Mba'ety re mai nunga mee verã, ko kuareta hei õvendeha verã jokuea rei re verã hỹreko hareka tay reta hãma opa ĩme rea ryheve, opa mbyhepy verã oreve vekua. ²⁶ Haivi ko jokuea rea hỹnỹpỹa hỹnonderã jurure asyshurã hei: “Karai, shy'ãrõminte hãrã opapo ãmeejyndekui." ²⁷ Hãma ko karai parekoshurã heja rei shi oreveshu vekua hãrã mã'ẽi he oho. ²⁸ Hãma õhẽ jy oho voka jokuea rea hỹvãinti jy ñi irũ mishi oreveshuape, kũavãshu jaseoipi pirã hãrã puntue mbija japy shirã heishu: “Mẽ'ẽ jy she nde rereve shea." ²⁹ Haipe hỹnỹpỹa jatyka hapisha hỹnonde jurure asyshura hei: “Shy ãrõ rãnia ni hãme po opa ãme jy ndee." ³⁰ Hai katy hãrõseã mbashua hãma mondo mby peresoka opa jy mẽe peveshu oreve he vekua. ³¹ Hesha voka ynga jokuearea pya mba rasy reta hãrã oho voka karai õpe opa mbeushu reta ikova. ³² Haipema karai hẽnokarã heishu: ”¡Nde jokueava pya tãtava!. She ahejareitẽ ndyhevi kuri nde rereveva, rirurerei sherã. ³³ Hãma nde rypareko tẽ jy verã nda pishape, she aryparekova rãimi. ³⁴ Hãma poshyite i ko karairã raha mby peresoka opa mby hepy jy peve oreveva. ³⁵ Hãrã Hesu hei: kỹrã jyve Sheru arapy õ japo po py ndyrehe pepẽtẽi peeva pyheja seã pyndy pya vive papishai virã.