Hesu hete opa ỹngai oho ¹ Haivi (6) arajyape Hesu rahashu Pedro, Santiago hareka tyvy Juan, jupi reta yvyturusu ĩãrẽ. Haivi (6) arajyape Hesu rahashu Pedro, Santiago hareka ² Haipe hynonderãpetei Hesu hete opa ỹngai oho. Hova opa hĩmbipe kuarasy rãimi, hareka mondeva tĩi hendyva sapea rãĩmi. ³ Haipe ijeshaka Moise hareka Elias, ĩnjeta ñynõĩ hãndirã. ⁴ Haipe Pedro heishu Hesu: "Sheja, haikavi rãnga ore kope ĩmẽha'ẽrã. Ripotarã japohapo mbahapy oo rãĩmi: Pẽntepo na'ãporã, pẽntepo Moise pevãrã hareka ĩrũ Elias pevarã. ⁵ Pedro ĩnjeta teri'ẽ vẽkua, mundii ãvãpyntu himbipeva opa jasoishu reta. Haipe ãvãpyntuivi ñyhẽndu pẽnte ñẽẽ heiva: Kova hai Shyray ahaihuva, shymbyhoryva, pyhẽndushu. ⁶ Mboireare hẽnduma kovarã, ĩñesu reta mboja peve hova yvyre, kyjeite retarã. ⁷ Hesu ñymbojahe retarã, pokoherã hei: "Pupũ'ã, avy pykyje". ⁸ Hãrã mãijy retarã mbaveã heshajy, koñeĩ hesha Hesu hã'ẽima ẽrã. ⁹ Vejyjy retarã, Hesu heishu reta: Avy pymbeukui mbavape ko pyheshava, kuimbai ray rãĩmi ou vekua,shumũpũ'ãjy peve manovare mbyteivi. ¹⁰ Mboireare pyrãndushu Hesu: Mãrã'irãra Moise mbypara vekua pyrỹmboi'iheare hei, Elias rãni ou verã? ¹¹ Hesu heishu reta: Ãñẽte rãnga Elias rãnipo ou, hareka haipo opa mbai ñono kavijy. ¹² Hairã she hai pee, Elias ouma rãnga, tẽvã mba'etyĩ kuaashuva, hãrã japo he reta, pota japo he vãĩ. Kyrãmi jyve she, Kuareta tay rãimi ai vekua ahasa asy po ipope reta. ¹³ Haiperã, mboireare kuaa kavi reta, Hesu injetaheshua Juan Bautista. ¹⁴ Vãhẽ jyraha hetavare õperã, ñymboja Hesu ẽvãpe pẽnte karai, hynypyã jatyka hynonderã heishu: ¹⁵ Sheja, parekomitẽ ko shyray, hai rãnga ñymba'asy vãhẽmajyshurã opa mbyryry hareka juru mbytyryju, hetama oa tatape, ãmõpe yypy ityjy. ¹⁶ Arumatẽshuje rymboiryreare tẽvã haire katũã mynguera. ¹⁷ Haipe Hesu hei: Tykove jyrojamba, ñarõvare! Mbaipeverapo ãime ãĩ penendie? Mbaipeverapo aiko pyndyrehe? Perushe kope. ¹⁸ Haipe Hesu hynãtu ĩnjetashu mbaiposhyrã, õhẽshi kunumi ray, hãrã haiperaveĩ kuera. ¹⁹ Haivi mboireare ñymbojahe Hesu hã'ẽĩ õperã, pyrãndushu: Mãrã'ĩrãra katuã mõhẽhashi ore mbaiposhy? ^{20 21} Hesu heishu reta: Sa'ite pirojarã. Ãñẽte hai pee, pirojakue mbai rãy mishĩva rãĩmirã, pereposhu yvyturusu: "Syry koivi, ãumpe syryjy", japoĩpo jyvepe. Opa mba'e katu pijapo. Tẽvã, mbaimba peuva ryheve pirureshu Tumpa, hãmẽrãpo katu pymõhẽ kyrãva mbai poshyre. ²² Ikojyre Galileaperã Hesu kyrã ĩnjetashu mboireare: Kuimbai rãimi ouva, shymẽ'ẽãpokui kuaretare ipope. ²³ Haire shukapokui, tẽvã mbahapy arape akuerajypokui. Kova hẽndu retarã opa mbypy'ã reta. ²⁴ Hesu hareka mboireare vãhe tẽnta Capernaumperã, kyrypoti mbaty iare tupao pevãrã oho Pedro ẽvãperã pyrãndushu: Pymboi iara mẽẽ jyve kyrypoti tupao pevãrã? ²⁵ Pedro heishu: Mẽẽ rãnga. Haivi hai iche oo iperã Hesu rãni ĩnjetashu Pedro hãrã pyrandushu: Simon, mãrãra rere? Mburuvishare mbaty kyrypotirã, mbavarera jopyve ñyñoĩ? Hẽnta rehera ti ynga tẽntarera? ²⁶ Pedro heishu: Ynga tẽntare. Hesu heishu: Akuarã hẽnta ĩrũre katuã rãngapo mẽẽ. ²⁷ Kyrãrã, potamba poshy ñande verã mbava, ekua ity nipinda yyvasupe, tynonde pira rynohẽva jurupy rymãĩrã ryvãĩposhukui nikere ñande pevãrã, raha mẽẽshukui vokava.