Fariseo hareka Saduseore pota hesha mbai heshahamba ¹ Fariseo hareka Saduseore oho Hesu õpe, pyahãshu verã jurureshu reta mbai heshahamba vate araivi ouva. Kỹrãra Fariseo hareka Saduseore oho Hesu õpe, pyahãshu verã hai heshakapo pyrãtãkue. ² Hesu heishu reta: Kuarasy icherã pere: "Ara haikavipo'ẽ shara ara pynta jykuaa". ³ Parejyrã pere: "Yvytu porãpo ou, shara ara pyntavasĩ hareka opa ñy'ãvãpyntu'ẽ". Pee rãnga pikuaa mbaivara ikopo arare pymãirã. Pyrymbytavyĩ iare, marãira pikuã mbaivara he'ise kova mãinunga jehuva? ⁴ Kuaretare heko porãmba iare Tumpare jyrojambava jurure mbai heshahamba. Mẽ'ẽhãposhu mbai heshaha verã, koñeĩ heshahakapo pee Tumpa ĩñẽẽ mbeu'ia Jonas ikohea rãimi. Haipe hejashu retarã oho. ⁵ Mboireare vãhe yy yvaisho kytyrã, haipe manduahe reta sarembahe hou verãrẽ. ⁶ Hesu heishu reta: Pingareko katu Fariseo hareka Saduseore pyrymbytavyĩ iare jylevaduraivi. ⁷ Tẽvã mboireare hei ijupe reta: Voka rãnga hei'i shara jaruã pãhã. ⁸ Hesu kuaa mbaivara hei ñynoĩ, hãrã heishu: Marã'irãra pinjetaite mba'ety pyrea pãhã? Piroja ãintembapi shyrehe. ⁹ Pymandu'ãrahe ambijaorã vẽkua (5) pãhã (5000) kuimbai retape? Mbovy kanata mãrẽyvara pymynyhẽjy hemby vekuaivi? ¹⁰ Pymandu'ãrahe voka (7) pãhã ambijaorã vẽkua (4000) kuimbai retape? Mbovy kanatara mãrẽyvara pymynyhẽjy vokavaivi? ¹¹ Mãrãira pikuakavi raniã aĩnjetamba ãiheva pãhãre? She rãnga hai pee kuri, pingareko verã Fariseo hareka Saduseo reta ilevaduraivi. ¹² Haiperã kuaakavi reta Hesu ĩnjetãheshu ñyngareko ijeheshi verãre levadura pãhã ryhevaivi, koñẽĩ ĩnjetaheshu Fariseo hareka Saduseore pyrỹmboiva rãĩmi. ¹³ Hesu oho tẽnta Cesarea Filipope, haipe õi terirã mboireare pyrandushu reta: Mbaivara kuaretare hei shyrehe Kuimbai vateivi ouva rãĩmi aiva yvy ĩãrẽ? ¹⁴ Haire heishu: Ĩmẽ'ẽ heiva Juan Bautista, ỹnga hei Elias hareka ĩmẽ'ẽjy heiva nde hai Jeremias ti arykaiva Tumpa ĩñẽẽ mbeu'ia. ¹⁵ Hesu pyrandushu reta: Peera mbaiva pere, mbavara she? ¹⁶ Simon Pedro heishu: Nde hai Kristo, Tumpa tay hykoveva opa ara. ¹⁷ Hesu heishu: Ryvy'apo nde Simon, Juan tay. Mbava rupiiã rikua kova, Sheru vate'õ kuaaka nde. ¹⁸ Hãrã haijyve, nde hai Pedro. Ko ita ĩarẽpo amũpũa shyrehe jyrojavare, hareka mba'ety ñymano jepyãpohe. ¹⁹ Ãmẽẽpo nde Mburuvisha vasurã vate araivi ouva oo pe'ahapya. Opa rĩñapĩntiva ko yvy ĩãrẽ, ñapĩntihapo jyve vate arapy, hãrã rijorava ko yvy ĩãrẽ, jorahapo jyve vate arapy. ²⁰ Hãrã Hesu heishu mboireare avy mbavape mbeu verã haiva Hesu, Kristo he'iashua. ²¹ Vokava araivive Hesu mbeushu mboireare hai oho verã Jerusalenpe, hareka haipe mbyhasa asypo kuakuavare, pai ruvishare, hareka Moise mbypara vekua pyrỹmboi'iheare ipope. Hesu heishu reta: She amanopokui tẽvã mbahapy arapepo shyrykovejy. ²² Haipe Pedro rahashu Hesu hã'ẽĩ õpe, ñyngãtashurã heishu: Katuã rãngapo, Sheja! Katuã rãngapo kỹrã iko ndyrehe! ²³ Hesu jerepyrã heishu Pedro: Syry shyhevi Ãña! Nde pota shocharẽĩ. Ndypya rĩñanduva ha'ẽã Ñanderu Tumpaivi ouva, koñeĩ kuaretare ñanduva rãĩmi rĩñandu kova mbai. ²⁴ Haivi Hesu heishu mboireare: Ĩme'ẽ pota shimi'ĩrũvarã tiñymbysare ijuhuvi, tuhupi jukurusu kupere, hãrã tou shimi'ĩrũ. ²⁵ Shara hykove haihuva, ohojepeãpo. Shyreepe manova, iko pukupo ²⁶ Mbaivara mẽ'ẽãpojyposhu kuareta ko yvy ĩãrẽ ĩmereva, manoshirã? Mba'etyva! Mbaivara kuareta mẽẽpo kuerajy verã? Mba'etyva. ²⁷ Shara Kuimbai vateivi ouva, aijypokui Sheru hĩmbipekue ryheve hareka jokuevare hãndi. Haipe Tumpa mẽẽposhu pepentẽi japo vekuare jurureva rãimi. ²⁸ Ãñẽtẽinte hai pee kope peĩva, manoãteri pokui, hesha peve ko kuareta tay ouva yvy ĩãrẽ oujy Mburuvisha vasurã.