Mbai ñanymyngyava ¹ Haivi ñymboja Hesu ẽvãpe Fariseo hareka Tumpa heiva pỹrỹ mboi iheare, ouva Jerusalenvi, haire pỹrandushu: Haivi ñymboja Hesu ẽvãpe Fariseo hareka Tumpa heiva ² Mãrã irãra rymboi ryreare japoã hekope arykaivare pyrỹ mboiva rãimi. Jypoiã reta karu verã, japohasea rãimi. ³ Hesu heishu reta: Mãrã'ĩrãra hekope kaviã pijapo jyve Ñanderu Tumpa heiva, pipykuava rãimi pijapopirã. ⁴ Ñanderu Tumpa rãnga hei: “Iko kavi hãndi nderu hareka ndesy, shara ĩñẽẽ porãmba ishua tuu hareka ishy, jukahapo." ⁵ Peeny perekuei katumbava heiva tuu hareka ishype: “Katuany arỹmbory, shara opaiteva ime areare opama ãmẽe Ñanderu Tumpape." ⁶ Ĩmẽ'ẽ kyrã heivarã, katuveama mbory tuu hareka ishy. Kyrã pimbijiche Tumpa heiva pijapo verã pipykuava rãimi. ⁷ Pyrymbytavyĩ iare! Hei kavi pyndyrehe Tumpa ĩñẽẽ mbeu'ia Isaias: ⁸ Kova kuaretare jurupẽi she mombai jyre, pya retany mbyry ẽ shyhevi. ⁹ Hãrã reii shemombai rã'ãnga reta, shara ha'eire hei vekuaĩ pyrỹmboi jyrehe. ¹⁰ Haivi Hesu hẽnoshu kuaretare hãrã heishu: Pyhẽndu, hareka pikuakavi verã. ¹¹ Ha'ẽã rãnga kuaretare juruipi icheva myngyashuva, juruivi õhẽvãĩ myngyashu ñẽẽ porãmba rupii. ¹² Haipe mboireare ñymbojaherã heishu reta: Rikuara Fariseore pya ohoãhe hẽndu rerevarã. ¹³ Hesu heishu reta: Opaite yvyra Sheru ñotỹmba po'oapokui hapoivive. ¹⁴ Pyma ẽihe haireta rãnga heshamba kũvãipiare, raharea irũ heshamba kũvaipiare. Hãrã pẽnte heshamba kũvãĩpia rahare ĩrũ heshamba kũvaipiarã, mokue ryheveãrapo oa yvykuape. ¹⁵ Haipe Pedro heishu: Mbeu kavivejy ore mbaivara he'ise ko ñee ñymyhã'ãnga. ¹⁶ Hesu heishu reta: Peeavera pikuã teri kova? ¹⁷ Pikuãra opa mbai icheva ñandijuruipi oho ñandyretepy, haivi õhẽjy ñandyreteivi? ¹⁸ Ñandijuruivi õhẽva ñandypyaivive, hai voka ñanymyngyava. ¹⁹ Ñandypya ñambijeta rupii õhẽ mbai porãmba, ijukava, javasa'ia, heko porãmba, manarõ, japuva, injeta reiva hapishare. ²⁰ Kova hai ñany myngyava, tẽvã jaipohemba jakaru verã japohasea rãimi, mbavããpo myngyã. ²¹ Hesu ohẽ haivirã oho tẽnta Tiro hareka Sidon kyty. ²² Pẽnte taupe Canaanpe'ia, ñymboja Hesu ẽvãperã sapuke: Sheja, David tay, shyparekomĩteño! Shymemby taupe ĩmẽ'ẽ mbai poshy ipope, hareka mbypaveteitereshu. ²³ Tẽvã Hesu mba'ẽã heishu. Haipe mboireare ñymbojaherã heishu: Mondojy shara sapuke ou ñandaykue. ²⁴ Haipe Hesu hei: Tumpa rãnga shymboushu Judiore avisha rãĩmi kañiva heka verãi. ²⁵ Haipe taupe ĩñesu hỹnonderã heishu: Sheja shymborymitẽño. ²⁶ Hesu heishu: Porã rãnga jahekyshi sanjay houva ñamẽshu ñaumbare. ²⁷ Ko taupe heishu: Ãẽteite rereva Sheja. Kyrãtẽvã, ñaumba ho'uĩpojy timbiu ijare ñymesaivi oava. ²⁸ Haipe Hesu heishu: Nde hai taupe tivisha rirojava! Tiko nde ripotava rãĩmi. Haipe raveĩ memby taupe kuera. ²⁹ Hesu õhẽ haivirã hasa Galileape yyvasu hymbeypi. Jupi pẽnte yvy vate õrerã haipe vapy. ³⁰ Heta hai ẽvãpe ouva, raha reta japava, heshamba kũvãipia, vevejyĩ vatava, ña'ẽnguva, opa kuruva hareka ñymbairasyva. Ñono reta Hesu hỹnonderã mynguerashu reta. ³¹ Opavare hairã hesha marãra ña'enguva injetajy, opa kuruva kuera, japava vatajy kavi hareka heshajymba heshajy kũvaipi, õñepyrõ omombaishu reta Tumpa Israel Ija. ³² Hesu hẽnoshu mboirea retarã heishu: Aparekony ko kuaretare, mbahapy arama japo ẽẽ ai hãndiare, hãrã mba'ety mãĩnunga hou verãre. Potã ñymbahy ryheve amondo jyshu reta hẽntape, mãhe pehupi mamano jyrekui. ³³ Hãrã mboireare heishu: Mãĩvirapo ñavãhẽshu mãĩnunga ñamyngarupy verã ko kuaretare, mba'ety rãnga ikova koipi? ³⁴ Hesu pyrãndushu reta: Mbovy pãhãra ĩmepyre? Haire heishu: (7) pãhã hareka mbovy pira. ³⁵ Haipe Hesu opava retape mbyvapyka yvype, ³⁶ hãrã 7 pãhã hareka pira, jurure Tumpa ohovasa verã. Haivi pysẽã mẽẽ mboirea retape, haire memẽeshu opavape. ³⁷ Opa karu hareka hỹvãnta reta, haivi (7) kanata mãrẽyva mỹñyhejy hemby vekuaivi. ³⁸ Haipe karuva reta rãnga (4000) kuimbaire, papahamba ryheve taupe hareka sanjay reta. ³⁹ Haipe Hesu opa jy mondo reta hẽntape, jupi kanoa perã oho tẽnta Magadan (Magdala) kyty.