Hesu mỹnguera pẽnte kuimbai oarãvãĩ heshamba kũvãipia. ¹ heshamba kũvãĩpia. Hesu hasa oho tẽntaipirã, hesha pẽnte kuimbai oarãvãĩ ² Mboireare pyrãndushu Hesu: Pyrỹmboi'ia, mãrã'ĩrãra ko kuimbai oarãvãĩ heshãã kũvãĩpi? Tuure mbai porãmba japo jyrerãra, ti ha ei mbai porãmba japo irãra? ³ Hesu heishu reta: Hã ẽã hai hareka tuure mbai porãmba japo jyrerã; ko kuimbai kỹrã oava rupii Ñanderu Tumpa heshakapo mbaikavi heshaha verã ñymbaikatukuepe. ⁴ Kõĩ terirã ajapo ñõĩpo shymbou vekua potava; shara vãhẽpo pỹntu verãpe, hãrã mbavẽã mapo mba'apo. ⁵ Ãime teri ãĩ ko yvy ĩãrẽrã, she hai sapeva kuaretare pevãrã. ⁶ Hesu opa hei kovarã myndyvy yvype, japo tuju hỹndajype, haivi heshamba kũvãĩpia hesare ñonoshu. ⁷ Haipe heishu: Ekua jyvaheshi yy noovã Siloepe (he'iseva: “Jokuehava”). Heshamba kũvãĩpia oho jyvahe, hãrã oujyrã heshajy kũvãĩpi. ⁸ Hãrã hẽnta juri õre, hareka heshã teri jyrã, hesha vekuare hei jyre ijupi: Hã ẽãra ko kuimbai vapy ĩrã haipi hasavare jururetẽ ishu vekua kyrypoti? ⁹ Hãmã ĩmẽ'ẽ heiva: Hai rãnga. Ĩrũre hei jyve: Ha'ẽã rãnga, ova vekuai rãnga. Kuimbai heshamba i kũvãĩpi vekua hei: Hai rãnga she. ¹⁰ Haipe pyrãndu jyreshu voka kuimbai heshamba kũvãĩpi vekua: Mãrãira ã'ẽ ryheshajy kũvãĩpi? ¹¹ Voka kuimbai heishu: Ko kuimbai Hesu he'iashua rãnga japo tujurã ñono shy resare. Hãrã heishe: “Ekua yy noovã Siloepe jyvahe.” Aha aivaherã haipe ravĩ aheshajy kũvãĩpi. ¹² Haivi pyrãndu jyreshu: Mapera ĩmẽ'ẽ voka kuimbai? Hãmã heshamba i kũvãĩpi vekua heishu reta: Aikuãã rãnga. ¹³ Haivi raha reta arykai heshamba kũvãĩpi vekua Fariseore ẽvãpe. ¹⁴ Putu uava jy arape Hesu japo voka tuju, hãrã mynguera heshamba kũvãĩpia. ¹⁵ Hai rehe Fariseore pyrãndu jyshu voka kuimbai heshamba kũvãĩpi vekua: Mãrãra ryheshajy? Hai heishu reta: Hesu ñono tuju shy resare, haivi aivaherã; ã'ẽ aheshajy kũvãĩpi. ¹⁶ Haipe ĩmẽ'ẽ Fariseore heiva: Ko kuimbai kỹrã japo vekua ouã Ñanderu Tumpaivi, shara mbyharuã putu'uava jy ara. Tẽvã ĩrũre hei jyve: Mãrãrapo japo kova mbaikavi heshaha verã, hai mbai porãmba japo iarã? Hairehe pẽnte ñẽẽpẽã ñynõĩrã opa jyvavy reta. ¹⁷ Hãrã pyrãndu jyshu reta heshamba kũvãĩpi vekua: Hãmera nde mbaiva rere jyvehe kuimbai nymby heshakajy vekua? Hai hei: She haihe,Tumpa ĩñẽẽ mbeu'ia Ñanderu Tumpa mbouva. ¹⁸ Tẽvã Judiore rojã jyre kuimbai heshamba kũvãĩpia hareka ã'ẽ kueramava. Koñema hea hẽnoka reta myngueraha vekua tuu hareka ishy. ¹⁹ Hãrã pyrãndushu reta: Haira kova kuimbai pyndijapo, pee pere heva oa rãvãĩ heshamba kũvãĩpia? Mãrãira ã'ẽ heshajy? ²⁰ Ko kuimbai tuu hareka ishy hei: Kuaaha rãnga hai ĩrĩjaporã; hareka oarãvãĩ heshã kũvãĩpi. ²¹ Tẽvã, kuahã mãrãra ã'ẽ heshajy. Haereka mbavara mynguera. Pypyrãndushupe; hai rãnga sanjay veama hareka katuma ĩnjeta ijehe. ²² Ko kuimbai tuu kỹrã hei kyje irã, shara Judiore iñiñono mãĩmba pẽnte ñẽẽpe, mohẽ verã Sinagogaivi ĩmẽ'ẽ heiva Hesu haiva Kristo. ²³ Vokava rehe kuimbai tuu hareka ishy hei: “Pypyrãndushupe, sanjayvẽãma rãnga.” ²⁴ Haivi hẽnojy reta kuimbai heshamba kũvãĩpi vekuarã, heishu: Ñanderu Tumpa hỹnonde mbeu ãñẽteva; ore kuaaha voka kuimbai hai heko porãmbavarã. ²⁵ Tẽvã hai heishu reta: She aikuãã voka kuimbai haira heko porãmba ia ti ha'ẽãra. Pẽnte mba ẽĩ koñei she aikuaa: She aheshã kũvãĩpi tẽvã ã'ẽ ahesha jyma. ²⁶ Hãmã hykũãĩ pyrãndu jyshu reta: Mbaivara japo ndyrehe? Mãrãra mynguera ndyresa? ²⁷ Ko kuimbai heshamba kũvãĩpi vekua heishu reta: Hetama rãnga ãmbeu peje tẽvã shy rojãpi; Mbai verãra pipota hykuãĩ ãmbeujy pee? Potarã iko jyve pyhevi hai mboire verã? ²⁸ Haipe poshy jyrerã heishu: Nde rãnga pokui voka kuimbai mboire verã, Moise mboire vekua rãnga ore. ²⁹ Ore kuaaha Moise Ñanderu Tumpa ĩnjetashurã; tẽvã voka kuimbai kuaahã mãĩvira ou. ³⁰ Haipe ko kuimbai heishu reta: Mãrãpijy akorã! Pee pikũã mãĩvira ou, tẽvã she shy mynguera. ³¹ Jaikuaa rãnga Ñanderu Tumpa hẽnduãshu mbai porãmba japo iaretarã; koñẽĩ hẽndushu jyrojahea, hareka ĩñẽẽ japoshuva. ³² Mãpeã rãnga hẽnduha mbava mynguera, pẽnte kuimbai oarãvãĩ heshamba kũvãĩpiva. ³³ Ko kuimbai ouã Ñanderu Tumpaivirã, mba'ẽã rãngapo japo. ³⁴ Haipe haire heishu: Nde rearãvãĩ nytynyhẽ vẽkua mbai porãmbava. Potarã rei ỹrỹmboi rẽĩ? Hãrã mõhẽshu reta Sinagogaivi. ³⁵ Hesu kuaama ko kuimbai heshamba i kũvãĩpia vekua mõhẽã Sinagogaivirã; hesharã heishu: Rirojarahe Ñanderu Tumpa tay? ³⁶ Ko kuimbai heishu Hesu: Karai, mbeushe mbavara hai, airojahe verã. ³⁷ Hesu heishu: Ryheshama rãngashuje. She rãnga hai, rĩnjeta rẽĩ hãndiva. ³⁸ Haipe ko kuimbai hỹnypyã jatyka Hesu hỹnonderã heishu: Airoja ndyrehe, Shi ija. ³⁹ Haivi Hesu heishu: She ai, ko yvy ĩãrẽ kuaretare hesha ijehe verã mbai porãmba japo vekua; heshamba i kũvãipiare hesha jy verã, hareka hesha iare hesha veama verã kũvãĩpi. ⁴⁰ Fariseore haipe ẽ hãndivare, hẽndurã pyrãndushu Hesu: Orera ha ẽĩ jyve heshamba kũvãĩpia? ⁴¹ Hesu heishu reta: Pee hai jyve heshamba kũvãĩpiarã, mba'etytẽ pyre verã mbai porãmba vekua. Tẽvã pere pyheshapiarã, oapo pẽãrẽ mbai porãmba pijapo vekua.