Ñẽẽ ñymyhã'ãnga avisha ñyngareko ihea ryheva. ¹ Haivi Hesu hei: Ãñetẽĩte hai pee: Ichemba avishare jykora hõcheipi, ỹngaipi icheva, voka hai manarõ'ia. Haivi Hesu hei: Ãñetẽĩte hai pee: Ichemba avishare jykora ² Hãrã õncheipi icheva katy voka hai ãñẽtẽĩte avishare ñyngarekova. ³ Hãmã õnche ñyngarekova peashu iche verã avisha ñyngarekova, haivi hai hẽno pepẽnteĩ heepe, hãrã avishare kuajyveshu reta ĩñẽẽ. Hãmã hai nohẽ koraivi. ⁴ Hãmã nohẽma katuape jy avisha retarã, hỹnonderã ohoshu, hãrã avishare oho haykue shara kuaa reta ĩñẽẽ. ⁵ Tẽvã kuambare haykue ohoãpo, opãĩpo ñyvãhẽ shi reta, shara kuãã shi ĩñẽẽ. ⁶ Kỹrã Hesu ĩnjetashu reta ko ñẽẽ ñymyhã'ãnga rupii, tẽvã haire kuãã mbaivara he'ise. ⁷ Haipe Hesu hykuãĩ hei jyshu reta: Ãñẽtevape haijy pee: She hai õnche avishare iche õĩpi. ⁸ Opaite ñỹtynonde shyhevi vekuare haireta rãnga mãnarõ, hareka heko porãmba iare; hãme rãnga avishare ñẽẽ hẽnduãshu reta. ⁹ She hai õche; she rupii icheva, oho jepepo. Hãrã hãĩpo ko avishare rãĩmi, iche hareka õhẽ koraivirã hou verã vãhẽshua. ¹⁰ Mãnãrõ ia koñeĩ ou mãnãrõ verã, puruka, hareka pyrỹmambai verã; tẽvã she ai avishare amyngove verã, hareka ãmẽ verã tykove opambava. ¹¹ hai avishare ñyngarekova pya kaviva. Hãrã ko avishare ñyngarekova pya kaviva mẽẽpo hykove jy avishare. ¹² Hãrã hepy mẽ ẽãshurã rehẽĩ mba'apova, tẽvã heshama ou avara vasurã, hejarã ñyvãhẽ shi, shara ha'ẽã hai avishare ñyngarekova, hareka humbare. Haipe avara vasu opa mõmõhe voka avishare. ¹³ Hãrã ko kuimbai ñyvãhẽ shara kyrypoti rehẽĩ mba'apo. Hãrã mba'ẽãshu hai voka avishare. ¹⁴ She hai avishare ñyngarekova pya kaviva. ¹⁵ Sheru shykuaa kavi, hãrã she aikuaa kavi jyveshu Sheru. Kỹrãĩ aikuaa kavi jyve shy avishare; hãrã haire shykua kavi jyve. She ãmẽẽpo shy rykove shy avishare. ¹⁶ Ĩmẽĩ are jyve ỹnga avishare haimba kova korape õre, vokavare opapo aru jyvekui. Hãrã haire japo verã jyve shiñẽẽ. Hãrã ĩmẽpo ẽ pẽnte jaty vasu vapẽĩ, hareka koñẽĩ pẽnte avishare ñyngarekova. ¹⁷ Sheru rãnga shy raihu: Shara amẽẽ shy rykove, haivi apysy jy verã. ¹⁸ Mba'ety heky shy heviva shy rykove. Sheii ãmẽẽ jyvẽrã. Shara shijuhuvi ãmẽẽ hareka apysyjy verã. Kỹrã heishe Sheru ajapo verã. ¹⁹ Judiore hẽndu vokavãrã pẽnte ñẽẽva pẽã ñynõĩ jyreta. ²⁰ Heta ẽ haire heiva: Mãrã'ĩrãra pyhẽndushu? Ko mbai poshy ĩmẽrea, hareka kuakuamba ia. ²¹ Tẽvã ĩrũ reta hei: Mba'ety mbai poshy ĩmẽrea kỹrã ĩnjetava. Mbai poshy ĩmẽrea mynguerãpo pẽnte heshamba kũvãĩpia. ²² Ro y irã Hesu oho Jerusalenpe, iko arete ñymymandua tupao mẽ ẽãjy py ahurã ryheva Ñanderu Tumpape. ²³ Hesu vata i tupao juri, õche Salomon he'iashua õĩpi. ²⁴ Haivi Judiore opa jerehe Hesu, hãrã pyrãndushu reta: Mbai peve rapo kỹrã yryre kuaa kavimba mbavara nde? Nde hai Kristorã mbeu kavi ore. ²⁵ Hesu heishu reta: Ãmbeuma rãnga pee, tẽvã shy rojãpi. Opa mbaikavi heshaha verã she ajapo Sheru ñymbaikatu rupii, hãrã vokava rupii shy kuaaha mbavara she. ²⁶ Tẽvã pee pyrojãã, shara ha'ẽã pee shy avishare ryhevarã, je hai peeva rãĩmi. ²⁷ Shy avishare kuaa shiñẽẽ, hãrã she aikuaashu retarã, haire ou shaykue. ²⁸ She ãmẽẽshu reta tykove opamba verã; hareka mbairãmba õñehũndi verã, hãrã mbavẽãpo heky shepoivi. ²⁹ Sheru ñymbaikatuveva, mẽẽ she vokava. Hãrã mba'ety ỹngare hekyshi verã ipoivi. ³⁰ She hareka Teru, yrỹ pẽnteĩ. ³¹ Haipe Judiore heky ita japishu verãre Hesu. ³² Tẽvã Hesu heishu reta: Heta mbaikavi ajapo pyny nonde Sheru ñymbaikatu rupii. Mãrãvãĩte rehera pota itapeshukapi? ³³ Judiore heishu: Ndukahãpo itape mbaikavi rijapo vekua rehe, rĩnjeta porã reheĩ rãnga Ñanderu Tumpare. Kuimba'ẽĩ rãnga nde, tẽvã rijijapori Ñanderu Tumpa rãĩmi. ³⁴ Haipe Hesu heishu reta: Pyndy kuatiape ẽ Ñanderu Tumpa heirã vekua: Pee rãnga Ñanderu Tumpare! ³⁵ Jaikuaa Ñanderu Tumpa kuatia ĩñẽẽpy heiva, katumba mbairã ñambijicheva; Ñanderu Tumpa rãnga mbyhee tumpare, opaite ĩñẽẽ roja vekuare. ³⁶ Ñanderu Tumpa shy pyhỹrõ hãrã shymbou yvy ĩãrẽ: Mãrã'ĩrãra akuarã pere, she ãĩjeta porãmba hea Ñanderu Tumpare, she haije “She haiva Ñanderu Tumpa Tay rehera.” ³⁷ Hãmã Sheru mbai japova ajapoãrã, avy shyrojapi. ³⁸ Tẽvã ajapo shy rojambatẽ piva, pyroja mbaikavi ajapova. Pikuaa kavi verã Sheru ĩmẽ'ẽ she ndie, hãrã she ãĩmẽ ãĩ hãndi. ³⁹ Hykuãĩ pota raha mbypereso jyre, tẽvã Hesu õhẽshi reta haire pãũvi. ⁴⁰ Haivi Hesu ohojy yy syryva Jordan hyvaisho kyty, Juan Bautista pỹrỹ mỹngarai vekuape. Hãrã haipe pyta. ⁴¹ Heta kuaretare oho hai ẽvãpe, hãrã hei jyre: Juan mbaikavi heshaha verã japombatẽ haiva, tẽvã ãñẽte heihe vekua ko kuimbai. ⁴² Hãrã kuaretare heta ẽ jyrojahe vekua Hesu.