Lazaro manorã vẽkua. ¹ Ĩmẽnda'ẽ pẽnte kuimbai Betaniape'õ ñymbairasyva Lazaro he'iashua, hĩndyre Maria hareka Marta hẽntape. Ĩmẽnda'ẽ pẽnte kuimbai Betaniape'õ ñymbairasyva Lazaro ² Voka Maria, Lazaro hĩndy, haimba mbai pisheka ñõhẽ vẽkua Hesu ipyre, hareka ñãka haapy johejy vekua. ³ Haipe hĩndy mõkue'iare he'ikashu reta Hesu: Yreja, ni'ĩrũ ryhaihuva rãnga ñymbairasy'ẽ. ⁴ Hesu vokava hẽndurã hei: Ko mbairasy ha'ẽã rãnga opa verã ñymãnope; Ñanderu Tumpa pyrãtãkue heshaka verãĩ rãnga, ko Lazaro ñymbairasykue rupii Ñanderu Tumpa heshakapokui tay mbai vasuveva. ⁵ Hesu haihu Marta, Maria hareka Lazaro. ⁶ Hesu hẽndutẽ Lazaro ñymbairasyva, pyta veejy mõkue ara hai ẽvãpe. ⁷ Mbahapy arajyape Hesu heishu mboireare: Jahajy Judeape. ⁸ Haipe mboireare heishu: Pyrỹmboi'ia, ka'ãmẽĩ rãnga haipe'õ Judiore ndyreka jyre pota itape ndukarã, hãmera potama rehojy hai kyty? ⁹ Hesu heishu reta: Pẽnte ara rãnga ĩmẽre 12 ora. Kuareta arape vatava rãnga vapiã, shara kuarasy sapeshu. ¹⁰ Tẽvã pỹntuaipi vatava vapipo, shara mba'ety sapeva. ¹¹ Haivi Hesu heishu reta: Ñani'ĩrũ Lazaro rãnga ochema'ẽ, tẽvã ahapo ãmomba. ¹² Haipe mboireare heishu: Yreja, Lazaro ochẽĩ'ẽrãmẽãra he'ise kuera verã. ¹³ Hesu rãnga he'ise Lazaro manomava, tẽvã mboireare kuãã reta mõãtẽ ochẽĩ'ẽshurã. ¹⁴ Haivi Hesu mbeu kavishu reta: Lazaro rãnga manoma. ¹⁵ She avya'ãĩ, ãimeã haiperã, shara haikavive pee pevarã, piroja shyrehe verã. Tẽvã jaha ñamaĩhẽ. ¹⁶ Haipe Tomas, mbyheavajy “Mõkuepya” heishu hapishare: “Jahave ñamano hãndi verã ko pyrỹmboi'ia”. ¹⁷ Hesu vãhẽ tẽnta Betaniaperã, mbe'uashu ũrũndy arama hasava Lazaro ñõtỹava. ¹⁸ Betania mbyryã'ẽshi Jerusalen, mbahapy kilometroipi, ¹⁹ heta Judiore oho Marta hareka Maria hẽntape, jaheo hãndi verãre jykyvy manoshirã. ²⁰ Marta hẽnduma Hesu vãhẽ ourã, õhẽ hỹvãĩtishu, tẽvã Maria hoo'ipẽĩ ĩmẽhai. ²¹ Haipe Marta heishu Hesu: Yreja, kope rĩmẽrẽirã, shy kyvy manomba tẽvẽrã. ²² Tẽvã Ñanderu Tumpa mẽẽñoĩpo ndekui rirureshuva, vokava she aikuaa kavi. ²³ Hesu heishu: Ndykyvy hekove jypokui. ²⁴ Marta heishu Hesu: She rãnga aikuaa, manovare kuerajy verã, tẽvã vokava ikopokui ara japyape. ²⁵ Haipe Hesu heishu Marta: She hai manovare mynguerajy'ia, hareka tykove mẽẽva . Shyrehe jyrojava, ajemãĩpo mano kuerajyñoĩpo. ²⁶ Hãrã opaite hykove teri'iare jyroja shyreheva, opa ara pevarãpo mano. Ndera ryroja kova mbai? ²⁷ Marta heishu Hesu: Kỹrãĩte, Sheja. Aroja nde haiva Kristo, Ñanderu Tumpa Tay ou verã aryyka'e ko yvy ĩãrẽ. Hesu jaheo Lazaro ñotyhã vẽkuape hynonde ²⁸ Haivi Hesu kova mbai opa heirã, Marta oho hẽno kypy Maria, ñemiãpẽĩ heishu: Pyrỹmboi'ia vãhẽma ou kope, hai nyrẽnokaje. ²⁹ Maria hẽndu vokavarã pũã oho Hesu ẽvãpe. ³⁰ Hesu icheãmba teri Betaniape, ĩmẽimba teri'ẽ Marta hỹvaĩtishu vekuape. ³¹ Judiore haipe'ẽ hãndiare hẽntape, heshama Maria õhẽ ohorã opa jyraha jyve hipi, mõãtẽ tã'õvẽ ẽvãpe oho jaheorã. ³² Maria vãhẽma oho Hesu ẽvãperã, ĩñesu hỹnonderã heishu: Yreja, kope rĩmerẽĩrã shykyvy Lazaro mano mbatẽ verã. ³³ Hesu hesha Maria hareka Judiore ou hãndiare jaheo jyrerã, paveteshu hãrã mbyvy'ã jyve. ³⁴ Hãrã Hesu pyrãndushu reta: Mãpera piñoty? Haire hei: Yreja, ei mãĩhe. ³⁵ Haipe Hesu jaheo. ³⁶ Hãrã Judiore hei: Pyheshara marãra haihumbashu. ³⁷ Tẽvã ĩmẽ'ẽ heiva: Hai rãnga mynguera'i heshamba kũvãĩpiare, mba'ẽãngamba katu japo Lazaro manomba verã? ³⁸ Hesu jaheo ryheve ñymboja ita jo'oa vekuape, Lazaro hetekue ẽvãpe, vokava hõche ita vasukuepy mbotyha. ³⁹ Hesu hei: Pymbysyryshi mbotyhapya! Marta, Lazaro hĩndy heishu Hesu: Yreja, ĩnẽma rãnga ãmo'ẽ shara ũrũndy arama hasa manova. ⁴⁰ Hesu heishu: She rãnga haindeje'i, ryrojarã ryhesha verã Ñanderu Tumpa pyrãtãkue! ⁴¹ Hãrã mbysyry reta ita vasukue mbotyhapya. Hesu vate mãĩrã hei: Sheru, avy'aite ãĩ shara nde shyrẽndu. ⁴² She aikuaa shyrẽnduñõĩrã, tẽvã kova kuaretare rehe kyrã hainde, roja verãre nde hai shymbouvarã. ⁴³ Opama kyrã heirã hỹnatu sapuke: Lazaro, ẽhẽ katuape! ⁴⁴ Hãrã Lazaro õhẽ ita jo'oha vekuaivi, ipo hareka ipy mamahãpya ryheve, hãndi hova mbaso'iapya savana tĩĩ vẽkua. Hesu heishu reta: Opa pijorashi mamahãpy vekua, pymã'ẽĩhe tohojy. ⁴⁵ Heta Judiovare ou mi'ĩrũ vẽkuare Maria heshama Hesu japovarã, jyroja jyehe reta. ⁴⁶ Tẽvã a'ãmore jyraha Fariseore ẽvãpe, mbeushu reta Hesu japo vekua. ⁴⁷ Haipe Fariseo hareka pai ruvishare ñymbaty hãndi mburuvisha retarã hei: Mbaivara jajapopo? Ko kuimbai rãnga heta mbaikavi heshaha verã japo. ⁴⁸ Ñama'ẽĩhe kyrãĩ'ẽ kovarã, opavapo jyrojahekui, hareka mburuvisha Romape'õre oupo mambaikui ñande tupao hareka ñanyrẽta. ⁴⁹ Tẽvã Caifas he'iashua, pai ruvisharã'õ vokava añope heishu reta: Pee rãnga mba'ẽã pikuaa? ⁵⁰ Pyheshããra, haikavivepopekui pẽnte kuimbai mano opava reherã, mãhẽ opaite tẽntape'iare jyvareahekui. ⁵¹ Caifas ijuhuvireĩã hei Ñanderu Tumpa mbykuaaka shara hai pai ruvisha vokava añope, hei Hesu manohe verã tẽnta Judiovare. ⁵² Hesu manorã ha'ẽã Judiova retaĩ mondojepe verã, ẽẽjyve opaite Ñanderu Tumpa jyrojaheare mbatyrã pẽnte ñẽẽpe ñono verã. ⁵³ Hãrã voka araivive, Judio juhuvishare pẽnte ñẽẽpẽĩ ñynoĩ juka verã Hesu. ⁵⁴ Hãrã Hesu vata veamã Judiore mbyteipi, koñẽĩ õhẽ Judeaivi hareka oho yvy ikoambaipi hyvache, tẽnta Efrain he'iashuape, haipe pyta hãndi mboireare. ⁵⁵ Vãhẽserima arete Pascua verãpe Judiore jy'arete, hãrã kuaretare heta ohova Jerusalenpe ñymyhẽvã areterã. ⁵⁶ Hãrã hekajyre Hesu, tupaope ĩmẽma ñynoĩrã pyrãndu jyre ijupe: Mãrãra pere, Hesu ourapovekui areterã? ⁵⁷ Fariseore hareka pai ruvishare heishu kuaretare: Ĩmẽ'ẽ Hesu heshavarã, tymbeu orekui pysyha verã.