Pẽnte taupe ñõhẽhe Hesu mbai pisheka kavi. ¹ Hãrã 6 aravape ndeiteri vãhẽ arete Pascua, Hesu oho Betaniape Lazaro hẽntape. Hãrã Lazaro Hesu mynguerajy Hãrã 6 aravape ndeiteri vãhẽ arete Pascua, Hesu oho manovare pãũvi. ² Haipe pynturã japo reta karuvasu Hesu heepe. Marta ñono'ẽ mẽsape hou verãre; haipe Lazaro vapy jyve karu hãndi verã Hesu. ³ Maria veru mbai pisheka kavi nardoivi japohava, hareka hepyva, Hesu ipyre kyty. Maria opa kytyherã ñãkahaapy mitĩnijy. Haipe oo ipe opa vyhasa mbai pishekakue. ⁴ Hãrã Judas Iscariote, Hesu mboireareva jyve, hareka pysyka'ẽshu verã hei: ⁵ Haikavitẽ verã ko mbai pisheka õvẽndeha 300 ara repykuerã; haivi pavete'iare mẽ'ẽhashu verã! ⁶ Tẽvã Judas japureii'i pota manduaheva pavete'iare, shara mãnarõserãmẽi. Shara hai kyrypoti mbatyhava hyru ñyngareko'ihearã, opaĩ ñomi ñonohapyva. ⁷ Haipe Hesu heishu Judas: Avy kyrã ereshu ko taupe! Shara hai kytyma shyrehe mbai pisheka kavi ara amanoma verãpe. ⁸ Kuareta pavetevare opa ara pikoñõĩpo hãndi, tẽvã she opa arããpo aiko pynypãũpe. ⁹ Heta'ẽ Judiore kuava Hesu Betaniape'ẽrã, jyraha haipe hesha verãre Hesu hareka jyve Lazaro, Hesu mynguerajy manovare pãũvi. ¹⁰ Haipe pai juhuvishare pẽnte ñẽẽpẽĩ ñynõĩ juka verã jyve Lazaro. ¹¹ Shara hai rupii heta Judiovare ohovẽãma haykue, shara Hesu haykue opa jyraha mbaikavi japo'irã. ¹² Pareejyrã, kuaretare jyraha tẽnta Jerusalenpe arete Pascua pevarãpe, haipe kuaa reta Hesu Jerusalen kyty oho'ijyverã. ¹³ Hãrã jasyja reta karãnday hoky jyraha hỹvãĩti verã Hesu hareka sapuke jyrerã hei: Yrỹmondojepeve, Ûrũtumpa! Tyma'ẽã kavihe Ñanderu Tumpa heepe ouva! Tyma'ẽã kavihe Israel juhuvisha vasu! ¹⁴ Hesu hesha pẽnte mbirikarã jupihe, Ñanderu Tumpa ĩñẽẽ mbyparahavape heiva rãĩmi: ¹⁵ Avy pykyje tẽnta Sionpe'õre! Pymãĩhe ouma punduruvisha vasu! Mbirikamire ou”. ¹⁶ Jypyiterã Hesu mboireare kũãã reta mbaivara he'ise kova jehu'õ. Tẽvã Hesu manorã hareka kuerajymarã, manduahe reta opaite kova mbai ikova Ñanderu Tumpa ĩñẽẽ mbyparahava heiva rãĩmi ikohe Hesu. ¹⁷ Opaite kuaretare Hesu ẽẽ hãndi vekuare, Lazaro hẽno hareka mynguerajyrã manovare pãũvi, haire opa mbeu heshava. ¹⁸ Hãrã kuaretare õhẽ hỹvãĩtishu reta Hesu, shara haire kuaa mbaikavi heshaha verã japo'irã. ¹⁹ Tẽvã Fariseore hei jyre ijupe: Pyheshara mba'ẽãny amopo katu jajapo. Pymãĩhe, mãrãra opa jyraha hipii reta! ²⁰ Jerusalenpe ohova kuaretare omombai verã Ñanderu Tumpa Pascua jy areterã, haire pãũpi jyre jyve Greciava. ²¹ Kovare ñymbojahe Felipe, hai jyve tẽnta Betsaidava, Galileape'õ, jurureshu reta: Pota rãnga heshahave Hesu. ²² Felipe oho mbeushu Andres, hãrã mõkuevea jyraha mbeushu Hesu. ²³ Hesu heishu reta: Vãhema ara kuaretare kuaa verã mbavara hai Kuareta tay rãĩmi ou vekua yvy ĩãrẽ. ²⁴ Ãñete hai pee, trigo hãỹ o'ã yvyperã hareka jaiãrã hẽñoã kyrãĩ pyta, tẽvã mbai rãỹ ñotyhãrã hareka jairã hẽñorã hetapo'ia. ²⁵ Hãrã ĩmẽ'ẽ kuaretare hykoveĩ haihuvevarã, hipityãpo tykove opambava tẽvã hykove haihumba hipitypokui tykove opambava. ²⁶ Hãrã ĩmẽ'ẽ pota ou shaykuevarã, tijapo she haiva. Mãĩpi she ãĩme'ãĩvãpe, haipepo ĩme'ẽjyve shyryhevare, hãrã Sheru omombai vasuposhukui. ²⁷ Ã'ẽ ajepy'apy ãĩ. Mbaivarapo haivejykui? hairapo: “Sheru mbyhasa shyhevi ko vyamba vekua?” Ha'ẽrãveara she ai ajapo verã Sheru potava. ²⁸ Koñeĩpo haishu: “Sheru, heshakashu kuaretare nymbaikatukue”. Haipe ñyhẽndu ñẽẽ vate araivi heiva: Aheshakama rãnga shymbaikatukue, tẽvã hykuaĩpo aheshakajy. ²⁹ Haipi'iare hẽnduva heireta hy'apuva rãnga, tẽvã ĩmẽ'ẽjy heiva: Tumpa jokueva rãnga ĩnjetashu Hesu. ³⁰ Hesu heishu reta: Ha'ẽã kova ñẽẽ she pevarã ĩñendukava, koñẽi pee pevarã. ³¹ Ã'ẽ kuaretare yvy ĩãrẽ'õ jaheapohekui, Ãña ruvisha ko yvy ĩãrẽ'õ mohẽãpokui katuape. ³² Tẽvã kurusure shurupihamarã, opajypo aru shijupekui jyroja shyrehe verã. ³³ Kỹrã Hesu mbeu kavishu reta marãrapo mano kurusure. ³⁴ Hãrã kuaretare heishu: Ore rãnga hẽnduha Ñanderu Tumpa jykuatiape hei Kristo hykove japymba verã. Mãrã'ĩrãra rere Kuareta tay rãĩmi ou vekua yvy ĩãrẽ hupiha verã kurusure? Akuarã mbavara Kuareta tay rãĩmi ou vekua yvy ĩãrẽ? ³⁵ Hesu heishu reta: She aiko teripo asape pynymbytepe, tẽvã kỹỹvẽãmapo. Pyvata pyreko teri kova sape'õrã, mãhẽ pyndysapyakui timimbiva; shara timimbivape ikovare kũãã mãĩpirapo oho. ³⁶ Ĩmẽteri ẽẽ pynymbytepe sape'õrã pirojahese, hai ryhevare iko pyndyhevi verã. Hesu opa kyrã heirã, haire mbyteivi ñemirã ohoshi reta. ³⁷ Hesu heta mbaikavi heshaha verã japo Judiore hỹnonde, haire heshatẽvã jyrojãhe. ³⁸ Kỹrã jehu iko verã Tumpa ĩñẽẽ mbeu'ia Isaias mbypara vekuape: Sheja, mbavara roja ñambeuva? Mbavapera ryheshaka nymbaikatukue? ³⁹ Hãrã kuaretare katuã roja, shara Isaias kyrã mbyparajy verã. ⁴⁰ Ñanderu Tumpa opa mỹhãvẽshi hesare hareka pya mytãtashi reta. Mahẽ hesha retakui hareka kuaa reta pyaperã, jyroja shyreherã oujy retakui shykoty, amỹnguera verãre. ⁴¹ Isaias kỹrã mbypara shara hesha Hesu himbipekue, hãrã kyrã ĩnjetahe. ⁴² Kỹrãtẽvã, heta Judio jyroja jyvehe Hesu, hareka huvishavare, tẽvã mbe'uãrãmeĩ opavare hỹnonde shara Fariseo retaivi kyje jyre, potãã mõhẽshu reta Sinagogaivirã. ⁴³ Haire japoveshu kuaretare heivarã, japoã reta mbaikavi Ñanderu Tumpaivi ouva. ⁴⁴ Hesu hỹnãtu ĩnjetarã hei: Shyrehe jyrojava, jyroja jyvehe Sheru. Hai rãnga shymbou vekua. ⁴⁵ Hãrã shyreshava, hesha jyve shymbou vekua. ⁴⁶ She hai sapeva ko yvy ĩãrẽ, hãrã opaite shyrehe jyrojava ikovẽãmapo timimbivape. ⁴⁷ Ĩmẽ'ẽ shiñẽẽ hẽndutẽvã japombavarã, sheeãpo ajahehekui. Shara she aĩã ko yvy ĩãrẽ ajahehe verã kuaretare, koñẽĩ she ai amondo jepeshu verãre. ⁴⁸ Hãrã ĩmẽ'ẽ shiñẽẽ mbijicheva hareka japombavarã, ĩmẽmare jahehe verã. She hai vekuapo jahehekui ara japyape vãhẽmarã. ⁴⁹ She shijuhuvĩi rẽĩã ãĩnjeta, Sheru shymbou vekua rãnga mbeushe mbaivarapo apyrymboihe. ⁵⁰ She aikuaa Sheru ĩñẽẽ potava hai tykove opamba pevarã. Hãrã opaite she haiva, Sheru heisheva rãĩmi ambeupe.