Hesu johe mboireare ipy. ¹ Arete Pascua serima'ẽvã, Hesu kuaa vãhẽma jy'ara ko yvy ĩãre, haivi ohojy verã vate arapy Tuu ẽvãpe. Hesu Arete Pascua serima'ẽvã, Hesu kuaa vãhẽma jy'ara ko haihuñõĩtẽvã, hai mĩ'ĩrũre vekua ko yvy ĩãrẽ, hãrã heshakashu reta hai heko jyhaihuva ryheva. ² Haipe Hesu mboireare hãndi karuñynoĩvape, Ãña espiritukue Juda Iscariote pyapemare, Simon Iscariote tay, ityshu verã Hesu. ³ Hesu kuaa Ñanderu Tumpa mboushuva hareka hai ohojy verã Tuu ẽvãpe, shara opa mbai Tuu ñono ipope. ⁴ Hãrã karuma ñynoĩrã Hesu pũã mesaivi, jasoiva hekyrã, ijokuapy toalla. ⁵ Haivi ratonape yy ñonorã õñepyrõ johe mboireare ipy, hãrã toalla ijokua'ipya mitinijypy. ⁶ Simon Pedro ipy joheamapo'ẽrã hei: Sheja, haira rijoheposhe, shepy? ⁷ Hesu heishu Pedro: Ã'ẽ rikũããteri ajapova ãĩva tẽvã ndei rikuaa kavi. ⁸ Pedro hei: Añonoã rãngaponde rijoheshe verã shepy! Hesu heishu: Ajohẽãnderã, haivẽãmapo ndekui shyryheva. ⁹ Simon Pedro heishu: Sheja, akuarã avy shepyĩ joheshe, johe jyveshe shepo hareka shãka. ¹⁰ Tẽvã Hesu heishu: Hairãã opa jahuva koñeĩpo ipyĩ johe, shara hai kyaveama'ẽ. Hãrã pee pyndykyaveama, tẽvã ha'ẽã opaĩ kyamba'õ. ¹¹ Hesu kyrã hei: “ha'ẽã opaĩ kyamba'õ”, shara kuaa'ẽ mbavarapo pysykakui. ¹² Hesu opama mboireare ipy joheshurã mondejy mondeva ĩãrẽ'õ, haivi vapyjy mesaperã, heishu reta: Pikuaara mbaiverãra kyrã ajapo pyndyrehe? ¹³ Pee rãnga shymbyheepi “Pyrỹmboi'ia hareka Sheja”, haikavi rãnga kyrã pererã, shara haishe. ¹⁴ Hãrã she, Pyrỹmboi'ia, hareka Pindi Ija pepy ajoherã. Kỹrãpo pijohe jyve pijupe pepy. ¹⁵ She aheshaka pee ajapova, kỹrã pijapo verã jyve. ¹⁶ Ãñẽte hai pee katũã jokuehareva vateve'ẽshi jokuerea, hareka katũã mondohava vateve ẽshi mondokava. ¹⁷ Pikuaa kavi kovarã, hareka pijaporã pyvy'apokui. ¹⁸ Ha'ẽã she ãĩnjeta ãĩ pyndyreheva; shara she aikuaa mbava retara apyhỹrõ. Tẽvã iko ñõĩpo Ñanderu Tumpa jykuatiape heiva: “Karu'ẽ shendieva, ñymbyvaisho shyrehe”. ¹⁹ Ã'ẽvãĩ hai pee ndeiteri ikorã, ikomarã pyroja verã Sheñoĩva. ²⁰ Ãñẽte hai pee, ãmondova mỹvãhẽ kaviva, Shymỹvãhẽ jyve; hãrã Shymỹvãhẽva, mỹvãhẽ jyve shymbou vekua. ²¹ Kova opama heirã, Hesu pyape ñandu vyambavarã hei: Ãñete hai pee, pẽnte pynymbyte'õpo shypysykakui. ²² Haipe mboireare opa mãĩ ijehe, shara kuãã reta mbavara Hesu hei'ẽhe. ²³ Pẽnte mboirea Hesu haihuveva, vapy'ẽ jichere karu ñynõĩrã, ²⁴ hãrã Simon Pedro mỹhã'ãnga'ẽshu, pyrãndushu verã Hesu mbavara hei'ẽshu. ²⁵ Hãrã ko mboirea ñymbojaveherã pyrãndushu Hesu: Yreja, mbavarapokui? ²⁶ Hesu heishu: Ãmãkypo kova pãhã pysẽvẽ, hãrã ãmẽẽshua haipokui vokava. Haivi mãky pãhã pysẽvẽrã mẽẽshu Judas Iscariote, Simon tay. ²⁷ Hãrã Judas pãhã pysevẽ hekymarã, Ãña iche pyape. Haipe Hesu heishu: Ârẽ'ãĩte japo rijapo verã. ²⁸ Tẽvã haipe karu'ẽ hãndivare, mba'ety kuaava mãrã'ĩrãra kỹrã heishu. ²⁹ Judas rãnga kyrypoti hyru ñyngareko'ihearã, ĩmẽ'ẽ mõãte Hesu heishu oho ova verã mba'etyshuare Pascua pevarã, ti mẽẽshu verã mãĩnunga pavete'iare. ³⁰ Hãrã Judas pãhã pysevẽ opama hourã, õhẽ oho. Pyntumãĩmba. ³¹ Judas ohomãrã Hesu hei: Ã'ẽ she, Kuareta tay rãĩmi ai vekua ko yvy ĩãrẽ aheshakapo shymbaikatukue, hareka she rupii Ñanderu Tumpa heshakapo ñymbaikatukue. ³² Hãrã she aheshaka Ñanderu Tumpa ñymbaikatukuerã, Ñanderu Tumpa ñonopo jyve shyrehe mbaikatukue, hareka areãpo kỹrã japokui. ³³ Shyrayre, kỹvẽãmapo ãĩme'ãĩ pynymbytepe, shyrekapopikui, hãrã Judiore haishua rãĩmi ã'ẽ haijyve pee: Katũãpo peho, she aha verãpe. ³⁴ Aheja pee kova ñẽẽ py'ahuva japoha verã: Pijyhaihu. She apyryhaihuva rãĩmipo pijyhaihu jyve. ³⁵ Pijyhaihurã, opaite kuaretare heshapo pyndyrehe, pee haiva shyryhevare. ³⁶ Simón Pedro pyrãndushu Hesu: Sheja, mãtyrapo reho? Hesu heishu: She aha verãpe, katũãpo ã'ẽ shimi'ĩrũ; tẽvã ha'ereipo rei shĩmi'ĩrũkui. ³⁷ Haipe Pedro heishu: Sheja, mãrã'ĩrãra katũãpo ã'ẽ ãrĩmi'ĩrũ? She ãĩjyve ãmano ndyrehe verã. ³⁸ Hesu heishu: Ãñetera rere rymano shyrehe verã? Ãñetẽĩte hainde, ndeiteri uru ñẽẽrã, mbahapyjypo rerekui shykuambava.