Hesu rupii katu ñavãhẽ Tuu ẽvãpe. ¹ Avy pyvy'ããpi, pirojahe Ñanderu Tumpa hareka piroja jyve shyrehe. Avy pyvy'ããpi, pirojahe Ñanderu Tumpa hareka piroja ² Sheru hẽntape heta'ẽ pynyrẽndarã; kỹrããrã, ãmbe'ũãpo pee, hãrã ahapo ãmyhẽvã pee pẽĩ verãpe. ³ Haivi ahajymarã, opa kavima ãmyhẽvã pẽi verãperãpo aijy apyryrahakui, jaiko pãvẽĩ verã she aikovape. ⁴ Pee rãnga pikuaa matyrapo aha hareka pikuaajy vokava pe, peho verãpe. ⁵ Tomas heishu Hesu: Yreja, kuahãã rãnga matyrapo reho. Mãrãrapo kuaaha vokavape? ⁶ Hesu heishu: She hai vokava pee, añeteva hareka tykove. She rupii katu vãhẽhã Sheru ẽvãpe. ⁷ Shykuaapirã, pikuaapo jyveshu Sheru, hãrã ã'ẽvãĩ pikuamashu, shara pyheshapẽishu. ⁸ Haipe Felipe heishu: Yreja, ma'ẽĩhe tyheshahave Ñanderu, kyrãĩterã haikavimapo orekui. ⁹ Hesu heishu: Felipe, kuriãã rãnga aiko ai penendie, hãmerã nde'iave shykuaa? Shyreshava, heshama jyve Sheru. Mãrã'ĩrãra rereshe apyrymbyheshaka verã Sheru? ¹⁰ Ryrojããra Sheru hãndi pẽntevãĩ orerãme? Kova haipeva ha'ẽã shijuhuvii haiva, koñeĩ ajapo Sheru pota ajaposhuva. Hãrã She rupii hai japo pota japova. ¹¹ Shyrojapi Sheru hãndi pẽntevãĩ orevarã, hãrã pyrojãã she haivarã, ajapo vekuãĩ pyroja. ¹² Ãñete hai pee, jyroja shyreheva japopo jyvekui opa mãĩnũnga she ajapova, hareka hetaitevepo mãĩnũnga japokui, shara ahajypo Sheru ẽvãpe. ¹³ Hãrã opaite mãĩnunga shyreepe pirureva ãmẽẽpope; She rupii rojaha verã Sheru. ¹⁴ She amẽẽñoĩpope mãĩnunga shyreepe pirureva. ¹⁵ Shyraihupirã pijapopo she haipeva. ¹⁶ Hãrã airureposhukui Sheru mboupe verã, pynymbory verã vokava hai Espiritu Santo opa ara pinimi'ĩrũ verã. ¹⁷ Vokava Espiritu Santo haipo pynymboihekui mbai ãñẽteva, hãrã Ñanderu Tumpa jyrojambahea katuãpo ẽẽ hãndi, shara haire heshãã hareka kuãã. Tẽvã pee pikuashu shara hai ikoma penendie, hareka ikopokui pyndypyape. ¹⁸ Ha'ẽã apyryrejaite verã, aijypo aiko penendiekui. ¹⁹ Kõõima'ẽ, kuaretare shyreshaveama verãpe, tẽvã pee shyreshajypokui, shara amanoãpokui hãrã pee pymano'ãĩpo jyvekui. ²⁰ Voka arape pikuaapokui Sheru hãndi pẽntevãĩ orevarã, hãrã she ãĩjyve pyndyrehe hareka she ãĩpo jyve pyndypyape. ²¹ Hãrã shiñẽẽ hẽnduva hareka japova, vokava hai ãñete shyraihuva, shyraihuva Ñanderu Tumpa haihupo jyveshu, hãrã she ahaihupo jyve, hãmã aheshakaposhu marãvara she. ²² Haipe Judas heishu Hesu; (ha'ẽã Iscariote): Yreja, mãrã'ĩrãra oreĩpo rijeshaka'ore, hãmẽra kuaretare rijeshakããpo jyveshu? ²³ Hesu heishu: Shy raihuva japo she haiva, hãrã Sheru haihu poshu vokava, Sheru hareka She ouhapo ikoha hãndi. ²⁴ Tẽvã shy raihumba, japoã she haiva. Hãrã pee pyhẽndu pẽĩva ko ñẽẽ ha ẽa shiñẽẽ, Sheru shymbou vekua ĩñẽẽ rãnga. ²⁵ Opaite kova mbai ambeu ãĩ pee, ãĩmẽ teri ãĩ penendierã. ²⁶ Tẽvã Espiritu Santo Sheru shyreepe mbou verã hai pynymbory verã, pynymbo'epo hareka pynymymanduakahe verã opa mãĩnunga hai pee vekua. ²⁷ Ahajyma, ahejape pyavapy. Ãmẽẽ pee shypyavapy, ãmẽ'ẽãpe kuaretare mẽẽva rãĩmi. Avy pyvy'ããpẽĩ hareka avy pykyje. ²⁸ Pee rãnga shyrẽnduma, kuri haije ahajyrã hareka aijy aiko penendie verã. Pee añete shyraihurã pyvy'aĩpo, shara pikuama ahajypo Sheru ẽvãperã mbai vasuve shyheviva. ²⁹ Ãmbeu pee kova mbai ndeiteri jehurã, hãmerãpo pyrojakui ikomãrã. ³⁰ Hetaveamapo ãĩnjeta pee, shara vãhẽma ou Ãña ko yvy ĩãrẽ'õ ruvisha. Hai mbaivapẽã jepy shyrehe. ³¹ Tẽvã kỹrãpo kuaretare kuaa jyve she ahaihushuva Sheru, hareka ajaposhu hai heisheva. Pupũa, jaha koivi.