¹ Hesu hai uva jypy ãñeteva. ¹ Hesu heijyshu mboireare: She hai uva jypy ãñeteva, hãrã Sheru hai ñyngareko'ihea. ² Hãmã pẽnte shyrãnkarã'õ i'aarã, jasyjapo; tẽvã ia kavirã hãkamire jasysyjashi, hetave ia verã. ³ Pee rãnga pykyavẽãma, ko ñẽẽ ãĩnjetahepeva rupii. ⁴ Tãnta katu pẽĩ shyrehe, hãrã she kyrãmipo ãĩjyve pyndyrehe. Shara uva hãkakuerei katuãpo ia jypyre ẽãrã; kỹrã jyve pee peĩã shyreherã katuãpo pindi'ia jyve. ⁵ She hai uva jypy, hãrã pee hai shyrãkarã'õ. Hãrã ẽẽ shyreheva she ãijyveherã, hetapo ia; shara sheembape mba'ẽãpo pijapo. ⁶ Hãrã ẽmba shyreheva, mombohapo hãka jipiva rãimi, mbatyharã momboha verã tatape. ⁷ Pẽĩ katu jyve shyreherã, hareka shiñẽẽ pijapoñõĩrã, me'ẽãpo jyvepe pirure. ⁸ Sheru vate arapy'õ penmombaipo jyve, pee pindi'ia hetarã. Hãrã kỹrãvape ikopo pyndyhevi shyryheva ãñẽteva. ⁹ Sheru shyraihuva rãĩmi; apyryhaihu jyve, hãrã shyraihuñoĩpopi. ¹⁰ Opaite she haiva pijaporã, apyryhaihuñoĩpo, kyrã jyveshe Sheru heiva opa ajaposhurã hai shyraihu. ¹¹ Kỹrã she ãĩnjeta pee, She rãĩmi pyvya verã. ¹² Kova hai pijapo verã: She apyryhaihuva rãĩmipo, pijyhaihu jyve. ¹³ Jyhaihu tivishaveva ĩmẽrea rãnga hai, mẽẽva hykove ñi'ĩrũ retare. ¹⁴ Pee rãnga hai shi'ĩrũre, pijapo she hai peevarã. ¹⁵ She apyrymbyhee veamapo “jokuehareare”, shara jokueharea kuãã hai jukue'õ japova. She “shi'ĩrũrã” apyryre, shara opa ambeupe Sheru heishe vekuare. ¹⁶ Peeã shypyhỹrõpi, sheii rãnga apyrypyhỹrõ. She apyrỹmondo heta mbai pijapo verã hareka opareiimba ryheva. Kỹrãrã Sheru mẽẽpo pee opa mba'e shyreepe pirureshua. ¹⁷ Kova hai pijapo verã, hykũãĩ haijy pee: Pijyjaihu. ¹⁸ Kuaretare pyndyreshatãrã, pynymanduapohe sherãni shyreshatãã retarã. ¹⁹ Pee hai jyve haire rãĩmi iarã, kuaretare jyrojambare pyndyraihupo jyve, haire jyhaihuva rãĩmi. Pee rãnga pikoveama yvy ĩãrẽ õre jyrojambare ikova rãĩmi, shara she apyrỹnõhẽ haire pãũvi hãrã kuaretare pyndyreshatãã, shara pikoveama haire ikova rãĩmi. ²⁰ Pynymandua katuhe she hai pee vekua: “Mba'ety jokueharea vateve'ẽshia jokue'õ”. Hãrã kuaretare shyreshatãrã, pyndyreshatããñoĩpo jyve. Hãrã she haiva haire japorã, pee pereshuva japoñoĩpo jyve. ²¹ Opaite kova mbai piroja shyreherã kỹrãñoĩpo japo pyndyre reta, shara kuãã reta shymbou vekua. ²² Hãmã haire aĩã ãĩnjetashu retarã, mba'etytẽre verã mbai porãmbava. Tẽvã ã'ẽ katuveama heky ijuhuvi reta mbai porãmba vekua. ²³ Hãrã shyreshatamba'iare, Sheruave heshatãã jyve. ²⁴ She aĩã ajapo mbaikavi heshaha verã haire mbytepe mbavamba katu japovarã; mba'etytẽre verãre mbai porãmba vekua. Hãrã haire ajemãĩ heshatẽ reta kova mbai, tẽvã shyreshatãã jyre hareka jyve Sheru. ²⁵ Tẽvã kỹrã jehu shara ikoñoĩpo Ñanderu Tumpa jykuatiape heiva haire ĩmẽreva: “Mbaimbape shyreshatãã jyre”. ²⁶ Tẽvã oupokui Sheru õĩvi pynymbory verã, vokava hai Espiritu Santo ãñẽteva ryheva, hãrã hai ĩnjeta kavipo shyrehekui. ²⁷ Hãrã pee pĩnjeta kavipo jyve shyrehekui, shara õñepyrõãivive shimi'ĩrũpi.