¹ She hai pee kova mbai potã piroja kue pypoi shirã. ² Pymohẽã pokui Sinagogaivi, hareka vãhẽpo ara mbava pindi juka verã, mõate kyrã haikaviva japo Ñanderu Tumpa pevarã. ³ Haire kyrãpo japo kova mbai, shara kũã reta Sheru hareka jyve she. 4 She hai pee kova mbai iko verãre, pyny mandua he verã she ambeuma pee vekua. ⁵ Tẽvã ã'ẽ ahajypo shymbou vekua ẽvãpe, hareka mba'ety pẽẽva pyrãndu sheva matyrãpo aha. ⁶ Pynymby vy'ã rãnga jyve kova mbai, shee ambeuva rehe. ⁷ Tẽvã, ambeupo pee ko añeteva: Kaivivepo pee she aharã. She ahãrã katuapo ou pee pyny Mbory verã, She aharã ambou pokui pee Espitu Santo. ⁸ Espiritu Santo ourã heshakapo kuareta retape mbahapy mbai; pẽnte mbai, haire heko porãmba varã, hareka monkue mbai, heko kavi kapyryva; hãrã mbahapy mbai, mbavara Ñanderu Tumpa jahepo he reta. ⁹ Heshakaposhu reta heko porãmba, shara jyrojã shy rehe; ¹⁰ heshakaposhu reta mbaivara hai tykove kaviva kya mbava hape, she ahava rehe Sheru hẽtape, hãrã pee shy resha veapo; ¹¹ hairã heshakaposhu reta Ñanderu Tumpa ñimbivache, shara jaheama heva Ãña huvisha ko yvy ĩãrẽ. ¹² She areko teri heta mãĩ nunga hai pee verã, tẽvã, ã'ẽ kuatũã teripo pikua mbaivara he'ise. ¹³ Ko Espiritu Santo ourã katy, hai kuaaka po pee opa añeteva; ĩnjetãã po rehe yjyhevi rei, heipo jyve opaite hai hẽnduva hareka kuaaka po pee mãĩ nunga iko verã. ¹⁴ Haipo shee, she mombai vasu verã, shara pysypo voka mãĩ nunga sha ãpova, amẽẽshu verã hareka haipe kuaaka pee verã. ¹⁵ Opava voka Sheru ĩmereva sha ãpova jyve; hãrã hai pee voka Espiritu pysy verã sha ãpo vaivi hareka pyny mby kuaaka verã jyve pee. Mbai ñymbasy hekoviapojy vy'ape. ¹⁶ Kõõĩmapo, pee shy resha veapi verã, tẽvã kutymi jyapepo shyresha pi jykui. Shara she ahajypo Sheru ẽvãpe. ¹⁷ Haipe Hesu mboireare pyrãndu ijupe: ¿Mbaivara he'ise vokava? Hei rãnga ñande kõĩmapo jahesha veamashu verã, tẽvã kutymi jyape jahesha jyvẽrã. Shara hainda ohojypo Tuu ẽvãpe. ¹⁸ ¿Mbaivara he'ise “kõ õĩmapo”? Jaikũãã ny mbaiva rehera kyrã ĩnjeta. ¹⁹ Hesu kuaa haire pota pyrãndu jyreshuvarã, heishu reta: She rãnga hai peeje kuri, kõ õĩmapo jyresha vea piiva. Tẽvã kutymi jyapepo shy reshapi jy. ¿Haira vokava py pyrãndu pi pijupe? ²⁰ Ãñete rãnga hai pee, pijaheopo hareka pyvy ãpo pii, kuareta retany vy apo jyre. Pee pyvya mba tẽvara, pyvya mba vekua hykojapy verã hai vya. ²¹ Pente taupe memby potarã heta mby hasa asy, shara vãhẽma ara hasyshu verã. Tẽvã sanjay oa marã, mandua mba jy heva hasykue. Shara vy aite i veru pẽnte sanjay yvy ĩãrẽrã. ²² Kyrãĩ jyvepe ã'ẽ pyvya mba pẽĩva, tẽvã ai jyma apyry hesharã pyndy pya vy akueivi tynyhẽ pokui, pẽnte vya mbava mba katu heky pyndy heviva. ²³ Voka arape mbai veamapo pypy randu she kui, añeitevape hai pee pirure po Sherupe, hãrã mee po pee opava mãĩ nunga pirureshuva shy reepe. ²⁴ Ã'ẽ peve mba'ẽã teri pirure shy reepe; pirure hama meẽã pope pyny tynyhẽ verã vy a. ²⁵ Ñẽẽ ñymyhã ãngape rãnga ãĩnjeta hai pee ã'ẽ peve. Vãhẽ pokui ara ãñimi ñẽẽ veama pe verã ñẽẽ ñymyhã ãnga, ambeu kavi pe verãĩ rãnga Sheru ryheva. ²⁶ Voka arape pee pirure poshukui shy reepe; hãrã she ã'ẽã airure verã pyryrehe Sherupe, ²⁷ shara Sheru teiva pyndyraihu. Hai pyndyraihu pee shyraihu pirã hareka pyroja she aiva Ñanderu Tumpaivi. ²⁸ She ahẽ Sheru ẽvãĩvi hareka ai ko yvy ĩãrẽ, hãrã aheja pojy ko yvy haere ahajypo Sheru ẽvãpe. ²⁹ Haima mboireare heishu: Ã'ẽ rãnga rĩnjeta kavi rẽĩ, ñẽẽ ñymyhã ãnga mbape, hãrã kuaa kavima. ³⁰ Ã'ẽ heshahama opa mbai rikuava, hareka katumba mbava mbai pyrãndu ndeva. Hãrã rojaha reiva Ñanderu Tumpaivi. ³¹ Hesu heishu reta: Pyrojamara akuarã ã'ẽ? ³² v 32 Vãhẽma ara, ã'ẽ vãĩ opa pimomohẽ verã pẽpentẽĩ pyndy raperã kyty, hãrã shẽĩpo shyrejapi. Tẽvã, sheiã ãĩ shara Sheru ẽẽ she ndie. ³³ Hai pee opaite kova mãĩ nunga pyndy pya vapy verã piroja shy reherã. Hetapo hasa asy ko yvy ĩãrẽ, tẽvã, avy pykyje, she popema rãnga ẽ ko yvy.