Kova Hesu opa heishu mboirea retarã, mãĩ vate ararerã. ¹ Kova Hesu opa heishu mboirea retarã, mãĩ vate ararerã hei: Sheru, vãhẽma ara ryheshakashu verã kuaretare she Kova Hesu opa heishu mboirea retarã, mãĩ vate ararerã hai mbai vasuve hareka mbaikatukue ĩmẽrea. Hãrã she aheshakapo jyveshu reta nde hai mbai vasuva hareka mbaikatukue ĩmẽryrea. ² Nde rãnga opa riñono kuaretare ndy Ray ipope, mẽẽshu verã tykove opambava opaite jyrojaheare, hareka rymẽẽshu vekuare. ³ Kova rãnga hai tykove opambava; roja verãre nde haiva koñẽĩ õ Ñanderu Tumpa ãñẽteva hareka jyve Kristo, nde rymbou vekua. ⁴ She rãnga ãmbyheshaka kuaretare nde hai mbai vasuva hareka mbaikatukue ĩmẽrea, ko yvy ĩãrẽ shara opa ajapo nde rereva. ⁵ Ã'ẽ, Sheru, mẽẽjy she nde rẽĩvape hareka mbaikatu ĩmẽ are vekua ndei teri ko yvy ẽrã. ⁶ Opaite nde rỹmẽẽ she vekua kuaretare mbyteivi aikuaakashu reta mbavara nde. Na ãpova retãĩ rãnga rỹmẽẽshe, hãrã haire japo ni ñẽẽ. ⁷ Ã'ẽ haire kuaa opaite nde rỹmẽẽshe vekua, hai na ãpoarã. ⁸ She ambeushu reta ni ñẽẽ rikuaaka she vekua, hãrã haire roja. Kuaama reta ãñẽtẽĩte she aiva nde rẽĩvaivi, hareka roja reta nde shymbouva. ⁹ She airurehe nde jyroja ndy reheva rỹmẽẽ she vekuare, airureãhe nde kuaretare jyrojamba ndy rehevare, nde rỹmẽẽ sheva reta reheĩ airure, shara hai na ãpovare. ¹⁰ Opaite sha ãpova hai jyve na ãpova, hareka na ãpova sha ãpova jyve; haireta rupii heshaha she veteve ãĩvã. ¹¹ She rãnga ãĩme veamapo ãĩ ko yvy ĩãrẽ; tẽvã haire ĩmẽ teripo ẽ ko yvy ĩãrẽ, hãrã she ahapo nde rẽivape. Sheru heko kaviva, ñyngarekohe reta nymbaikatukuepy nde rỹmẽẽshe vekua, tijyhaihu reta ñande rãĩmi. ¹² She ãĩme'ãĩ hãndi reta ko yvy ĩãrẽrã, ãĩngarekohe ndy reepe nde rỹmẽẽ she vekuare, hareka ãmboryshu reta. Hãrã mba'ety hairetava kañy shyheviva, koñẽĩ pẽnte kañy, hekope kavi iko verã Ñanderu Tumpa ĩñẽẽpe heiva. ¹³ Ahamapo nde rẽĩvape, hãrã ambeu kova mbai ko yvy ĩãrẽivi ndei ãhẽrã, haire vy a verã jyve she avyava rãĩmi. ¹⁴ She rãnga ambeushu reta ni ñẽẽ, hãrã kuareta jyrojamba ndyrehevare heshatã reta. Shara haire ha'ẽã hai ko yvy ĩãrẽ õre, she rãĩmi ha'ẽã jyve kuaretare ryheva. ¹⁵ Airureã nde ryheky verãre ko yvy ĩãrẽivi, ñyngarekõĩhe shi reta mbai porãmbava. ¹⁶ She ha'ẽã ko yvy ĩãrẽ õ, hãrã haire ha e ãĩ jyve yvy ĩãrẽ õ. ¹⁷ Mby heko kavishu reta na ãpõrã; ni ñẽẽ ãñẽteva rupii. ¹⁸ Nde shymbouva rãĩmi kuaretare mbytepe, kỹrã she amondo jyveshu reta kuaretare mbytepe. ¹⁹ Haireta reheĩ rãnga ãñymby heko kavi, haire ñymby heko kavi verã jyve ni ñẽẽ ãñẽtevapy. ²⁰ Ha'ẽã kova retareĩ airure ndeva, airure jyvehe nde mbairã jyroja shy rehe verãre, hẽnduma haire mbeuvarã. ²¹ Airure he nde haire pẽnte pyapẽĩ ñynõĩ verã; tiñymy pẽnteĩ ñanendie reta, Sheru shyrehe nde rẽivã rãĩmi, hareka ndyrehe ãĩmeva rãĩmi. Kỹrã tõĩ reta pẽnte pyape, hãrãpo kuaretare roja nde shymbouva. ²² She ãmombaishu reta, nde she mombaiva rãĩmi, ñymy pẽnteĩ verãre ñande rãĩmi; nde hareka she. ²³ She ãĩhe reta, hãrã nde rẽi jyve shyrehe, kỹrã haire ñymy pẽnteĩ ijupii verãre, kỹrãrãpo kuaretare hesha hareka kuaa nde shymbouva, hãndi nde ryhaihushuare, shyraihuva rãĩmi. ²⁴ Sheru, nde rãnga rỹmẽẽshe, hãrã aipota haire ẽ jyve she ãĩ verãpe, hesha verãre nde she mombai vasuva nde iave teri ko yvy ẽrãvãĩ. ²⁵ Sheru heko kaviva, kuareta reta rãnga ndykuãã; tẽvã she arykuaa, hãrã kovare ã'ẽ kuaama nde shymbouva. ²⁶ She aikuaakashu reta mbavara nde, hareka aikuaakave teri poshu reta, ẽpy verãre jyhaihu; ñande jaijyhaihuva rãĩmi