Hesu raha mbyperesoha. ¹ Hesu opama ñymboirã, mboireare hãndi oho Cedron yy syryva hyvaisho kyty, haipe ẽ pẽnte ñana õmi, hãrã haipe Hesu opama ñymboirã, mboireare hãndi oho Cedron yy iche reta. ² Judas, pysyka ẽshu verã kuaa jyve vokava ñana õmi, Hesu mboireare hãndi ohose õpe. ³ Haipe Judas vãhẽ oho hãndi syndarore ñyrãrõse ia hareka tupaope ñyngareko õ, pai juhuvishare hareka fariseore mondova. Raha ijehe reta kyse pukuva hareka tata yvyrare myhẽndyava. ⁴ Hesu opama kuaa mbaivara ikopoherã, õhẽ hỹnonderã pyrãndushu: Mbavara pyhekapi? ⁵ Haire heishu: Hesu Nazarenova. Hesu heishu reta: She hai. Judas, Hesu pysykava haipe ĩmẽ'ẽ jyve hãndi reta. ⁶ Hesu “She hai”, heimarã, opa haykue syryrã, hareka kupe rovahe retarã oa yvyre. ⁷ Hesu hykuaĩ pyrãndu jyshu reta: Mbavara pyhekapi? Hãrã haire heishu: Hesu Nazarenova. ⁸ Hãrã Hesu heijyshu reta: She ãmbeuma rãnga pee, she hai. She shyrekapirã, pymaẽĩhe shyryhevare tohojy. ⁹ Vokava ikoma Hesu hei vekua: “Sheru mẽẽshe vekuare, pẽnteãpo kãñyshi.” ¹⁰ Haipema Simon Pedro kyse puku ĩmẽreva, nohẽrã jasyjashi Malco nambi jakata kyty õ, pai ruvisha jokuerea. ¹¹ Hesu heishu Pedro: Ñonojy ndykyse puku hyrupe. Ryrojãra ãẽteite ãĩme'ãĩ ahasa asy verã Sheru heisheva rãĩmi? ¹² Haivi syndarore juhuvisha hãndi, hareka syndaro tupao ñyngareko iheare pysy reta Hesu, hãrã pokuashu reta. ¹³ Haivi raha reta Hesu Anas hẽntape, shara Caifas hai hyvaja, haimba pai juhuvishare vokava ãñope. ¹⁴ Ko Caifas rãnga heimbashu Judio juhuvisha retape, haikavivepo pẽnteĩ kuimbai mano opava rehe. ¹⁵ Simón Pedro, hareka ĩrũ mbo eha reare hãndi oho Hesu haykue. Vokava mbo eharea ĩrũ kuamba jyve reta pai ruvisha vasu, hãrã iche hãndi Hesu pai ruvisha vasu ho ipe. ¹⁶ Tẽvã Pedro õchepeĩ ĩmẽ hai katuape. Haipe mbo eharea kuaava jyve pai ruvisha vasu, hãrã ĩnjeta hãndi taupe õchepe ñyngareko õrã mĩnje Pedro. ¹⁷ Haivi taupe õchepe ñyngareko õvã pyrãndushu Pedro: Nde ha'ẽãra jyve ko kuimbai mboireare pẽnteva? Hãrã Pedro heishu: Mba'ety. ¹⁸ Vokava arape ro y ẽrã, jokueareare hareka syndarore tata jakuimbaimba reta, ñymbouva pẽĩ jype e ñynõĩ verã. Hãrã Pedro ñymboja jyve ñymbou õre ẽvãperã jypee hãndi reta. ¹⁹ Haipe pai ruvisha vasu õñepyrõ pyrãndushu Hesu mbavara rymboi ryreare, hareka mbaivara rỹpyrỹmboihe. ²⁰ Hesu heishu: She rãnga ãĩjeta kuaretare hỹnonde; Sinagoga hareka tupaopi apyrỹmboi, opaite Judiore ñymbatyaipi. Hãrã ha'ẽã rãngatẽ mãĩnunga ñemiape. ²¹ Mãrã'ĩrãra rỹpyrãndu she? Pyrãndu jyveshu opaite shiñẽẽ hẽndu vekuare, hãrã tymbeu jyve nde she amboihe vekuare. Haire kuaa kavi she hai vekua. ²² Hesu kỹrã heirã, pẽnte syndaro tupaope õ haipe ia, nũpa Hesu hovaipirã heishu: Kỹrãra jaijetashu pai ruvisha vasu? ²³ Haipema Hesu hei: Ĩmẽ porãmbape haivarã, mbeu she. Hãrã haikaviva hairãra, mãrã ĩrãshu nũpa? ²⁴ Haivi Anas mondoshu Hesu pokuaha ryheve pai ruvisha vasu Caifas ẽvãpe. ²⁵ Haipe Pedro ñymbou jypee ẽ tata hyvacherã, heishu reta: Ha'ẽãra nde ko kuimbai mboireare pẽnteva? Pedro ñõmĩrã hei: Mba'ety. ²⁶ Haivi pai ruvisha jokuerea pẽnteva, Pedro nambi jasyja shi vekua hẽntarã, heishu: Aryreshã ngamba jyve hãndi Hesu ñana õpe. ²⁷ Hãrã Pedro hykuaĩ heijy kuambava Hesu. Haipema pẽnte uru ñyrãã. ²⁸ Haivi pai juhuvishare raha Hesu Caifas hẽntaivi mburuvisha vasu Romape õ Pilato hỹnonde. Kõĩ serima ouva, hãrã Judiore icheã ko mburuvisha Pilato hẽntape, shara ñatẽy ñymyngya reta oho heare heiva rãĩmi, hareka haimba Judiova ohoãpo ỹngava oope; kỹrã japorã katuãpo hou reta karu Pascua ryheva. ²⁹ Hãrã Pilato õhẽ katuape ĩnjeta hãndi verãrã, heishu reta: Mbaiva ñẽẽ porãmbara ĩmẽ pyrehe kova kuimbai? ³⁰ Judio reta heishu: Ko kuimbai ha'ẽã mbai porãmba japo iarã, veruambate verã nynonde. ³¹ Haipe Pilato heishu reta: Pyraha pee, hareka pijapohe pyndy kuatiape mbyparahava heiva rãĩmi. Haipe Judiore heishu: Tẽvã ore Judiore katũã mbavape jukaha. ³² Kỹrã iko Hesu hei vekua mãrãrapo hai manokui. ³³ Pilato ichejy hoo iperã, hẽnoshu Hesu, hãrã pyrãndushu: Haira nde Judiore juhuvisha vasu? ³⁴ Hesu pyrãndu jyveshu: Ndera ndijuhuvi rere she, ti ỹngavare kỹrã hei nde rãmẽĩra rere jyve shyrehe? ³⁵ Pilato heishu Hesu: Shera hai Judio. Nyrẽnta ĩrũre, hareka pai ruvisha reta rãnga, niñono she pope. Mbaivara rijapo? ³⁶ Haipe Hesu heishu Pilato: She ha'ẽã ko yvy ĩãrẽ õ mburuvishare rãĩmiva. She mburuvisha pee rãĩmi jyvẽrã, shyryhevare ñyrãrõte verã potã shymẽ ẽhã Judiore juhuvisha ipoperã. She Reino ha'ẽã ko yvy ĩãrẽ õ. ³⁷ Hãrã Pilato heishu Hesu: Akuarã haira ndee mburuvisha vasu? Hesu heishu: Hai rãnga nde rereva rãĩmi. She ai aa vekua ko yvy ĩãrẽ ambeu verã ãñẽteva. Opaite mbai ãñẽteva japo ia, hẽndu she ambeuva. ³⁸ Pilato pyrãndushu Hesu: Mbaivara vokava ãñẽtea? Jururehahe juka vẽrã Hesu. Vokava pyrãndurã Pilato õhẽjy Judiore ẽvãperã heishu reta: Aheshã rãngahe ko kuimbai mbai porãmba japova. ³⁹ Pee rãnga pipykuaa pẽnte kuimbai mbyperesoava apoishirã ko Pascua aretepe; pipotara apoishi ko Judiore juhuvisha vasu? ⁴⁰ Haipe kuaretare hỹnatu sapukerã hei: Vokava avy poishi hai! Haikavive pokui rypoishirã Barrabas! Barrabas haimba mbai porãmba japo ia.