¹ Pilato heimarã raha ñupãkashu Hesu. ² Haivi syndarore ñope japo pẽnte korona juuvi hãrã ñonohe Hesu ñakare, ³ Haivi õñepyrõ hovaipi nũpashu retarã hei: Tiko puku Judiore juhuvisha vasu! ⁴ Pilato hykuãĩ õhẽjyrã heishu reta: Pymãĩhe, ko kuimbai aru katuape pyhesha verã, she aheshãhe mãĩnunga porãmba japova. ⁵ Hãrã Hesu nõhẽha katuaperã, ñakare ĩmẽre juu ñopẽha vekua, hareka mondeava pytããveva kupere. Haipe Pilato hei: Koo ẽ kuimbai pynynonde! ⁶ Pai ruvishare hareka syndarore tupao ñyngareko ihea, Hesu heshama retarã õñepyrũ sapuke reta: Mbysavava kurusure! Mbysavava kurusure! Pilato heishu reta: Pyraha hãrã pymbysavava pee. She aheshãhe mãĩnunga porãmba japova. ⁷ Judiore heishu: Ore rãnga ĩmẽ rekoha yrykuatiape mbyparahava, hãrã haipy heiva mano ñoĩ verã, shara hei ijehe Ñanderu Tumpa Tay. ⁸ Pilato hẽndu kovarã, kyjeiteve ijy. ⁹ Hãrã Pilato ichejy oo iperã pyrãndushu Hesu: Mãĩvi reivara nde? Tẽvã Hesu mba'ẽã hei. ¹⁰ Hãrã Pilato heishu Hesu: Mba'ẽãrapo rereshe? Rikuããra ĩmẽ areva mbaikatu, arỹmbysavavaka verã kurusure, hareka ãmã ẽĩjy ndyrehe verã? ¹¹ Hesu heishu: Mba'etyte ryre shy rehe verã mbaikatu Ñanderu Tumpa niñonoã Mburuvisha vasurã; hãrã shy mẽẽ vekua ndepope tivishaiteve ĩmẽre hai ijehe mbai porãmba. ¹² Haipema Pilato heka mãrãrapo mã ẽĩjyhe Hesu; tẽvã Judiore sapuke jyrerã hei: Rỹmã ẽĩjyherã, nde haivẽãmapo mburuvisha vasure ñi'ĩrũ! Ĩmẽ'ẽ hei ijehe mburuvisha vasuva, voka Romape õ mburuvisha vasu hyvaishoma! ¹³ Hãrã Pilato vokava hẽndurã, nohẽkajy Hesu katuape. Hãrã pirĩmbivache õ vapyseape vapy, hebreope mbyheeava Gabata, he'iseva itaivi japoava. ¹⁴ Ara mbyte nũngama ẽ, Pascua jy ara verãpe. Pilato heishu Judiore: Kope ẽ pyndyruvisha vasu! ¹⁵ Tẽvã haire sapuke jyre: Tymano! Tymano! Mbysavava kurusure! Pilato heishu reta: Mãrãrapo ambysavava pyndy ruvisha vasu kurusure? Pai ruvishare heishu: Pentẽĩ rãnga ẽ ururuvisha, mburuvisha vasu Romape õ. ¹⁶ Haipema, Pilato mẽẽshu reta Hesu, mbysavavaha verã kurusure. ¹⁷ Hesu õhẽ jukurusu ryhe verã oho “tãkã kãvẽ rẽnda” he'iashua kyty, hebreore ĩñẽẽpe he'iseva Gólgota. ¹⁸ Haipe mbysavavashu reta kurusure, hãndi mõkue kuimbai, pẽnte jasu kyty ĩrũ jakata kyty, hãrã Hesu mbytepe. ¹⁹ Haivi Pilato ñonoka kurusu ĩãrẽ pẽnte ñẽẽ heiva: “Hesu Nazareno, Judiore juhuvisha vasu.” ²⁰ Heta Judiovare mbijetava voka ñẽẽ, shara Hesu mbukurusuha vape mbyrya ẽshi tẽnta, hãrã ñẽẽ ñonoha hebreo, Griego hareka latinpe. ²¹ Hãrã pai ruvishare heishu Pilato: Avy ñono: “Judiore juhuvisha vasu”; haikavivepo rymbyparahe, hai hei ijeheva rãĩmi Judiore juhuvishava. ²² Tẽvã Pilato heishu reta: Ko ambyparava rãĩmi, kỹrãmãĩ ẽ. ²³ Hãrã syndarore hupima Hesu kurusurerã, heky reta monde vekuarã mbijao ũrũndy kavi pepentẽĩ pevãrã. Hesu monde vekua ha'ẽãmba mbyvyvyava, shara pẽnte pukupẽĩ japyva. ²⁴ Hãrã syndarore hei ijupe reta: Avy ñamyndoro, haikavivepo ñamomboĩhe dado mbavarapo ou kavishurã pytashukui. Kỹrã iko voka Ñanderu Tumpa jykuatiape heiva: “Amonde vekua ñimbijao hereta, ajasoiva mombohe reta dado." Kỹrã katĩ japo reta syndarore. ²⁵ Hesu jykurusu ẽvã hyvache ẽ ishy Maria, hãndi kypyy Maria, Cleofas hỹreko hareka Maria Magdalena. ²⁶ Hesu heshama ishy, ñymboy ẽ jypype hãndi mboirea hai haihuva, hãrã heishu ishy: She sy, ko ẽ nymemby. ²⁷ Haivi heishu mboirea: Voka ẽ nde sy. Haivima Hesu mboirea rahashu Maria, hai hẽntape. ²⁸ Kova mbairã, Hesu kuama opa mãĩnũnga vãhẽma japype. Haereka iko verã Ñanderu Tumpa jykuatia ĩñẽẽpe heivarã, hei: Shu uhe. ²⁹ Haipe ẽ pẽnte taropy tynyhẽ õ vino irova, mãkypy pẽnte esponjarã, ñapĩti yvyra japyre hãrã Hesu jurure mboja. ³⁰ Hesu hou vino irovarã, hei: Kope vẽĩma Sheru heisheva ajapo. Haivi ñakã mombo yvy kytyrã, mano. ³¹ Akuape Pascua ara serimarã, Judiore potãmba tyretekue pytashi kurusure putu'uava jy arape, arete Pascua vasupo ẽrã. Hãrã jurureshu reta Pilato my õpekashi verã kurusure savava õre tyma, haivi mbyvejyha verã. ³² Hãrã jyraha syndarore, my õpe verã mõkue õre tyma Hesu jichere mbysavavaha vekua. ³³ Tẽvã ñymboja Hesu ẽvãperã hesha reta manomarã, hãrã hai reheĩ my õpeãshi tyma. ³⁴ Hãrã syndaro pẽnteva kutu Hesu hetekue jichepe, haivi õhẽshi tuvy hareka yy. ³⁵ She Juan, kova aheshava ãmbeu pee hareka shapuã; hareka aikuaa mbai ãñẽteva heirã, pee jyve pyroja verã. ³⁶ Kova mbai jehu iko verã Ñanderu Tumpa kuatia ĩñẽẽpe heiva: “My õpehãmba shi verã pẽnte kãvẽ.” ³⁷ Ĩmẽ'ẽjy Ñanderu Tumpa kuatia ĩñẽẽ ĩrũpe heiva: “Heshapo reta kutuha vekuape.” ³⁸ Kova mbairã, Jose Arimatea pe õ tẽnta, jurureshu Pilato mbyvejy verã kurusuivi Hesu hetekue. Hesu mboirea ñemiapeĩ iko i jyve haykue, shara kyjete i Judio retaivirã, Pilato mẽẽmashurã, Jose oho raha Hesu hetekue. ³⁹ Nicodemo jyve, oho ĩnjeta hãndi vekua Hesu pẽnte pyntũpe, vãhẽ oho jyve mbai pisheka kavi ryheve, mirra hareka aloe mbihi ava (30) kilo rupii. ⁴⁰ Hãrã Jose, hareka Nicodemo Hesu hetekue kytyhe mbai pisheka kavi, haivi ñomapy reta savana tĩĩva mbipishea kaviva, Judiore japoseva rãĩmi manova ñotyha verãpe. ⁴¹ Hesu kurusure mbysavavaha vekuape hyvache ẽ yvoty hetava, hãrã haipe ẽ pẽnte ita jo'oava py ahu õ, manova ñotyhamba terivape. ⁴² Haipe ñono reta Hesu hetekue, shara mbyryã ẽ ita jo'oavarã, hareka vãhẽ serima putu'uava jy ara.