Hesu kuerajy. ¹ Putu uava jy ara hasamarã, Domingo kõ ẽĩ pỹntu teriva, Maria Magdalena oho tã õvẽ õpe Hesu ñonoãvape; hãrã Putu uava jy ara hasamarã, Domingo kõ ẽĩ pỹntu teriva, hesha ita jo'oava juru mbotyha pya mba'etyma. ² Haipema taupe ñani oho Simón Pedro ẽvãpe, hareka Hesu mboirea haihuva õpe. Hãrã taupe heishu reta: Hesu hetekue nohẽã ngamba rahaha ita jo'oavaivi, hareka jaikuã mãĩpiramba ñonoha. ³ Haipe Pedro hareka ĩrũ Hesu mboireare hãndi jyraha tã õvẽ ẽvãpe. ⁴ Mõkue õre jyvacheĩ ñani jyraha; tẽvã ĩrũ ñakuaveshi Pedro, hãrã tỹnonde vãhẽshi. ⁵ Jyroa mãĩrã hesha savana ñomahapy vekua haipe ẽ, tẽvã icheã hapype. ⁶ Haivi vãhẽ oho Simón Pedro haykueĩ, hãrã iche ita jo'oava hapype, hãrã Pedro heshãĩ jyve savana ñomahapy vekua haipe ẽrã. ⁷ Pedro heshajy Hesu ñakãre ñomahapy vekua mba'ety hãndi jokuaha pyare, tẽvã mbapu aha kavirãmba ỹngaity ñonohajy. ⁸ Haivi iche jyve Hesu mboirea ĩrũ. Tỹnondeite vãhẽ vekua tã õvẽ ẽvãpe, haipe hesha kavite iko vekuarã, rojama. ⁹ Kova mbai ndei ikorã, haire kuaa kaviamba Ñanderu Tumpa kuatia ĩñẽẽpe heiva, Hesu kuerajy verã manovare mbyteivi. ¹⁰ Haipema mõkue õ Hesu mboireare jyverujy hẽntape. ¹¹ Maria Magdalena katuapẽĩ pyta hairã, ita jo'oava hyvache jaheo i, hãrã jaheo ryheve jyroa mãĩ ita jo'oava vekua hapype. ¹² Hãrã hesha mõkue Tumpa jokueva mondeva tĩĩ kaviva, vapy ñynõĩ Hesu hete ñonõha vekuaperã; pẽnte ñaka kyty hareka ĩrũ tyma kyty. ¹³ Hãrã Tumpa jokuevare pyrãndushu taupe: Taupe, mãrã'ĩrãra rijaheo rei? Taupe heishu: Sheja rãnga rahaha, hãrã aikũã mãĩpira ñonoha. ¹⁴ Opaĩ kỹrã heirã, mãĩ haykue hãrã haipe hesha Hesu, tẽvã kuãmba haiva Hesu. ¹⁵ Haipe Hesu pyrãndushu: Taupe, mãrã'ĩrãra rijaheo rei? Mbavara ryheka? Maria mõãte kuimbai yvoty ñyngareko ihearã, heishu: Karai, nde ryraharã mbeu she mãĩpira ryheja, hãrã ahajypo aru. ¹⁶ Haivi Hesu heishu: Maria! Maria jerepyrã Hebreo iñẽẽpe heishu: Raboni! (He iseva “Pyrymboi'ia”). ¹⁷ Hesu heishu: Avy poko shyrehe, shara nde iave ajupijy Sheru ẽvãpe. Tẽvã ekua hareka mbeushu shyryvyre, ajupijy verã Sheru ẽvãpe, haijyve pynde Ru. Vokava haishu Tumpa hareka jyve punu Tumpa. ¹⁸ Hãrã Maria Magdalena oho mbeushu reta Hesu mboireare, hareka hai heshava Hesu, opaite Hesu heishu vekua rãĩmi mbeu. ¹⁹ Vokava Domingo arape pỹnturã, Hesu mboireare ñymbaty reta. Haipe õche mboty reta shara kyje jyreshi Judio juhuvishare. Haivi Hesu vãhẽ haire mbyteperã, mãrãndurã hei: Pyndy pya kaviteño! ²⁰ Haipe mbyheshaka reta ipo hareka jiche kutuavape. Hãrã mboireare heshajyma Ñanderu Hesukritorã vy aite jyre. ²¹ Haivi Hesu heishu reta: Pyndy pya kaviteño! Sheru shy mondova rãĩmi, she apyrymondo jyve. ²² Haipe Hesu mboireare peju ĩãrẽrã, heishu: Ãmẽẽ pee Espiritu Santo. ²³ Hãrã pee papisha pyhejarei shi mbai porãmba japo vekuarã, Ñanderu Tumpa hejareipo jyve pyndyhevi. Tẽvã pee pyheja reĩãrã, Ñanderu Tumpa heja reĩãpo jyve pyndyhevi. ²⁴ Tomas hai (12) Hesu mboireare, hareka mbyheeava “mõkuepya,” õĩãmba hãndi reta, Hesu ourã. ²⁵ Haivi mbo eareaĩrũre heishu Tomas: Ore heshahaje Ñanderu Kristo! Tẽvã Tomas hei: She aheshã koravo kuarekue ipore, hãndi aminjeã shepo koravo kuarekueperã, hareka aminjeã shepo jiche kutuha vekuaperã, she arojãpo. ²⁶ Hãrã (8) ara jyape, Hesu mboireare hykuãĩ ñymbaty py aujy pẽnte oope, haipe Tomas ñynõĩma jyve hãndi reta. Ôche opate mbotya kaviva, Hesu vãhẽ ou haire mbyteperã, mãrãndushurã hei: Pyndy pya kaviteño! ²⁷ Hesu heishu Tomas: Minje ndepo inti kope koravo kuarekuepe, hãrã mãĩ shepore, hareka minje ndepo shiche kutuha vekuape. -Yteñomapo mbai ryrojã, ryrojaĩpo jyve! ²⁸ Haipe Tomas hei: She Ija, harekashu Tumpa! ²⁹ Hesu heishu: Tomas, ã'ẽ ryrojama shara shyreshama? Vy apo opaite jyroja vekuare, shyreshambatẽãre. ³⁰ Hesu japomba heta mbaikavi heshaha verã mboireare hỹnonde, ñonõãmba vekua ko kuatia ñẽẽpe. ³¹ Tẽvã kovare ñonoha pee pyroja verã Hesu haiva Kristo, Ñanderu Tumpa tay, pee pirojaherã ĩmẽ pyre verã tykove opambava hai heepe.