Hesu ijeshakashu (7) mboireare. ¹ Kova mbai jyrã, Hesu hykuãĩ ijeshakashu mboireare yyvasu Tiberia hymbeype. Kỹrã japo: Kova mbai jyrã, Hesu hykuãĩ ijeshakashu mboireare yyvasu ² Opãĩ ñynõĩ pẽnteape Simón Pedro, Tomas mõkue pya heia, mbyheeava, Natanael tẽnta Cana Galileape õ, Santiago hareka Juan Zebedeo tayre, ĩrũ mõkue Hesu mboireare hãndi. ³ Simón Pedro heishu reta: Ahapo aipiraka. Haire heishu: Ore ohoapo jyve ndipi. Jyraha retarã jupi pẽnte kanoãpe; hãrã voka pyhare mba'ẽã nõhẽ reta. ⁴ Kõĩma ourã, Hesu vãhẽ yyvasu hymbeype, tẽvã mboireare kuããshu haiva. ⁵ Hesu pyrãndushu reta: Shi ĩrũre, pynohẽrate pira? Haire heishu: Mba'ety. ⁶ Haivi Hesu heishu reta: Pymombo pyndy pysa kanoã jakata kyty, hãrãpo pynõhekui. Hãrã kỹrã mombopy reta jypysarã katuã nõhẽjy yyvi, shara hetaite pira oapyrã. ⁷ Haipe Hesu mboirea haihuva heishu Pedro: Ñanderu Kristo rãnga! Simon Pedro hẽndu hai Ñanderu Hesukritorã, mondejy mondeva ĩãrẽ õrã, opopy yy. ⁸ Ĩrũ mbo eharea retany vãhẽ jyraha kanoã ryheve yyvasu hymbeype mbyryã ẽ, hãrã mbytyryry veru reta pysa tynyhẽ õ pira yyvasu hymbey peve. ⁹ Hãrã vejy kanoãĩvirã hesha reta tata hẽndy õ, hareka pira ĩãrẽ ñonõha hãndi pãhã. ¹⁰ Haivi Hesu heishu reta: Peru kope pira, kuri pynõhẽva. ¹¹ Simon Pedro jupi kanoãperã mbytyryry raha pysa tynyhe õ pira marẽrẽyvã yy hymbey peve, hãrã (153) pira ẽẽpy pysa tẽvã osoã. ¹² Haivi Hesu heishu reta: Pei perãmbosa. Tẽvã mbavã mboireare pyrãndushu mbavara hai, shara kuaa haiva Ñanderu Kristo. ¹³ Haivi Hesu ñymbojarã pãhã heky hãndi pirarã, mẽẽshu reta. ¹⁴ Kova hai mbahapyhea Hesu ijeshaka jyshu mboireare, kuerajy manovare mbyteivirã. ¹⁵ Opa karu retarã, Hesu pyrãndushu Simon Pedro: Simon, Jonas tay, shyraihuvera kovaivi? Simon Pedro heishu: Aryraihu rãnga Sheja, nde rikuaa kavi aryraihuva, Hesu heishu: Akuarã myngarukui shy avishare. ¹⁶ Hesu hykuãĩ pyrãndu jyshu: Simón Jonas tay, ndera shyraihu? Pedro heishu: Aryraihu rãnga Sheja, nde rikuaa kavi aryraihuva. Hesu heishu: Ñyngarekohekui shy avishare. ¹⁷ Haipe mbahapyhea Hesu pyrãndu jyshu: Simon, Jonas tay, ndera shyraihu? Pedro mbyvy ã, mbahapy heama pyrãndu ishurã. Hãrã hei: Sheja nde rãnga opa mba e rikuaa. Rikuaa kavi she aryraihuva. Haivi Hesu heishu: Myngarukui shy avishare. ¹⁸ Ãñẽtevape hai nde, arykai nũkunumi terirã, rẽĩ kavirã pota rehova kyty reho, rykuakuamarã rỹmy symyĩpo ndijyva, hãrã ỹngavapo ndukuaipi jokuarã ndyraha natẽỹ rehoa kyty. ¹⁹ Kỹrã Hesu mbykuaaka, Pedro marãrapo mano, hareka omombai vasuposhu Ñanderu Tumpa. Haivi Hesu heishu: Ei shimĩ'ĩrũ! ²⁰ Pedro jerepyrã hesha oho jyre haykue mbo earea Hesu haihuveva, karu ñynõĩrã vapy i hyvacheva hareka pyrãndu ishu vekua: “Yreja, mbavara yrỹmbyteivi ndy pysyka pokui? ²¹ Pedro heshamarã, pyrãndushu Hesu: Sheja. Kovapera mbaiva ikopohe? ²² Hesu heishu: She aipotarã hai hykove terikui she aijy peve. Mbaivara nde vokava? Nde, ei shimi'ĩrũ. ²³ Hãrã mbe uha opaite Hesu jyrojaheare mbytepe, vokava mboirea manomba hai verã. Tẽvã Hesu he iambashu manomba hai verã, kỹrã reĩ heishu: “Aipotarã hykove teripokui she aijy peve. Mbaivara nde vokava?” ²⁴ Hesu mboirea haihuva ĩnjeta ẽhe kova mbai, hai mbyparava ko kuatia. Hãrã jaikuaa opaiteva heiva ãñẽte. ²⁵ Heta ẽjy ỹngava mbai haikaviva Hesu japo vekua mbyparaha mbava kuatiape. She pevarã ko yvy ĩãrẽ javeãmbapo kuatia mbyparaha verã. Kopeveima. Amén.