Taupe ỹnga mãĩ ijyhea ¹ Haivi Hesu ohojy yvyturusu Olivope. ² Kõ ẽĩ voka arape Hesu mboishu reta. ³ Haipe Moise mbypara vekua pyrỹmboi'iheare hareka fariseore rahashu reta pẽnte taupe, ỹngava mãĩ ijehe shi ĩmerã heshahava. Veru ñono reta hetava mbytepe. ⁴ heishu reta Hesu: Pyrỹmboi'ia, ko taupe rãnga heshahaje ỹnga mãĩ ijy heshi ĩmẽrã. ⁵ Moise mbypara vekuape rãnga hei kỹrãvã taupe, ita poryhahe verã mano peve. Ndera marã rere jyve? ⁶ Haire kỹrã pyrãndushu reta ñonovaishu verãre hareka reko verãre mbaivarapo heihe reta. Tẽvã Hesu jyroarã õñepyrõ yvyre mbypara. ⁷ Haivi hykũãi pyrãndujyshu reta, ñãka mu pũãrã heishu reta: Ĩmẽ'ẽ pyny mbytepe mbai porãmba japombavarã, hai rãni tỹnonde tijapi itape. ⁸ Haipe jyroa jyrã õñepyrõ mbyparajy yvype. ⁹ Hẽnduma reta kovarã, pepẽntei õñepyrõ ohojy, tỹnonde kuakuai teve vare opajy oho. Hesu hã'ẽĩ ĩme hãndi haipe taupe. ¹⁰ Ñãka mu pũãrã pyrãndushu: Matyra opa oho reta? Mba'etymara pota ndukava? ¹¹ Taupe heishu: Karai, mba'ety. Haipe Hesu heishu: She jyve aipotã rỹmano. Ekuajyvy ãtẽñoma japokui mbai porãmbava. ¹² Hesu ĩnjeta jyshu kuareta retarã, hei: She hai mbai sapeka ko yvy ĩãrẽ, ĩmẽ'ẽ shimi'ĩrũvarã rekopo mbai sapeka mẽẽvã tykove, hãrã iko veamapo pyntuape. ¹³ Fariseore heishu: Nde rãnga ndeei rĩnjetari ndijehe, hãrã porã voka rereva. ¹⁴ Hesu heishu reta: Sheeitẽ aĩnjeta shi jehevara, ãẽte vaĩ hai. She rãnga aikuaa mãĩvira ai hareka matyra aha. Tẽvã pee pikuãã. ¹⁵ Pee pijahepihe papisha, kuaretare japosea rãĩmi. Sheny mbavareã kỹrã ajapo. ¹⁶ Hãrã ajaporã, hekope kavi ajapo, shara sheiã ajapo. Êjyve shendie Sheru shymbou vekua. ¹⁷ Pyndy kuatiape rãnga hei: “Ĩmẽ'ẽ mõkue mbai heshava pẽntevãĩ mbeuvarã, jaroja ñõĩpo.” ¹⁸ Hãme rãnga shei hai mbai heshava, hãrã Sheru shymbou vekua jyve mbai heshava. ¹⁹ Pyrãndushu reta: Maperã ĩmẽ'ẽ nderu? Hesu heishu reta: Pee shy kuããpi, hãrã pikuãã Sheru. Shykuapirã pikua tẽvẽrã jyve Sheru. ²⁰ Kỹrã Hesu ĩnjeta pyrỹmboi ẽ tupaoperã, Ñanderu Tumpape mẽ ẽãva kyrypoti hyru hyvache. Tẽvã mbavẽã raha mbypereso, shara vãhẽã teri jy ara. ²¹ Hesu heijyshu reta: She rãnga ahapo, hãrã shyrekapo pikui. Tẽvã pymano pokui mbai porãmba pijapo vekuapy; pee pehoãpo, she aha verãpe. ²² Judiore heishu: Ha eirapo ijukakui kova, hãmeãra hei ohovape katumba jaha verã? ²³ Hesu heishu reta: Pee rãnga hai ko yvy ĩãrẽ õ, sheny hai vate arapy õ. Pee hai kuareta yvy ĩarẽ õ, she ha'ẽã kuaretare yvy ĩãrẽ õ ryheva. ²⁴ Hãme rãnga hai peje pymanopo mbai porãmba pijapo vekuapy. Shy rojãpi “She hai, hai varã”, pymano ñõĩpo mbai porãmba pijapo vekuapy. ²⁵ Haipe pyrãndushu reta: Mbavara nde? Hesu heishu reta: Tynonde rãnga haipeje. ²⁶ Heta mba e rãnga ĩmẽ are hai pyndy rehe verã, hareka ahesha pyndy rehe heta mba e porã pini ñonorã, shymbou vekuany ãẽtevãĩ hei, hãrã she ambeushu kuaretare, hai ĩñẽẽ ãhendu shi vekua. ²⁷ Tẽvã haire kuããmba Hesu ĩnjetaheshu Tuu rerã. ²⁸ Hãrã heishu reta: She, Kuareta tay rãĩmi ai vekua ko yvy ĩãrẽ shiñono mapi vate kurusu rerã, pikuaa pokui “She hai, hai varã,” hareka she ajapoã mãĩnũnga shijuhuvi; kõñeĩ ambeu Sheru shymboi he vekua. ²⁹ Ko shymbou vekua ĩmẽ'ẽ shendie; Sheru shyrejã shẽĩ, shara ajapo ñoĩshu hai potava. ³⁰ Hãrã Hesu kỹrã ĩnjetarã, heta ẽ jyrojahea. ³¹ Hesu heishu Judio jyroja heare: Pee pijapo katu shiñẽẽrã, ãẽteĩtepo haipekui shy ryhevare. ³² Pikuaa pokui Ñanderu Tumpa ãẽteĩtevape. Hãrã Ñanderu Tumpa ãẽteĩteva opapo pindijora teko jokueharei reaivi pyndy rekova ipope. ³³ Haire heishu: Ore rãnga hai Abraham tayre, mapeã mbava yrokuerei ikuei. Mãrã'ĩrãra rere ore irijora verã? ³⁴ Hesu heishu reta: Ãñẽte hai pee, opaite mbai porãmba japo iare, mbai porãmbava ipope iko. ³⁵ Pẽnte jokueharea rãnga pytã mano peve jokuerea hẽntape. Tẽvã oo ija tay pyta ñõĩpo haipe mano peve. ³⁶ Hãme rãnga, Tay pindi jora mbai porãmba vekuaivirã, ãẽteitepo pyny pyrãntakui. ³⁷ She rãnga aikuaa Abraham tay peerã; tẽvã pee potashukapi shara pyrojã shiñẽẽ. ³⁸ She ambeu pee opa mbai Sheru shymby heshaka vekua; kỹrãĩ jyve pee pijapove peeru hei peeva. ³⁹ Haire heishu Hesu: ¡Abraham rãnga hai yreru! Hesu heishu reta: Ãñẽte hai pee Abraham tay retarã, hai japova rãĩmi rãnga mba tẽpo pijapo jyve. ⁴⁰ Kỹrã tẽvã pee potashukapi, ambeupe ñẽẽ ãñeteva Sheru heishe vekuarã. ¡Tẽvã Abraham mapeã mba kỹrã japo aryka'e! ⁴¹ Pee pijapo jyve peeru japova rãĩmi. Haire heishu Hesu: Ore ha'ẽã ỹngava tay, pẽntei rãnga ẽ yreru, hai Ñanderu Tumpa. ⁴² Hesu heishu reta: Ñanderu Tumpa ãñẽte hai peerurã, shy raihutẽ pi verã rãnga; shara Ñanderu Tumpaivi ai, hãrã kope ãime ãĩ. Aĩã shi juhuvi, Ñanderu Tumpa rãnga shymbou. ⁴³ Mãrã'ĩrãra pikuãã she hai peeva? Shara potã pyhẽndu shiñẽẽ. ⁴⁴ Peeru rãnga hai ãña, hai ryheva retape hareka potaĩ pijapo pishu hai potava; ãña õñepyrõai vive rãnga hai puruka ia. Hai japu, hãrã he iavãĩjy ãñeteva. Hai ĩnjetarã japu, japu verãĩ kuaa, shara hai apu tuu, hãrã mbytavy jyve kuaretare. ⁴⁵ Hãrã she hai pee ãñẽteva, tẽvã shy rojãpi. ⁴⁶ Mbavara pynymbytepe heshakapo, she mbai porãmba ĩmẽ areva? Hãmera ãñẽteva hai peerã, mãrã'ĩrãra pee shy rojãpi? ⁴⁷ Ñanderu Tumpa ryhevare hẽndu kavi Ñanderu Tumpa ĩñẽẽ; hãrã ha'ẽã Ñanderu Tumpa ryheva peerã, hairehe shy rẽnduseãpi. ⁴⁸ Haipe Judiore heishu Hesu: Ãñẽte rãnga ĩmẽ rekoha he ia ndyrehe verã: Nde hai Samariape õ, hareka mbai poshy ĩmẽryrea. ⁴⁹ Hesu heishu reta: Mba'ety rãnga are mbai poshy. She rãnga ãmombai Sheru, tẽvã pee she momba eãpi. ⁵⁰ She aipotã mbava she mombai. Ñanderu Tumpa hekava shi ñono kavi verã, hãrã hai ĩmẽ'ẽ shendie. ⁵¹ She ãñẽteva hai pee: Ko japova shiñẽẽ, mano veãmapo. ⁵² Judiore heishu: Ã'ẽ kuaa kavima nde mbai poshy ĩmẽryrerã. Abraham, harekaTumpa ĩñẽẽ mbeu'iare opama rãnga mano, hãmera ndee rere ore: “Shi ñẽẽ japova, mano veamapo.” ⁵³ Ndera mbaikatuve shi yreru Abraham? harekaTumpa ĩñẽẽ mbeu'iare haire opama mano vekua. Mbavara nde? Rere verã nymbaikatuveva? Kỹrãã! ⁵⁴ Hesu heishu reta: She shijupi ãñemombairã, vokava mba erã veapo. Tẽvã Sheru shymbou vekua she mombaiva, hai pereshuva Ñanderu Tumpa teiva. ⁵⁵ Tẽvã pee pikuããshu. She katy aikuaashu; hãrã she hai aikuambashuarã, shapupo jyve pee rãĩmi. She aikuaashu, hãrã hai heiva ajaposhu. ⁵⁶ Pyny tỹnondeva Abraham, vy a arykai heshapo ẽ she aimarã. Hãrã heshamarã hai vy aite i. ⁵⁷ Haivi Judiore heishu Hesu: Nde iave (50) año ryre Hãmera rere ore yreru Abraham ryheshava? ⁵⁸ Hesu heishu reta: Ãñẽte hai pee, she ĩmẽ mãĩ aiko arykai ndei teri Abraham ikorã. ⁵⁹ Hãrã haire ita heky japishu verã Hesu; tẽvã ñemirã õhẽ tupaovirã kuaretare mbyteipi hasa oho.