¹ Judeape, shara Judiore heka ñynõĩshu pota juka retarã. Mbai aramajyrã, Hesu vata'i tẽnta Galileaipi, hãrã ñatẽỹ oho ² Tẽvã, vahẽserima Judiore mby'arete verã “oo rãĩmire” he'iashua, ³ Hesu tyvyre heishu: Avy pyta kope; ekua tẽnta Judeape. Ndyryhevare hesha verã jyve nde rijapova. ⁴ Shara pota kuaahava japoãpo ñemiãpe mãĩnũnga. Hãrã ko mãĩnũnga rijapova, japo opavare hynõnde. ⁵ Vokava hei reta shara jyrojããhe reta Hesu. ⁶ Hesu heishu: Shy'ara ndeiteri vãhẽ, tẽvã pee pevarã ara haikavipe. ⁷ Kuaretare katũãpo pyndyreshatãã; tẽvã she shymỹmõrããpo, shara mbai porãmba japo vekuare aheshakashu. ⁸ Pekua pee voka Judiore ñymby arete'õpe; she ahããteripo, shara ndei vãhẽ shy'ara. ⁹ Haivi opa heishu kovarã, Galileape pyta. ¹⁰ Tyvyre opama ohorã, Hesu oho jyve mby areteha'õpe; ñemiapẽĩ ohova rãĩmi. ¹¹ Haipe Judiore heka jyrerã hei: Mãĩpiante ĩmẽ'ẽ vokava kuimbai? ¹² Hãmã kuaretare mbytepe heta'ẽ ĩnjetahevare. Ĩmẽ'ẽ heiva: “Kuimbai heko kaviva rãnga”, tẽvã ĩrũre hei: “Voka kuimbai rãnga kuaretare mbytavy'ia.” ¹³ Tẽvã mba'etymba ĩnjetaiteva, shara Judiore juhuvisha kyjeshi retarã. ¹⁴ Hãrã arete mbytema ohorã Hesu tupaope icherã, õñepyrõ pyrỹmboi. ¹⁵ Haipe Judiore mbyhaikavi jyrerã hei: “Mãrãira ko kuimbai Ñanderu Tumpa ĩñẽẽ opaite kuaa, ñymboimbate'ia?” ¹⁶ Hesu heishu reta: Kova ñẽẽ apyrỹmboihea ha'ẽã sha'ãmpova. Ñanderu Tumpa shymbouva ña'ãmpovãĩ rãnga. ¹⁷ Ñanderu Tumpa ĩñẽẽ pota japova, kuaapo she apyrỹmboiheva haira Ñanderu Tumpa potava rãĩmi, ti shijuhuvĩra aĩnjeta. ¹⁸ Hãrã ijuhuvĩ pyrỹmboiva, kuaretare omombai vasushu verãi japo; tẽvã Ñanderu Tumpa mboushuva õñehãã omombai vasu verã, vokava ãñete hei hareka japũã. ¹⁹ Moise mẽ'ẽãra pee Ñanderu Tumpa kuatia ĩñẽẽ? Tẽvã pee pijapoã vokava ñẽẽ. Mbaiva rehera potashukapi? ²⁰ Kuaretare heishu: Mbaiposhy rãnga nymbykuakuã'i: Mbavara hei pota ndukava? ²¹ Hesu heishu reta: Putu'uava jy'arape, mbai ajapo vekua reheĩ rãnga, pymỹngyje. ²² Moise rãnga hejamba pee pyndyray hapiami chĩchĩshi verã putu'uava jy'arape. (haimbate Moise mbypara vekua, koñẽĩ tynondeva reta). ²³ Tẽvã, hekope kavi pijapo verã Moise mbypara vekua, sanjay kuimbaimire hapia pichĩchĩã putu'uava jy araperã, hãmẽra mãrã irãra pyndy pya poshy shendie, pẽnte kuimbai ñymbairasyva ãmynguera putu'uava jy araperã? ²⁴ Hãmã pota pijaherã hekope kavipo pijapo, avypo pee pimoãva rãĩmi pijapo rei. ²⁵ Haipe ĩmẽ'ẽ Jerusalenvare, pyrãndu mba jyre: Ha'ẽãra ko kuimbai, heka jyreare juka verã? ²⁶ Hãmã kuty ĩnjeta ẽ opavare hyvache hãrã mba'ety mbava heishua. Ĩmẽra ẽ ñandu huvishare rojava ko kuimbai ãñete haiva Kristo? ²⁷ Tẽvã, ñande jaikuaa ouvaivi; hãrã ko Kristo ou verã jy arape katy, mba'etypo kua verã mãĩvirapo ou. ²⁸ Voka hẽndurã, Hesu pyrỹmboi ẽ tupao perã, hỹnãtu hei: ¡Akuarã, shykuamba hareka mãĩvira ai! Tẽvã, she shi juhuviã ai; Ñanderu Tumpa rãnga shymbou, hãrã hai pikuãshu. ²⁹ She katy aikuashu shara hai ẽvãivi airã, hareka Ñanderu Tumpa shymbourã. ³⁰ Haivi pota mby pereso jyre reta; tẽvã, mba'ety pysyva shara ndei teri vãhẽ jy ararã. ³¹ Heta kuaretare jyrojaherã, hei jyre: Kristo oujymarã, mbaikavi heshaha verã hetave rapo japokui ko kuimbai japovaivi? Fariseore mondo syndaro pysy vẽrã Hesu ³² Fariseore hẽndu kuaretare hei heva Hesu; hareka pai ruvishare hãndi mondo tupaope õ syndarore raha mby pereso verãre Hesu. ³³ Haipe Hesu hei: mbovy araĩmapo ãĩme'ãĩ pyvache, hãrãpo aha jykui Ñanderu Tumpa shymbou vekua õpe. ³⁴ Hãrã pee shyrekapo pikui, tẽvã shy resha veama pokui, shara katũãpo peho, she ãĩme'ãĩ verãpe. ³⁵ Fariseore pyrãndu ijupe reta: Mãtyrapo ohojy ko kuimbai, katumba ñavãĩshu verãpe? Oho rapo Judiore opa ñymõmõhẽva Greciape iare mbytepe, mboishu verãre Griego retape? ³⁶ Mbaivara he'ise ko hei ñandeva: “Pee shyrekapo pikui, tẽvã shy resha veama pokui; shara katũãpo peho she ãĩme'ãĩ verãpe? ³⁷ Arete vasu ara koñemava hai mbyharuava. Hãrã Hesu ñymboy hỹnatu ĩnjetarã hei: Ĩmẽ'ẽ ju uhevarã tou shyrẽndape, hãrã tiñimbyu. ³⁸ Jyroja shy reheva, Ñanderu Tumpa jykuatiape heiva rãĩmi: “Pyape ẽpo yy õhẽ õmi rãĩmi tykove opambava.” ³⁹ Kỹrã hei Hesu: Jyroja heare mẽ ẽãshu verã Espiritu Santo; tẽvã Espiritu Santo nde iave teri ou, shara Hesu nde iave teri ohojy vate arape. ⁴⁰ Ĩmẽ'ẽ kuaretare mbytepe hẽndu vokavarã hei vekua: Hai ñõĩ ãmoTumpa ĩñẽẽ mbeu'ia ko kuimbai, ñande ñahãrõ ñaĩva. ⁴¹ Ĩrũre hei: Kova hai Kristo. -Yngavare heijy: Mãrãrapo Galileape ia hai Kristo? ⁴² Ñanderu Tumpa jykuatiape rãnga hei: Voka Kristo mburuvisha David ñymoña hãndiapo; hareka Belenpe õ, David hẽntape õ. ⁴³ Kỹrã kuaretare ĩnjeta jyrehe Hesu. ⁴⁴ Ĩmẽ'ẽ pota raha mbypereso kava; tẽvã, mbavẽã japohe mãĩnũnga. ⁴⁵ Hãmã syndarore tupaope õ oujy fariseo hareka pai ruvishare ẽvãperã, haire pyrãndushu: Mãrã'ĩrãra peruambaje? ⁴⁶ Haipe syndarore hei: ¡Mba'ety ĩnjetava ko kuimbai rãĩmi! ⁴⁷ Haivi fariseore heishu: Peeavera piñy mby tavyka jyve? ⁴⁸ Ĩmẽra ẽ huvishare, ti fariseore jyroja heare? ⁴⁹ Kova tykove mbaimba kuavare Moise mbypara vekua kuamba retaĩ rãnga jyrojahe, voka Ñanderu Tumpa jahepo hekui. ⁵⁰ Nicodemo hai jyve fariseore pẽnteva, oho vekua Hesu ẽvãpe pẽnte pyharepe, heishu reta: ⁵¹ Ñandy kuatiape rãnga hei: “Katuã jajahehe pẽnte kuimbai, ñahẽndu mba terishuva jaikua verã mbaivara japo.” ⁵² Haipe heishu reta Nicodemo: Ndera Galileape õ jyve? Mãĩ kavipy Ñanderu Tumpa ĩñẽẽ kuatiape õ. Hãrã rikuapoTumpa ĩñẽẽ mbeu'ia ouã Galileaivi. ⁵³ Hãrã pepẽnteĩ ohojy hẽntaipi.