¹ Haivi Hesu oho Galileape'õ yyvasu hyvaisho kyty, mbyheeavajy ² Heta kuareta oho haykue, shara hesha reta mbaikavi heshaha verã japova mỹnguera'i ñymbairasy vekua retarã. ³ Hesu jupi yvyturusure, haipe vapy mboireare hãndi. ⁴ Vãhẽ serima Pascua verãpe, Judiore jy'arete. ⁵ Hesu mãĩ'irã hesha heta ou hipiare kuaretare, hãrã pyrãndushu Felipe: Mãĩvira jaruposhu ko kuaretare hou verã? ⁶ Hesu kỹrã hei kuaa verã mãrãrapo hei Felipe, shara Hesu kuaa kavi mbaivarapo japo. ⁷ Felipe heishu Hesu: 200 denario repy pãhã pepẽntẽĩ hou verãre, pysesevẽĩmba jave'ẽ ñande verã rãnga. ⁸ Hãrã Andres, Simon Pedro tyvy, mboirea jyve heishu Hesu: ⁹ Kope ẽẽ pẽnte sanjaymi ĩmẽrea pandepo avatikui pãhã japohashia hareka mõkue pira; tẽvã jave'ãĩpojy ñandekui opa ñamemẽẽshu verã. ¹⁰ Haipe Hesu hei: Pereshu kuaretare tyvapy. Kapi'ata kavi'ẽ haipe, hãrã opa vapy reta 5000 rupi kuimbaire. ¹¹ Hesu pãhã hekyrã ñymboi ĩãrẽ, mẽẽshu mboirea retarã mẽmẽshu kuaretare vapy'ovare. Kỹrãi japojy pira, mẽmẽshu haire pota houva rãĩmi. ¹² Opama hỹvãta retarã Hesu heishu mboireare: Pymbatyjy hẽmby vekua, mãhẽ opa reii mombohakui. ¹³ Haire mbatyjyrã 12 kanata kavi mỹnyhẽjy pãhã hareka pira hẽmby vekua. ¹⁴ Kuaretare heshama Hesu mbaikavi heshaha verã japorã, hei reta: Ãñẽteñoĩ rãnga kova hai Tumpa ĩñẽẽ mbeu'ia ou verã ko yvy ĩãrẽ. ¹⁵ Tẽvã Hesu kuaa haire pota mburuvisha vasurã raha ñono jyrerã, oho jupijy yvyturusure hã'ĩ ẽẽ verãipi. ¹⁶ Pỹntuma'irã Hesu mboireare hasa jyraha yyvasuhupi. ¹⁷ Haivi jupi reta pẽnte kanoãpe hasa verã yy hyvaisho kyty, vãhẽ verãre Capernaumpe. Pỹntuma vẽkua, Hesu oujyvyã teri haire ẽvãpe. ¹⁸ Haipe mundii yvytukue ñakua ourã, yykue mũpũã veru. ¹⁹ Mboireare jyrahama 5 kilometroipirã, hesha reta Hesu vata ou yy ĩãrẽ kanoã jykotyrã, opa kyje reta. ²⁰ Tẽvã Hesu heishu reta: Avy pykyje, She rãnga! ²¹ Haipe haire potate jupishu reta kanoãpe, tẽvã vãhẽ jepe jyrahashi. ²² Pareejyrã, kuaretare yyvasu hyvaisho kyty ĩmẽĩ'iare. Kuaajy reta Hesu mboireare ohojyvyã hãndi retarã hareka kanoã koñeĩ'õ jyrahajypyrã. ²³ Tẽvã ĩmẽ'ẽjy ỹngava kanoãre vãhẽ ouva tẽnta Tiberiaivi, pãhã hou jyre vekua hyvache hareka Hesu jurure ĩãrẽrã. ²⁴ Hãrã kuaretare heshama Hesu hareka mboireare mba'ety haiperã, jupi reta vokava kanoãpe jyraha hekashu verã Capernaumpe. Hesu hai pãhã tykove mẽẽva ²⁵ Vãhẽma jyraha yyvasu hyvaishoperã hesha reta Hesu, hãrã pyrãndushu reta: Pyrỹmboi'ia, mbaipera rỹvãhẽrei kope? ²⁶ Hesu heishu reta: Ãñẽtẽĩteva hai pee, shyrekapi shara opa pynyvãta apyrỹ myngarurã, ha'ẽã pikuamã mbaivara he'ise voka mbaikavi heshaha verã ajapo vekuarã. ²⁷ Avy ho'uava opa verã reheĩ pymba'apo, pymba'apojyvehe ho'uava opamba verãrẽ, hareka mẽẽpevã tykove opambava. Vokava hai ho'uava She Kuareta Tay rãĩmi ai vekua yvy ĩãrẽ ãmẽẽpe verã, shara Ñanderu Tumpa, Sheru, kyrã ñonoshe. ²⁸ Haipe kuaretare heishu Hesu: Ñanderu Tumpa potava japoha verã. Mbaivara katu japoha? ²⁹ Hesu heishu reta: Kova rãnga hai Ñanderu Tumpa potava, pirojahe verã hai mbou vekua. ³⁰ Haipe pỹrandushu reta: Mbaivara ryheshakapo'ore mbaikavi heshaha verã , heshaharã rojaha verã? Mbaivara rijapo? ³¹ Yrỹtỹnondevare heshamba aryka'e mbaikavi heshaha verã hou jyre mana yvy ikoambaipirã. Ñanderu Tumpa jykuatiape heiva rãĩmi: “Ñanderu Tumpa mẽẽshu pãhã vate araivi ouva hou verãre”. ³² Hesu heishu reta: Ãñetevape haijy pee, ha'ẽã rãnga Moise mẽẽpeva pãhã vate araivi ouva. Sheru teiva rãnga mẽẽ pee pãhã ãñeteva vate arapy'õ! ³³ Pãhã mẽẽvã tykove rãnga hai Ñanderu Tumpa mbouva vate araivi kuaretare pevarã. ³⁴ Haipe heijyshu reta: Karai, mẽẽ ñoĩve'ore vokava pãhã. ³⁵ Hesu heishu reta: She hai pãhã mẽẽvã tykove. Shyrendape ouva ñymbahyveama pokui; hareka jyroja shyreheva ju'uhe veamapokui mbairã. ³⁶ Tẽvã she hai peeva rãĩmi, piroja shyrehe ajemãĩ shyreshatẽ pẽĩva. ³⁷ Opaite Sheru hẽno vẽkua, oupokui she ãĩvape; hãrã ãĩvape ouva, ãmohẽãposhu reta. ³⁸ She ai vate araivi ajapo verã shymbou vekua potava, ha'ẽã she aipotavãĩ ajapo verã. ³⁹ Hãrã Sheru shymbou vekua potava hai kova: ãmykañymba verã hai mẽẽsheva, koñeĩ amynguerajy verã ara japyape. ⁴⁰ Sheru potava rãngajy kova, opaite mãĩ jykotyva Tay, hareka jyrojahea hipity verã tykove opambava; hãrã she ãmyngykovejy poshu ara japyape. ⁴¹ Kova mbai rehe Judiore õñepyrõ ĩnjeta porãhe Hesu. Shara hei: “She hai pãhã vate araivi ou vekua”. ⁴² Hãrã hei reta: Kova kuimbai Hesu, ha'ẽãra Jose tay? Ñande rãnga jaikua tuu hareka ishy! Mãrã'ĩrãra hei vate araivi ouva? ⁴³ Haipe Hesu heishu reta: Avy pĩnjeta porãreii. ⁴⁴ Mba'ety rãnga katu ouva shyrendape veruãshu Sheru shymbou vekuarã; hãrã she amynguerajypokui ara japyape. ⁴⁵ Tumpa ĩñẽẽ mbeu'iare tynondeva mbypara vekuape kỹrãmãĩ hei: “Ñanderu Tumpa opaitepo mboishu reta.” Hãrã opavare hẽnduva hareka kuaa kavishia Sheru ĩñẽẽ, oupo shyrendape. ⁴⁶ Mba'ety heshava Ñanderu Tumpa; Ñanderu Tumpaivi ouvañõĩte koñẽĩ heshashu. ⁴⁷ Ãñete hai pee, jyroja shyreheva ĩmamare tykove opamba verã. ⁴⁸ She hai pãhã pyrỹmyngoveva. ⁴⁹ Pynytynondevare houmbajyre mana yvy ikoambaipi, tẽvã opa mano reta. ⁵⁰ Kova pãhã ouva vate araivi, hãrã houvare manovẽãma. ⁵¹ She rãnga hai pãhã pyrỹmbyhykoveva ouva vate araivi; houva pãhã manovẽãmapo. Ko pãhã she ãmẽẽ verã hai shyrete; she ãmẽẽpo opava rehe ko yvy ĩãrẽ. ⁵² Haipe Judiore ha'eire ĩnjeta pohyjyre ijupirã hei: “Mãrãrapo ko kuimbai ho'uka ñande ha'ei hetekueĩ?” ⁵³ Hesu heishu reta: Ãñete hai pee, pee pe'ũã Kuareta tay rãĩmi ou vekua yvy ĩãrẽ hareka pumbusururuã huvyrã, katuãpo ĩmẽpyre tykove opamba verã. ⁵⁴ Hãrã shyroo houva hareka mbusururuva shuruvy, ĩmẽmare tykove opamba verã; hãrã she amynguerajypokui ara japyape. ⁵⁵ Shyroo hai timbiu ãñeteva, hãrã shuruvy hai mbusururua verã ãñeteva. ⁵⁶ Shyroo houva, hareka mbusururuvashu ruvy ẽẽ shendie, hãrã she ãĩ jyve hãndi. ⁵⁷ Hãrã Sheru shymbou vekua ĩmẽre tykove, hai rupii she aiko; kỹrãĩ jyve shyroo houva hykovepojyve she rupii. ⁵⁸ Aĩnjeta rãnga aĩhe ko pãhã ou vekua vate araivi. Ko pãhã ha'ẽã mana pynytynondevare hou jyre vekua rãĩmiva, haivi opa mano reta. Ko pãhã houva hykove japyvẽãmapo. ⁵⁹ Hesu pyrỹmboihe kova mbai kuaretare jatyva Sinagoga Capernaumpe. ⁶⁰ Hesu mboireare heta hẽndu pyrỹmboihevarã hei reta: Ko ñẽẽ rymbeuva rãnga pohyite. Mbavarapo katu japo? ⁶¹ Hesu kuaa haire ĩnjeta jyrehe ñẽẽ hei vekuarã, pyrãndushu reta: Ajetẽãra'ẽ pee ko ñẽẽ haiva? ⁶² Mbaivangamba ikotẽpo pyhesha ko Kuimbai rãĩmi ou vekua yvy ĩãrẽ jupijyma vate arapy hai ẽvãperã? ⁶³ Hãrã ko Espiritu hai mẽẽva tykove; tyretekuerei mba'ẽã hai. Hãrã she aĩnjetahepeva hai ãñeteva Espiritu Santo ryheva mẽẽva tykove. ⁶⁴ Tẽvã, ĩmẽteri'ẽ pynymbytepe pevare rojambava. Shara Hesu opamãĩ hynonde kuambavara rojãã, hareka mbavara ityposhu. ⁶⁵ Hesu hei: Hãme rãnga hai pee, katũã kuaretare ou shyrendape, Sheru veruãshurã. ⁶⁶ Haivive kuaretare Hesu mĩ'ĩrũreare opa hejashu, hãrã opa ñatẽy oho hipi reta. ⁶⁷ Haipe Hesu pyrãndushu 12 mboireare: Pẽẽra patẽyma peho jyve shipi? ⁶⁸ Hãrã Simón Pedro heishu Hesu: Yreja, mbavara ohoapojy hipi akuarã? Ñiñẽẽ rãnga hai pyrỹ myngoveva opa ara pevarã. ⁶⁹ Ore rãnga rojaha, hareka kuaaha nde hai Kristo, Ñanderu Tumpa hykoveva Tay. ⁷⁰ Hesu heishu: Sheeãngamba apyrypyhyrõ pee doce pẽiva? Kyrã tẽvã pynymbytepe'ẽ pẽnte mbaiposhy ĩmerea. ⁷¹ Hesu heihe voka Judas, Simón Iscariote tay. Shara Judas hai Hesu ityshu verã. Haitẽ jyve Hesu 12 mboireare pẽnteva.