¹ Judiore jy'arete ñynoĩvape. Kova mbai ikovaivi mbovy aramajyrã Hesu oho Jerusalenpe ² Haipe Jerusalenpe ĩmẽ'ẽ avishare hõche he'iashua hyvache pẽnte yy hẽnda Betsaida he'iashua hebreo ĩñẽẽpe, ĩmẽreva pandepo hõche. ³ Haipe'ẽ heta ñymbairasy vekuare; heshamba kũvaĩpiare, japava hareka vatamba vekua, hãrõtẽ'õre yy õmyĩrã verã. ⁴ Haipe sapypy'ãĩ vejy pẽnte Ñanderu Tumpa jokueva my'õmy verã yy, hãrã yy my'õmyãrã tynonde vejypya, kuerahe mbairasykue. ⁵ Hãmã haire mbytepe ĩmẽ'ẽ pẽnte kuimbai 38 ãñoma ñymbairasy vekua. ⁶ Hesu hesha ñeno'ẽ haiperã, hareka kuaama kuriã kỹrã'iarã, pyrãndushu: Ripotara rykuera? ⁷ Hãrã kuimbai ñymbairasy'ia heishu: Karai, mba'ety rãnga mbava shymbyvejypy verã yy õmyĩmãrã; hãrã potatẽ avejypya, ỹngava ñymy tỹnondejy shyhevi. ⁸ Hesu heishu: Pũ'ã, hupi ndurupa, ekuajyvy! ⁹ Haipevãĩ voka kuimbai kuera, hupi huparã vatajy. Tẽvã putu'uava jy'ara ẽrã, ¹⁰ Judiore juhuvisha heishu voka kuimbai kuerava: Putu'uava jy'ara rãnga'ẽ, ẽẽãnde ryraha verã ndurupa. ¹¹ Tẽvã hai heishu reta: Shy mynguerava rãnga heisheje: “Hupi ndurupa, ekuajyvy.” ¹² Haipe haire pyrãndushu: Mbavara hei ndeje: “Hupi ndurupa, ekuajyvy?” ¹³ Tẽvã kuimbai kuãã mbavara mynguera, shara kuareta hetava haipe'ẽrã haire mbyteipi Hesu õhẽjy oho. ¹⁴ Haivi Hesu heshajy kuimbai tupaoperã heishu: Ã'ẽ rykuerama. Mãĩ kavi, ãteñoma japokui mbai porãmbava, mãhẽ jehu ndekui mbai porãmba ãĩteveva. ¹⁵ Ko kuimbai oho Judiore juhuvisha ẽvãpe, haipe mbeushu reta Hesu mynguerashua. ¹⁶ Hãrã Judiore hekajyre Hesu pota jukarã, shara kova mbai japo putu'uava jy'arape. ¹⁷ Tẽvã Hesu heishu reta: Sheru rãnga mba'apoñõĩ hai ã'ẽpeve, hãrã she amba'apoñõĩ jyve. ¹⁸ Kova ñẽẽ rehe Judiore potaiteve jukajyre Hesu, shara japo pẽnte mbai japohamba verã putu'uava jy'arape, ĩãrẽvẽ ñimbivache'i hãndi Ñanderu Tumpa, hareka hei Ñanderu Tumpa haiva Tuu. ¹⁹ Haivi Hesu heishu reta: Ãñetevape hai pee, Ñanderu Tumpa Tay katuã japo mãĩnũnga ijuhuvireii; Tuu hesha japovãĩ japo jyve. Opa mãĩnũnga Tuu japova, Tay japo jyve. ²⁰ Shara Tuu haihushu Tay, hãrã opa mba'e heshakashu hai japova; hãmã heshakave teriposhu mãĩnũnga tivishaveva, pynymyngyje verã. ²¹ Tuu mũpũãjyva rãĩmi mano vekuare hareka mẽẽjyshu tykove, kỹrãĩ jyve Tay mẽẽ jyveshu tykove hai pota mẽẽshuare. ²² Hãrã Tuu jahẽãpohe kuaretare, koñeĩ mẽẽshu Tay mbaikatu jahe pyryrehe verã, ²³ kuaretare õmombai vasushu verã Tay, Tuu õmombai vasuva rãĩmi. Tay õmombai vasumba, õmomba'ẽã Tuu hai mbou vekua. ²⁴ Ãñetẽĩte hai pee, hẽnduva she haiva hareka jyrojahea shymbou vekua, ĩmẽmare tykove opamba. Jahehãpohe shara hasama ñymanoivi, tykove opamba kyty. ²⁵ Ãñetẽĩte hai pee vãhẽma ara, ã'ẽvãĩ, manovare hẽndu verã Ñanderu Tumpa Tay ĩñẽẽ hareka hẽndushua kuerajypokui. ²⁶ Shara Tuu ijuhuvi hykoveva rãĩmi, kỹrã jyve Tay, Tuu mẽẽshu ijuhuvi hykove verã. ²⁷ Hãrã Ñanderu Tumpa mẽẽshu mbaikatu jahe pyryrehe verã, hai Kuareta tay rãĩmi ou yvy ĩãrẽrã. ²⁸ Avy pyndypya myngyjekui kova haiperã: Vãhẽpokui ara manovare ñotyãvape, hẽndu verã jyve shiñẽẽ ²⁹ hareka õhẽjypokui ñotỹã vekuaivi. Haivi heko kavivare kuerajypokui opa ara pevarã; tẽvã mbai porãmba japo'i vekuare kuerajypo vekui jaheahe verã. ³⁰ She, shijuhuvii katuã mbai ajapo. She ajahe pyryrehe Ñanderu Tumpa heisheva rãĩmi, hareka hekope kavipo ãĩnjeta pyndyrehe, ajapoã she aipotava; koñei Sheru shymbou vekua potavãĩ ajapo. ³¹ Shei ãĩnjeta kavi ai shijeherã, kova shiñẽẽ hai vekua mba'ẽãpo, ³² tẽvã ĩmẽ'ẽ ỹnga ĩnjeta kavi shyreheva, hãrã she aikuaa ãñẽteva hai hei shyreheva. ³³ Juan Bautista pypyrãndukashurã vẽkua, hai ãñẽteva mbeupe. ³⁴ Tẽvã she aipotãã kuareta ĩnjeta kavi shyrehe; hãrã Juan ãĩnjetaherã ãmbe'ui pee pyrojarã peojepe verã. ³⁵ Juan rãnga hai mbai hẽndyva hareka sapeva, hãrã pee potate pyvyapy hẽndyva himbipekuepy, sapy'aiteĩ kỹỹmbape. ³⁶ Tẽvã Juan hei vekuaivi ĩmẽ'are ĩnjeta kavive shyreheva. Hãmã mãĩnũnga ajapova, hai Sheru japokasheva, vokava heshaka kavi ãñẽte Sheru shymbouva. ³⁷ Sheru shymbou vekua ĩnjeta kavi jyve shyrehe, ajemãĩ pee pyhẽnduãã hai ĩnjetarã hareka pyheshããshu. ³⁸ Hai ĩñẽẽ icheã pyndypyape; shara pyrojã Tuu mbou vekua. ³⁹ Pee rãnga piñymbo'eka kavihe Ñanderu Tumpa ĩñẽẽ kuatiape'õ, shara pimoãtẽ pyheshapy tykove opambava; ajemãĩ Ñanderu Tumpa ĩñẽẽ kuatiape ĩnjetatẽ shyreheva, ⁴⁰ tẽvã peeiã she ãĩvape ĩmẽ'pyre verã tykove opambava. ⁴¹ She aipotãã kuaretare ĩnjeta kavi shyrehe. ⁴² Tẽvã she opa apyrykuaa, hareka aikuaa pyhaihumbashua Ñanderu Tumpa. ⁴³ She rãnga ai Sheru heepe, tẽvã pee shymyvãhẽãpi; hãrã ĩmẽ'ẽ ouva ha'ei heeperã, katupo pymyvãhẽshu haikui. ⁴⁴ Mãrãrapo piroja shyrehe, pota kuareta retaĩ ĩnjeta kavi pyndyreherã hareka pirojããhe Tumpa pẽnteĩ'õ? ⁴⁵ Avy pimõã porãã ãpirĩñonokui Sheru hỹnonde. Porãmba piniñono verã rãnga hai Moise, pee pirojapihe vekua. ⁴⁶ Hãmã pee piroja Moise mbypara vekuarã, pirojatẽ jyve shyrehe verã, shara shyrehe Moise mbypara kuatiape. ⁴⁷ Tẽvã pyrojãã Moise mbypara vekuarã, hãmera mãrãpo pyroja she hai peeva?