¹ Fariseore hẽndu Hesu mbyhetave mboireare hareka Juan Bautistaivi hetave pyrỹmyngarai. ² Hesu mbatẽ pyrỹmyngaraiva, kõñeĩ mboireare japo. ³ Hesu kuaama vokarã, õhẽ Judeaivi oho jyvẽrã Galileape. ⁴ Hãmã ohojyrã hasañõĩpo Samariaipi. ⁵ Hãrã ohomarã vãhẽ oho tẽnta Sicar he'iashuape Samariape'õ, yvy Jacob hejashu vekua tay José hyvache. ⁶ Haipe'ẽ pozo Jacob ña'ãpo vẽkua; Hesu kangyiterã, vapy pozo hyvache, ndoce serimarã. ⁷ Haipe vãhẽ ou pẽnte taupe Samariape'õ nohẽ verã yy pozoivi, Hesu heishu: Tauve ndy yy. ⁸ Hesu mboireare oho tẽntape ova verãre hou verã. ⁹ Haipe taupe Samariape'õ heishu Hesu: Mãrã'ĩrãra nde Judiova rirureshe yy, she Samariape'ãĩvã? (Shara Samariape'õre ĩnjetãmba hãndi Judiovare). ¹⁰ Haivi Hesu heishu: Rikuaa Ñanderu Tumpa mẽẽvarã, hareka mbavara jurure'i nde yy, riruretẽshe verã ãmẽẽ nde verã yy mẽẽvã tykove opambava. ¹¹ Taupe heishu Hesu: Karai, mba'ety rãngaryre rynõhẽpy verã ko yy, hareka kypevãĩ'ẽjy pozo, mãrãrapo rỹmẽẽshekui vokava yy? ¹² Yreru Jacob rãnga heja'ore ko pozo, haiteiva hou hãndi tayre hareka hũmbare. Ndera mbai vasuveshi hai? ¹³ Hesu heishu: Opaiteva houva ko yy, hykuãĩpo ju'uhejykui; ¹⁴ tẽvã she ãmẽẽva yy houva, ju'uhe veamapokui. Ko yy she ãmẽẽvã houva, ikoposhikui yy õhẽ'õ rãĩmi pyape, mẽẽshu verã tykove opambava. ¹⁵ Haipe taupe heishu: Karai, mẽẽveshe vokava yy shu'uheveama verãve, mãhẽ aijykui ko pozope ãnohẽ verã yy. ¹⁶ Hesu heishu: Ekua mbeushu neme, hãrãpo reii hãndikui kope. ¹⁷ Taupe heishu Hesu: Shemẽã rãngashe. Haipe Hesu heishu: Haikavi rãnga rere mba'ety ryreva neme; ¹⁸ shara pandepotẽ ryre neme, hãrã ã'ẽ ryrekoryrea ha'ẽ'ãĩjy nemeĩte; ãẽteva rãnga rere. ¹⁹ Vokava taupe hẽndurã heishu Hesu: Karai, ahesha rãnga nde haiva Tumpa ĩñẽẽ mbeu'ia. ²⁰ Ore yrỹtynondeva Samaritanokue reta rãnga õmombaivasu Ñanderu Tumpa ko yvyturusu ẽvãpe, tẽvã pee Judiore pere Jerusalenpe õmomba'eashu verã. ²¹ Hesu heishu: Nde taupe, shyroja, vãhẽpokui ara peii veama verã ko yvyturusure pemombai vasu verã Ñanderu Tumpa hareka peho verã Jerusalenpe. ²² Pee samaritano reta rãnga pemombaishu pikuambava; tẽvã ore Judiova õmombaeashu kuaahava; shara Judio retaivipo ou pyrỹmondo jepeva. ²⁵ Haivi taupe heishu Hesu: She aikuaajyve ou verã Mesia, Kristo he'iashua; hai oumarã opa mbaipo mbeu kavi orekui. ²⁶ Hesu heishu: Hai rãnga she Kristo, rĩnjetarẽĩ hãndiva. ²⁷ Haipe vãhẽjy ou mboirea retarã hãirã hesha taupe ĩnjeta'i hãndirã. Tẽvã mbavẽã pyrãndushu mbaivara pota, ti mbaivarera ĩnjeta'i hãndi. ²⁸ Haivi taupe heja ñykambushirã, oho tẽntape heishu kuaretare: ²⁹ Pei pymãĩhe pẽnte kuimbai opaite kuaava ajapo vekuare. Ha'ẽãra kova Kristo? ³⁰ Hãrã kuaretare õhẽ tẽntaivirã, oho Hesu ẽvãpe. ³¹ Haipe mboireare hei jyvyĩshu reta: Pyrỹmboi'ia, karumitẽvẽ mĩshĩ. ³² Tẽvã Hesu heishu reta: Ĩmẽ rãnga are hau verã, pee pikuambava. ³³ Haivi mboireare õñepyrõ pyrãndu jyre ijupe: Veruharambashuje hou verã? ³⁴ Hesu heishu reta: Shĩmbiu hai ajapo shymbou vekua potava, hareka opa kavi ajaposhu verã hai heiva. ³⁵ Pee rãnga pere: “Hẽmby teri'ẽ ũrũndy jasy myno'õhã verã ñotỹava'ia”. Tẽvã she hai pee: Pymãĩhe ñõtyãvare opama javyje, myno'õhã verãima'ẽ. ³⁶ Hãrã ñotyãvã'ia mynõvã mẽ'ẽhãshu japova hepykue. Ko ñotyãva'ia myno'õhãvã rãnga hai tykove opambava pevarã, kỹrã vyapãvẽĩ verã ñimĩtyva hareka ñotỹava'ia mynovã. ³⁷ Ãñẽte rãnga ko ñẽẽ heiva: “Pẽnteĩ'ẽ ñimĩtyva, hãrã i'akue ỹngavare mynõjy”. ³⁸ She apyrỹ mondo pymynõ verã peemba piñotỹa; ỹngava reta rãnga mba'apohe hãrã haire ñotỹ vekua pymynõ'õĩma. ³⁹ Heta kuaretare Samariape'õ jyrojahe Hesu taupe heiva rupii: “Opaiteva rãnga mbeu sheje ajapo vekuare.” ⁴⁰ Hãrã Samaritanore vãhẽ jyraha Hesu ẽvãperã jurureshu reta pyta verã haipe; hãrã hai pyta mõkue ara, ⁴¹ hãma hetave'ẽ jyrojaheare shara hai retateima hẽndu Hesu ĩñẽẽ. ⁴² Hãrã heishu reta taupe: Ã'ẽ haiveama nde rerevãĩ rojahava. Shara oreteima hẽnduha hai heiva, hareka kuahama ãñẽteĩteva hai Kristo; kuaretare mondojepe verã. ⁴³ Mõkue arama hasarã, Hesu õhẽ Samariaivi ohojy verã Galileape. ⁴⁴ Shara Hesu teiva heiva, Tumpa ĩñẽẽ mbeu'ia mymorãhã hẽntape. ⁴⁵ Vãhẽma jyraha Galileaperã haipe'õre horype myvãhẽ, shara haire oho jyve Pascua areterã Jerusalenpe; hareka hesha reta opa mbai Hesu japo vekua aretepe. ⁴⁶ Haivi Hesu oujy Caná Galileape, yy, vino japoshi vekuape. Haipe ĩmẽ'ẽ jyve pẽnte mburuvisha, tay ñymbairasyva tẽnta Capernaumpe. ⁴⁷ Mburuvisha kuaama Hesu oho Judeaivi, hareka Galileape ĩmema'ẽjyrã, oho hai ẽvãpe jurureshu vãhẽ verã hẽntape, hareka mỹnguerashu verã tay, mano verãima'õ. ⁴⁸ Haivi Hesu heishu: Pee pyheshãã mbaikavi heshaha verã pyrỹmyngyjevarã, pyrojãpo. ⁴⁹ Tẽvã mburuvisha hei jyvyĩshu: Karai, ãrẽ'ãĩte'ei ndei shyray manorã. ⁵⁰ Haipe Hesu heishu: Ekuajy nyrẽntape, ndyray manoãpo. Ko kuimbai roja Hesu heishuarã ohojy. ⁵¹ Hãrã vãhẽjyma oho hẽntaperã, jokuereare õhẽ hỹvãitirã heishu: “Manoã ndy ray, kuerajyma.” ⁵² Haipe pyrãndushu reta mbai oraipira tay õñepyrõ haikavijy'ẽ, haire heishu: Kã'ãme ka'arumimarã opashi ñãka hasykue. ⁵³ Haipe sanjay tuu manduahe vokape kavi Hesu heishua: “Ndy ray manoãpo”. Hãrã hai hareka hoope'õre, opaiteva roja reta Hesu. ⁵⁴ Kova hai mõkuehea mbaikavi heshaha verã Hesu japo vekua, oujy Judeaivi Galileaperã.