¹ Ĩmẽnda'ẽ pẽnte kuimbai Fariseore mbytepe Nicodemo he'iashua, Judiore juhuvisha pẽnteva. ² Pẽnte pyhare oho Hesu ẽvãperã heishu: Pyrỹmboi'ia, kuaaha rãnga Ñanderu Tumpa teiva nymbou ỹrymboi verãrã, shara mba'ety katu japova ko mbaikavi heshaha verã nde rijapova Ñanderu Tumpa ẽã hãndirã. ³ Hãmã Hesu heishu: Ãẽteĩteva hai nde, oa py'ahujymba, katuãpo hesha Ñanderu Tumpa ẽvãpe. ⁴ Nicodemo pyrãndushu: Mãrãrapo pẽnte kuimbai kuakuamava oa py'ahujy? Icherapojy ishy hyepe oa py'ahujy verã? ⁵ Hesu heishu: Ãẽtẽĩteva hai nde, oa py'ahujymba yy hareka Espiritu rupii, katuãpo iche Ñanderu Tumpa ẽvãpe. ⁶ Opaite oava teru kuaretaivi, kuareta jyve; hãrã oava Espirituivi, espiritu jyve. ⁷ Avy kyje kyrã hai nderã: “Rea py'ahujy ñoĩpo” ⁸ Yvytu rãnga peju pota pejua kyty; rỹhẽndu mbyhy'apurã, tẽvã rikuãã mãĩvira ou hareka mãtyra oho. Kỹrã jyve opaite Espirituivi oa py'ahujyare. ⁹ Haipe Nicodemo hykuãĩ pyrãndujyshu Hesu: Mãrãrapo ikojy vokava? ¹⁰ Hesu heishu: Nde rãnga hai pyrỹmboi'ia kuaa katuva Israelpe, hãmẽra mãrã rikuããpo kova mbai? ¹¹ Ãẽte rãnga hai nde ore mbe'uha kuaahava, hareka kuaahaka pee ore hashahava; tẽvã pee pyrojãã mbe'uhapea. ¹² Ko yvy ĩãrẽ'õ ryheva ãĩnjetaherã shyrojãpirã, hãmẽra mãrãpo pyrojajy ãĩnjetahe mbai ara vate'õ ryhevarã? ¹³ Mba'ety jupiva vate arapy, haivi vejy vekuãĩ rãnga; Kuareta tay rãĩmi ou vekua yvy ĩãrẽ, ha'ẽĩ rãnga katu jupijy. ¹⁴ Hãmã Moise mũpũãva rãĩmi mboi hã'ãnga yvy ikoambaipi, kỹrãpo mũpũ'ãhã jyve ko Kuareta tay rãĩmi ou vekua yvy ĩãrẽ, ¹⁵ hãrã opaite jyrojaheare hipitypo tykove opambava. ¹⁶ Ñanderu Tumpa haihuite kuareta retarã, mẽẽ Tay pẽnte'ia, potãã jyrojahea manorã, koñẽĩ ĩmẽre verã tykove opambava. ¹⁷ Ñanderu Tumpa rãnga mbouã Tay yvy ĩãrẽ jyvarehe verã kuaretare, hai rupii ohojepe verãĩ rãnga . ¹⁸ Ñanderu Tumpa tay jyrojahea, jyvarehãpohe; tẽvã jyrojambahea jyvareapohe, shara rojãã Ñanderu Tumpa Tay pẽnteĩ'ia. ¹⁹ Jyrojambare jyvareamahe, sapeva yvy ĩãrẽ outẽã, tẽvã pyntuvãĩ haire pya ohovehe sapevatẽ verã, shara mbai porãmba japo jyre. ²⁰ Opaite mbai porãmba japo'iare, mymorãã kõĩvãpe'õ, hareka ñymbojãã kõĩvãpe shara potãã heshaha mbai porãmba japo'irã. ²¹ Tẽvã mbai ãñẽteva japo'iare ñymboja hai kõĩvãpe, heshaha verã Ñanderu Tumpa ẽẽ hãndiva opaite mbai japovape. ²² Haivi Hesu oho hãndi mboireare yvy Judea kyty, haipe pyta reta mbovy ara, myngarai kuaretare. ²³ Juan pyrỹmyngarai'ẽjyve Enónpe, Salim hyvache, shara yy heta'ẽ haipe. Kuaretare vãhẽ haipe ñymỹngaraika. ²⁴ Kova mbai iko ndeiteri Juan raha mbyperesoarã. ²⁵ Haipe Juan mboireare õñepyrõ hehei jyre ijupe hãndi pẽnte Judiova, ijoheva ryheva rehe. ²⁶ Haivi haire oho heishu Juan: Pyrỹmboi'ia, kueve yy syryva Jordan hyvache rikori hãndi vekua, hareka rĩnjeta kavirihea, ã'ẽ pyrỹmyngaraima'i jyve hareka opavare ou hai ẽvãpe. ²⁷ Haipe Juan heishu reta: Mba'ety ĩmerẽ verã mãĩnunga Ñanderu Tumpa mẽ'ẽãshurã. ²⁸ Pee teiva rãnga shyrẽndu hairã vẽkua: She ha'ẽã Kristo, hỹnonderã mbouhavãĩ rãnga. ²⁹ Ômendava ikovape tyrekorã ĩmẽrea hai temerã; hareka temerã ñi'ĩru haipe'ẽ hẽndu ĩnjeta'ẽrã mbyvy'aite. Kỹrãĩ jyve she avy'aite ãĩ jyve. ³⁰ Hai rãnga vatevepo oho'i ñymbaikatukue ryheve, tẽvã she avejyvepo aha ai. ³¹ Ko vate araivi ou vekua rãnga, opavare ĩãrẽ'ẽ. Kuaretare yvy ĩãrẽ'õ, yvy ĩãrẽ'õvãĩ ĩnjetahe; tẽvã vate araivi ou vekua opavare ĩãrẽ'ẽ. ³² Hai mbeu hesha hareka hẽndu vekua; tẽvã mba'ety rojava. ³³ Tẽvã ĩmẽ'ẽ rojavarã, my'ãñete Ñanderu Tumpa heiva, ³⁴ hãrã Ñanderu Tumpa mbou vekua ĩnjetahe Ñanderu Tumpa ĩñẽẽ, shara Ñanderu Tumpa mẽẽshu Espiritu Santo. ³⁵ Ñanderu Tumpa rãnga haihu Tay, hãrã opa mba'e ñono ipope. ³⁶ Hãrã Tayre jyrojava ĩmẽmare tykove opambava; tẽvã Tay rojambava, hipityãpo vokava tykove, koñẽĩpo hipity ñunũpa pohyva Ñanderu Tumpaivi ouva.