¹ Mbahapy arajyape iko õmendava Canápe tẽnta Galileape'õ. Hãrã Hesu ishy haipe ĩmẽ'ẽ jyve. ² Hesu hareka mboireare hãndi mbe'uhajyveshuretaohoverãre ³ Hãrãvinomba'etymashuretarã, Hesu ishy hei: Opamashi reta vino! ⁴ Hesu heishu ishy: Taupe, mãrã'ĩrãra kỹrã rereshe? Nde'iave rãnga teri vãhẽ shy ora. ⁵ Hãrã ishy heishu haipe jokueha'õre: Pijaposhukui opaite Hesu heipeva. ⁶ Haipe ẽẽ 6 kambushi yy hyru, Judiore ijoheserã poryvare, haire ohohea japoseva rãĩmi. Pepẽntẽĩ javeva yy 50 hareka 60 litro rupii. ⁷ Hesu heishu jokueha'õre: “Pymynyhẽ yy kova kambushire” Haivi mytynyhẽ ñono reta. ⁸ Hesu heishu reta: “Ã'ẽ pynohẽ mĩshĩ hãrã pyrahashu karu vasu ñyngareko'ihea.” Hãrã kỹrã japo reta. ⁹ Haipe karu vasu ñyngareko'ihea hããre vino yy japoashiva, kuamba ryheve mãĩvira nohẽhã kova vino, jokueha'õ retaĩ kuaa, shara haire nohẽ yy hyruivi. Hãrã karu vasu ñyngareko'ihea hẽno tẽmerã. ¹⁰ Hãrã heishu: “Opava reta rãnga ñono voka vino kapyryva karu vasu õñepyrõ mãrã, haivi hẽnohãka vare hetama hourã piñokui vino porãmbava. Tẽvã rỹnatumba vino kapyryva ã'ẽ peve. ¹¹ Kova mbaikavi heshaha verã, Hesu japo vekua Caná yvy Galileape hai tỹnondeite japova. Kỹrã hai heshaka ñymbaikatukue hãrã mboirearejyrojahe. ¹² Haivi Hesu oho tẽnta Cafernaumpe, mĩ'ĩrũshu ishy, tyvyre hareka mboireare; haipe mbovy ara pyta reta. ¹³ Vãhẽ serima Pascua Judiore jy'areterã, Hesu oho tẽnta Jerusalenpe. ¹⁴ Haipe tupaope hesha õvende'õre vaca, avisha hareka pykasu. Tẽvã ĩrũre vapy ñynõĩ mesape, ova ñynõĩshi kuaretare kyrypoti ỹnga tẽntaivi veruvare. ¹⁵ Hesu hesha vokavarã, heky pẽnte tukumbu, hãrã opa mõhẽ reta tupaovi hũmba ryheve avisha hareka vaka. Mbijapara kyrypoti tẽnta yngaivi veruava ova'õre ñymesarã, opa ityshi jykyrypotire yvype. ¹⁶ Pykasu õvende'õre heishu: “Kovare pynohẽ koivi! Avy pijaposhi Sheru hoo mba ovaha'ẽ ipea!” ¹⁷ Haipe mboireare manduahe Ñanderu Tumpa ĩñẽẽ kuatiape heiva: “Ndero ahaihuitẽrã shy poshykue tata rãĩmi vejy shyrehe”. ¹⁸ Haipe Judiore pyrãndushu: Mãrãva mbaikavi heshaha verãrapo ryheshaka ore, kuaaha verã ẽẽ ndeva kova rijapo verã? ¹⁹ Hesu heishu reta: Opa pymambai ko tupao, mbahapy arape ãmupũã py'ahupojykui. ²⁰ Haipe Judiore heishu: 46 año pukukue rãnga japoha kova tupao mũpu'ãhã verã; hãmera nde mbahapy arapẽĩpo rũmu'pũãjykui? ²¹ Tẽvã Hesu ĩnjetahea hai, ha'ei hete. ²² Hãrã Hesu kykovejyma manoare mbyteivirã, mboireare manduahe ko hei vekuare, hãrã roja reta Ñanderu Tumpa ĩñẽẽ kuatiape'õ hareka Hesu heishu vekuare. ²³ Hesu ĩmẽ'ẽ Jerusalenpe Pascua areteperã, heta'ẽ jyrojahea shara hesha reta mbaikavi heshaha verã hai japova. ²⁴ Tẽvã Hesu rojãã reta, shara hai opa pyrykuaa. ²⁵ Ikotẽvẽã mbe'uashu verã mãrãvã kuaretara, shara hai opa kuaa kuaretare pyape'õ.