¹ Ndeiteri opa mbai ẽẽrãvãĩ, ẽẽmãĩ arykai vokava Ñẽẽ; hãrã Ñẽẽ ẽẽ hãndi Ñanderu Tumpa, hãrã vokava Ñẽẽ hai Tumpa. ² Ñanderu Tumpa opa mbai japo'ẽrã, haipe ẽẽjyve hãndi vokava Ñẽẽ. ³ Vokava Ñẽẽ rupii opava mãĩnunga japoha, hãrã mba'ety ã'ẽ ẽẽvare haimbape japohava. ⁴ Hai ẽẽhe tykove, hãrã vokava tykove hai kuaretare sapeheva. ⁵ Hãrã voka hendyva sape timimbivape, hãrã timimbiva katuã mbovejy. ⁶ Ĩmẽmba'ẽ arykai pẽnte kuimbai Juan he'iashua, Ñanderu Tumpa mbouva. ⁷ Hãrã vokava ou kuaa kaviveva, mbeushu verã kuaretare kova mbai sapeva ryheva, hareka opavare jyroja verã hai rupii. ⁸ Juan ha'ẽãmba mbai sapeva; koñeĩ mbeu kavive verã ko sapeva ryheva. ⁹ Hãrã ko sapeva ãñetẽĩteva, hai sapehe verã kuaretare; vãhẽ serima ou ko yvy ĩãrẽ. ¹⁰ Vokava Ñẽẽ rãnga ẽẽ ñõĩmba yvy ĩãrẽ, ajemaĩ Ñanderu Tumpa japotẽ vẽkua ko yvy vokava Ñẽẽ rupii, tẽvã kuaretare kuããshu. ¹¹ Hẽntapetei ou, tẽvã hẽnta ĩrũre myvãhẽãshu. ¹² Tẽvã opaite myvãhẽshuva hareka jyrojahevare; ikoshi reta Tumpa tay. ¹³ Ha'eã kuareta tayre rãĩmiva, hareka kuareta potava rupii oava; Ñanderu Tumpa tay reta rãnga hai. ¹⁴ Hãmã vokava Ñẽẽ iko kuimbai rãĩmi ñanymbytepe, jyhaihu hareka ãñeteva tyñyhẽ. Ore heshaha himbipekue, Ñanderu Tumpa tay pẽnteĩ'ia himbipekue. ¹⁵ Juan ĩnjetaherã hei: “Kova hai she ãĩnjeta aihe vekua. She hai pee shaykue ouva mbai vasuve shyheviva, shara ẽẽmaĩmba hai arykai ndei aarã ” ¹⁶ Hai tynyhẽ jyhaihukue, hãrã opaite hipityka ñande mbaikavikue. ¹⁷ Ñanderu Tumpa ĩñẽẽ mẽ'ẽha Moise mbypara vekua rupii, tẽvã jyhaihu hareka mbai ãñẽteva vãhẽ ou Hesukrito rupii. ¹⁸ Mba'ety Ñanderu Tumpa heshava; Tay pẽnteĩ ia, ẽẽvã Tuu hãndi, mbeu ñande mãrãvara hai Ñanderu Tumpa. ¹⁹ Judiore juhuvisha Jerusalenpe'õre mondo pai hareka Levitare Juan ẽvãpe, pyrãndushu verãre haira mbava jyve. ²⁰ Haipe Juan heishu reta: She ha'ẽã Kristo! ²¹ Haipe hykũãĩ pyrãndujyshu reta: Mbavara nde? Ndera hai Tumpa ĩñẽẽ mbeu'ia Elias? Juan hei: Ha'ẽã rãnga. Haipe pyrãndu jyshu reta: Akuarã, ndera hai Tumpa ĩñẽẽ mbeu'ia hãrõha'õva? Hãrã Juan hei: Mba'ety. ²² Haipema heijyshu reta: Akuarã, mbaveitera nde? Mbe'uhashu verã jyve yrỹmbouvare. Mbeu ore mbavaitera nde? ²³ Juan heijyshu reta: She rãnga hai sapuke'ia yvy ikoambaipi: “Pymyhẽvãshu pe symyĩva Ñanderu Tumpa pevarã”, Tumpa ĩñẽẽ mbeu'ia Isaias heiva rãĩmi. ²⁴ Juan oho ĩnjeta hãndi vekuare hai Fariseore jokueva. ²⁵ Haipe Fariseore jokueva pyrãndujyshu: Akuarã, mãrã'ĩrãra rypyrỹmyngarai ha'ẽã nde Kristo, ti Elias, ti Tumpa ĩñẽẽ mbeu'iarã? ²⁶ Juan heishu reta: Yypeĩ, she apyrỹmyngarai; tẽvã pynymbytepe ĩmẽ'ẽ pẽnte pikuambava. ²⁷ Vokavahaishaykueouverã, mbaivasuveshyheviva. Hãrã ẽẽãshe jypasa ĩshãĩ ajorashu verã. ²⁸ Opaite kova mbai iko tẽntaBetaniape, ysyryvaJordanhyvaishokyty, Juanpyrỹmyngarai'i vekuape. ²⁹ Pareemajyrã, Juan hesha Hesu vãhẽ ou hai ẽvãperã hei: Pymãĩhe kova hai Ñanderu Tumpa avisha, hekyshi verã kuaretare mbai porãmba vekua! ³⁰ Kovare rãnga ãĩnjetarã hai aryka'e: “Shaykue ou pẽnte kuimbai mbaivasuve shyheviva, ẽẽmaĩmba hai arykai ndei aarã.” ³¹ She aikua kaviã jyve mbavara, tẽvã she ai apyrỹmyngarai yype Judiore kuaa verã, mbavara hai. ³² Juan hei jyve: She rãnga ahesha pykasu rãĩmi vate araivi Espiritu Santo vejyherã. ³³ She aikuã teri jyve mbavara hai; tẽvã shymbou vekua apyrỹmyngarai verã yype, heishe: “Ryheshama pẽnte kuimbai vejyhe Espiritu Santorã, vokava hai pyrỹmyngaraiva Espiritu Santopy”. ³⁴ She aheshama, hãrã aikuaa kavima hãrã ambeujyve hai ñõĩva Ñanderu Tumpa tay. ³⁵ Pareemajyrã, Juan ẽjy hãndi mõkue mboireare. ³⁶ Juan hesha Hesu hasa oho haipirã, hei: “Pymãĩhe, vokava hai Ñanderu Tumpa jy'avisha!” ³⁷ Hãrã Juan mboireare mokue'ia hẽnduma voka Juan heirã, jyraha hipii reta Hesu. ³⁸ Haipe Hesu mãĩ haykuerã hesha ou hipiaretarã pyrãndushu: Mbaivara pyhekapi? Haire hei: Rabi, he'iseva Pyrymboi'ia, mapera rikori? ³⁹ Hesu heishu reta: Pei pymaĩhe. Jyraha hãndi retarã hesha mapera iko'i, haipe pyta jyve hãndi reta voka arape; shara ka'arumarã. ⁴⁰ Mokue'iare pẽnteva hẽndushu vekua Juan hareka ohova Hesu haykue, hai Andres, Simon Pedro ñymoña hãndia. ⁴¹ Tynonde Andres japova hai oho hekaticheySimón; hãrãheishu: VãhẽãrãngashujeMesías! He'iseva Kristo. ⁴² Haivi Andres raha Simon Hesu ẽvãpe. Hesu maĩherã heishu: Nde hai Simón, Jonas tay, tẽvã ã'ẽ nymbyheapo Pedro! He'iseva ita. ⁴³ Pareemajyrã, Hesu kyrẽy oho Galilea kyty. Haipe hesha Felipe hãrã heishu: Ei shĩmi ĩrũ. ⁴⁴ Felipe hai Betsaidape'õ, Pedro hareka Andres iko'iape. ⁴⁵ Haivi Felipe oho heka Natanael, heshamarã heishu: Vãhẽha rãngashu kuimbai, Moise hareka Tumpa ĩñẽẽ mbeu'iare mbypararã ĩnjeta'ihe vekua Ñanderu Tumpa jykuatiape. Vokava hai Hesu, José tay Nazaretpe'õ ⁴⁶ Natanael hei: Katura Nazaretvi õhẽ mbai haikaviva? Felipe heishu: Ei mãĩhese. ⁴⁷ Hesu hesha Natanael vãhẽ ourã hei: Kõõ ou pẽnte Judio ãñetẽĩteva, japumbava. ⁴⁸ Natanael pyrãndushu Hesu: Mãrãĩra shykuaa? Hesu heishu: Felipe ndei nyrẽnorãvãĩ rãnga aryreshaje, yvyra igo ipe ryvapyrirã. ⁴⁹ Natanael heishu: Pyrỹmboi'ia, nde rãnga hai Ñanderu Tumpa tay; nde hai Israel Juhuvisha vasu. ⁵⁰ Hesu heishu: Aryreshaje igo ipe ryvapyrirã hainderãmeĩra, shyroja? Ryheshave rãnga teripo mbai vasuve kova mbaivi. ⁵¹ Hesu heivejyshu reta: Ãñẽtẽĩte hai pee, pyheshapokui ara vate'õ jypearã hareka Tumpa jokuevare jupi hareka vejy ñynoĩ ĩãrẽ ko Kuareta tay rãĩmi ou vekua yvy ĩãrẽ.