¹ Hesu heijyshu reta: Añẽteiteva hai pee, ĩmẽ'ẽ kopepẽivã manomba verã, heshã teri Mburuvisha vasurã vate araivi ouva mbaikatu ryheve oujymarã. ² Haiv 6 arama hasajyrã, Hesu koñeĩ raha Pedro, Santiago, hareka Juan, oho hãndi reta yvyturusu vate'õpe; hesapẽĩ Hesu hete opa ỹngai'ẽ. ³ Mondeva himbiperã tĩĩrai, mba'ety mondeava johe'ia yvy ĩãrẽ'õ kyrãite mitĩĩjy verã. ⁴ Haipe ijeshakashu reta Elias hareka Moise, ĩnjeta ñynõi hãndi Hesu. ⁵ Haivi Pedro heishu Hesu: Pyrỹmboi'ia. Haikavi kope ĩmehã'ẽrã! Jajapo mbahapy oo kapii raimĩ, pẽnte na'ãpõrã, ĩrũ Moise ña'ãporã hareka Elias pevarã jyve. ⁶ Shara Hesu mboireare kyjekue japyraha retarã, Pedro kuããmba marãra hei'i. ⁷ Haipe sapy'ãĩ vejy ĩãrẽ ãvãpỹntu, opa jasoi reta. Hãrã ãvãpyntuivi ñyhẽndu ñẽẽ heiva: Kova hai Shyray ahaihuva, pijaposhu heiva. ⁸ Haivi sapy'ãi mãĩjy juriretarã, mba'etyjy hesha'ẽ hãndiare, koñẽĩ Hesu hã'ẽĩ i. ⁹ Vejyjyma jyveru yvyturusuivirã, Hesu heishu reta avy mbavape mbeu verãre ko heshava, Kuareta Tay rãĩmi ou vekua yvy ĩãrẽ kuerajypeve manovare mbyteivi. ¹⁰ Hãrã nãtu reta vokava ñẽẽ, tẽvã pyrãndujyre ijupe mbaivara he'ise pũãjy manovare mbyteivi. ¹¹ Pyrãndushu reta Hesu: Marãjyrãra Moise mbypara vekua pyrỹmboi'iheare heijyre Elias rãni ou verã? ¹² Hesu heishu reta: Âñete rãnga, Elias rãnipo ou opa mbai ñono kavi verã. Hãmera marã'irã kyrã heijy Ñanderu Tumpa iñẽẽ, Kuareta Ray rãĩmi ouva yvy ĩãrẽ hasa'asy verã hareka mymorãhamba verã? ¹³ Tẽvã she hai pee Elias ouma rãnga, pota japohevãĩ japohe reta; Ñanderu Tumpa ĩñẽẽ heiheva rãimi katĩ iko. ¹⁴ Haivi oujy reta mboireare'õperã hesha kuareta hetava jere vasĩhe, hareka Moise mbypara vekua pyrỹmboi'iheare, ijao ñynoĩ hãndi reta. ¹⁵ Kuaretare Hesu heshamarã, mbyrymairetarã opa ñani jyraha marãndushu. ¹⁶ Hesu pyrãndushu reta: Mbaiva rehera pijaopẽĩ hãndi reta? ¹⁷ Haipe pẽnte kuimbai hetava mbyteivi heishu: Pyrỹmboi'ia! Kope aru nde shyray, Ãña ichepyrã ma'engureva, ¹⁸ hãrã mãĩpi ĩme'õĩpi ityshu yvyperã, juru mbytyryju, hãĩre mbi'ipurã, opa mbi'ipy seve. Hãmã rymboiryreare airurematẽshuje mohẽshi verã, tẽvã haire katuã mohẽ. ¹⁹ Hesu heishu reta: Ko kuareta jyrojambare! Mbaipeverapo ãi penendie? Mbaipeverapo aiko pyndyrehe? Perushe kope kunumi ray! ²⁰ (PAUSA) Haivi verushu reta kunumi ray; tẽvã ãña heshama Hesurã, hỹnatu opa mbyryry kunumi ray, ity yvyperã japajere'i hareka juru opa mbytyryju. ²¹ Hesu pyrãndushu kunumi ray tuu: Mbaipevãĩra kova jehushu? Tuu hei: Ndei ryhevevãi rãnga kỹrã'i. ²² Heta rãnga ity tatape hareka yype potaite jukarã; ĩme'ẽ katu rijapohevarã, yrypareko hãrã ỹrỹmbory mitẽ. ²³ Hesu heishu: Marã'irãra rere katurã? Katura rirojaĩ. Op mba'e rãnga katu, jyrojava pevarã! ²⁴ Haipe kunumi ray tuu sapukerã hei: Airoja rãnga, shymbory tairoja katu!. ²⁵ Hama Hesu heshama heta kuaretare jatyherã, hãrã ñygãta, mbai poshyperã hei: Nde, mbai poshy ña'ẽngu hareka japysamba, she hai nde: Êhẽshi, ỹtẽñoma ichepykui. ²⁶ Haipe mbai poshy sapuke, hỹnãtu opa mbyryry kunumirã õhẽshi; juka ñonorã manova rãĩmi ẽ kunumi, hãrã heta ẽ heiva: Manoma. ²⁷ Hesu katy pysyshu ipoperã, mupuã kunumi ray. ²⁸ Haivi Hesu iche o ipe, hã'ẽĩ õpe mboireare pyrãndushu : Marã ĩrãra mbai poshy katuã mõhẽã shi ore? ²⁹ Hesu heishu reta: Kỹrãvã mbai poshy, mbaiva peã katu õhẽ, koñei karumba hareka ñymboipe ñaĩrã. ³⁰ Ôhẽjy reta haivirã hasa jyraha Galileaipi, tẽvã Hesu potã mbava kua. ³¹ Shara mboi ẽ mboireare hãrã heishu: Ko Kuareta tay rãĩmi ou vekua yvy ĩãrẽ, mẽ ẽã pokui kuaretare ipope; haire juka pokui, hãmã jukamarã mbahapy ara pepo kuerajykui. ³² Hairetany kũã mbaivara he'ise voka hai heiva, hãrã kyje pyrãndushu reta. ³³ Vãhẽ jyraha Capernaumpe, o ipema ñynoirã Hesu pyrãndushu reta: Mbaiva rera pinjeta peiheje pehupi? ³⁴ Tẽvã haire jasasakãi jyre, shara pehupi ĩnjeta mba jyveruhe, mbavara haire mbytepe vateve ẽ. ³⁵ Hãmã Hesu vapyrã hẽno (12) iare, haipe heishu reta: Ĩmẽ'ẽ pota vateve iarã, ikopo taykue õ rãĩmi, hareka opava retapepo mbory. ³⁶ Haipe ñono haire mbytepe pẽnte sanjay, hupirã heishu reta: ³⁷ Ĩmẽ'ẽ myvãhẽva shyreepe kova sanjay rãĩmi, she rãnga shymy vãhẽ. Shy myvãhẽva ha'ẽã shẽĩ shy myvãhẽva, shymbou vape rãnga myvãhẽ jyve. ³⁸ Juan heishu: Pyrỹmboi'ia, hesha rãngaje pẽnte kuimbai mohẽva mbai poshy ndyreepe, tẽvã jochaha shije, shara ha'ẽã jaiko jai hãndiarã. ³⁹ Tẽvã Hesu hei: Avy pijocha, mba'ety mbai kavi heshaha verä vateivi ouva japova shyreepe, ĩnjeta porãmba ijy shyrehe verã. ⁴⁰ Ko ñymbyvaisho mba ñandy reheva ẽ ñanendie. ⁴¹ Ĩmẽ'ẽ mẽẽpea yyintẽvã, Kristoryheva perã, ãẽtẽĩ teva hai pee hykovia ñõĩ poshu. ⁴² Ĩmẽ'ẽ ityva mbai porãmbape pẽnte mishĩ teriva jyroja shyreheva, haikavive rãnga poshu jokuaha ita marẽyva mongu'iapya jajurerã momboha yyvasupe. ⁴³ Ndepo ndiritypo mbai porãmba perã, jasyja; haikavi vepo ndepo hyvaishõi riche tykove ãñetevape, mahẽ ndepo mõkue ryheve rehokui Ãña ẽvãpe, tata katumba oveape, ⁴⁴ haipe tasore manoã hareka tata ove ãĩtei. ⁴⁵ Ndepy ndirity mbai porãmba perã, jasyja; haikavi vepo nde py hyvaishõi riche tykove ãñetevape, mahẽ ndepy mõkue ryheve nymomboha kui Ãña ẽvãpe, tata katumba mbovea vape; ⁴⁶ haipe tasore manoã hareka tata ove ãĩtei. ⁴⁷ Ndyresa ndirity mbai porãmba perã, nohẽ ndijuhuvi; haikavi vepo ndyresa hyvaishõi riche Ñanderu Tumpa Êvãpe, mahẽ ndyresa mõkue ryheve nymomboha kui Ãña ẽvãpe, ⁴⁸ haipe tasore manoã hareka tata ove ãĩtei. ⁴⁹ Shara opava reta joheapo tatape. ⁵⁰ Haikavi rãnga juky; tẽvã hymboshy veãmarã, mbaivape rapo pymymboshy jykui? Pyreko juky pyndypyape, hareka opavare piko kavi hãndi.