¹ Pẽnte arape hykuãĩ heta jatyjy kuaretare tẽvã mba'ety hou verãre. Hãrã Hesu hẽno mboirearetarã heishu: ² Aparekonyteshu kuaretare. Mbahapy arama ẽẽ shendieva, mba'ety hou verãre. ³ Ñymbahy ryheve amondojy hẽntaperã, ĩmepo'ẽkui pya mamano'ia pehupi; shara ime'ẽ mbyryivi ouvare. ⁴ Mboireare heishu: Maĩvirapo ñavãhẽshu ñamyngarupy verãre, mba'ety koipi ikova? ⁵ Hesu pyrãndushu reta: Mbovy pãhãra ĩmẽpyre? Haire hei: shiu (7) pãhã. ⁶ Hãmã mbyvapyka kuaretare; haivi heky shiu'ia (7) pãhã, ñymboi'ĩarẽ Ñanderu Tumpape, pyseãrã mẽẽshu mboireare memẽẽshu verã opaite kuaretare. ⁷ Hãrã mbovy ĩmerejy reta pira mishishiva, ñymboijy ĩarẽrã memejyshu reta. ⁸ Opaiteva karu hareka hỹvãta reta, haivi pysẽvẽ hemby vekua mynõjy retarã, 7 kanata mynyhẽ jyreta. ⁹ Haipe 4000 kuareta rupi ẽẽ karu vẽkuare, haivi Hesu opa mondojy. ¹⁰ Hesu jupijy kanoãpe mboireare hãndirã, oho Dalmanuta kyty. ¹¹ Haipe vãhẽ jyveru Fariseore pyarãshu verãre Hesu, hãrã haire jurure mbai heshaha verã vate araivi ouva. ¹² Hesu poshy ryheve putuhẽ mondorã hei: Marã'irãra kova kuimbaire jurure mbai heshaha verã? Ãñetẽiteva hai, me'ẽhã rãngapope pota pyheshava. ¹³ Haipe hejashu reta, hãrã Hesu jupi kanoaperã ohojy yy hyvaisho kyty. ¹⁴ Haipe mboireare sarembahe reta pãhã hou verãre, hãrã pẽnte pãhãimba ĩmere reta kanoape. ¹⁵ Hesu tãnta jurure shureta: Pymãĩ kavi, pingareko pijeheshi Fariseo hareka Herodes harina mby'ouka rãĩmiva. ¹⁶ Hesu mboireare injeta ñynoi ijupi: Pãhã jaruarãra kyrã hei'i. ¹⁷ Hesu kuaarã heishu reta: Marã'irãra kyrã pinjeta pãhã mba'ety pyreva? Pymandu'ãra, ti pikuãra teri? Pyndypya tãtãiteira teri? ¹⁸ Pyndyresa rãngapi, pyheshãra? Papysa rãngapi, Pyhẽnduãra? Pynymanduãrahe ¹⁹ ãmbijaorã vẽkua pandepo pãhã 5000 pevãrã, mbovy kanatara pymynyhẽjy hemby vekua? Haire hei: 12 kanãta. ²⁰ Hãrã ãmbijaorã vẽkua 7 pãhã 4000 pevãrã, mbovy kanatara pymbatyrã pymynyhẽjy hemby vekua? Haire hei: 7 kanata. ²¹ Hesu heishu reta: Pikuãra teri? ²² Hesu hareka mboireare vãhẽ jyraha Betsaidape, haipe veruashu pẽnte kuimbai heshamba kũvãĩpia, jurure jyreshu Hesu pokohe verã. ²³ Hesu pysyshu ipope heshamba kũvãĩpiarã nohẽ tẽntaivi raha katuape, myndyvy hesarerã ipo ñono ĩãrẽ; haipe pyrãndushu heshara mãĩnunga. ²⁴ Haipe heshamba kũvãĩpia hei: Ahesha kuaretare, tẽvã yvyra vata'iare rãĩmi ahesha. ²⁵ Hesu hykuaĩ ñonojyshu ipo hesare ĩãrẽ, hãrã kuimbai heshajy kavi kũvãĩpi. Haipevãĩ kuerarã, opaĩ hesha kavi ã'ẽ. ²⁶ Haivi Hesu mondojy hẽntaperã heishu: Avy ekuajy tẽntape. ²⁷ Haivi Hesu hareka mboireare oho tẽntamire'õipi Cesarea Filipope'õre. Pehupi Hesu pyrãndushu mboireare: Mãrãra hei shyrehe kuaretare? Mbavara she? ²⁸ Haire heishu: Ĩmẽ'ẽ hei ndy reheva Juan Bautista, ĩmẽ'ẽjy heiva Elias, ĩrũre heijy ndyrehe nde haiva Tumpa ĩñẽẽ mbeu'iad aryka'eite vekua. ²⁹ Hãrã Hesu pyrãndushu mboireare: Pee jyveno, mãrãra pere jyve shyrehe, mbavara she? Pedro heishu: Nde hai Kristo. ³⁰ Hesu tãnta heishu mboireare, kova mbai avy mbeu verãre mbavape. ³¹ Hesu õñepyrõ mbeushu mboireare hai Kuareta Tay rãĩmi ouva yvy ĩãrẽ hasa asyñoi verã, heshatambaa verã judio juhuvishare, pai ruvishare hareka Moise mbypara vekua pyrỹmboi'iheare. Heijyshu reta hai jukaha verã, tẽvã kuerajypo mbahapy arape. ³² Hesu mbeu kavishu reta kova, hãrã Pedro raha yngaity hã'ẽĩrã, poshy ryheve heishu ỹtẽñoma kỹrã ĩnjeta verã. ³³ Tẽvã Hesu jerepyrã, mãĩ jykoty mboirea retarã ñygãtashu Pedro: Syry shyhevi Ãña! Ñanderu Tumpa heshava rãĩmiã ryhesha nde kova mbai , kuaretare heshava rãĩmi ryhesha nde kova. ³⁴ Haipe Hesu hẽno mboireare hareka kuareta retarã hei: Ĩme'ẽ pota shaykue ouvarã, tiñymbysare ijuhuvi, tuhupi jukurusu ñyvãpẽkare, tou shaykue. ³⁵ Shara hykove haihuva, hekyajyposhikui. Tẽvã hykove mẽẽ shy reheva hareka ñẽẽ kaviva rehe, ojepepo. ³⁶ Mbaivara mbijehupo pẽnte kuareta opa ĩmẽreva ko yvy ĩãrẽ'õ, manoshirã. ³⁷ Mba'ety mãĩnunga kuareta hykove mbyhepyjypy verã. ³⁸ Ĩmẽ'ẽ mbava shynotiva hareka shi Ñẽẽ notiva ko kuaretare jyrojambava hareka heko porãmbare hynondeva, she Kuareta Tay rãĩmi aiva ko yvy ĩãrẽ, ãnotipo jyveshu retakui aijyma Sheru himbipepyrã hareka Tumpa jokueva heko kavivare hãndi.