¹ Haipe ñymboja Hesu ẽvãpe Fariseore hareka Moise mbypara vekua pyrỹmboi'iheare, Jerusalenvi ouva. ² Kovare hesha Hesu mboireare ã'ãmo karu ñynoĩ ipo kya ryheverã, jypoimbaa ryheve, ĩnjeta porã jyrehe. ³ Shara Fariseore hareka yngaa Judiore, tynondevare ikova rãĩmi ĩmeĩ japo, karuã reta jypoi kaviãrã. ⁴ Hãmã oujy mãĩnũnga ovaha'õĩvirã ho'uã ovava ndeiteri joherã, heta ĩmẽverejy kỹrãvã haire jypykuava: Yy ho'uapya joheañõĩpopy, opaite timbiporyre, hareka ochehahea. ⁵ Hãrã Fariseore hareka Moise mbypara vekua pyrỹmboi'iheare pyrãndushu Hesu: Mãrã'ĩrãra rỹmboivare japoã tynondevare heiva rãĩmi, jypoimba ryhevẽĩ karu jyre? ⁶ Hãmã Hesu heishu reta: Pee hapishatamba'iare! Hei kavi pyndyrehe Tumpa ĩñẽẽ mbeu'ia Isaias, jykuatiape heiva rãĩmi: “Kova tẽntape'õ reta rãnga jurupeĩ shemombai jyre, tẽvã pyare mbyry ⁷ shyhevi. Hãrã shemombai rã'ãngai jyre, shara kuareta hei vekuaĩ pyrỹmboi jyrehe." ⁸ ." Pee rãnga pijapoã Ñanderu Tumpa heiva, kuareta japo vekuãĩ pijapo. ⁹ Heijyshu reta: Pee pipykuava rãimi pijapopirã, pijapoã Ñanderu Tumpa heiva. ¹⁰ Shara Moise hei: “Hẽndushu nderu hareka ndesy heiva hareka ñyngarekohe reta” tẽvã “ĩmẽ'ẽ tuu hareka ishy jahe'ihearã, jukahapovekui". ¹¹ Tẽvã pee perekuei: Pẽnte kuimbai heishuva tuu hareka ishy: “Katuãny ãrỹmbory, shara opaiteva ĩme'areare hai Corban (he'iseva: “Tumpa pevãrãi”). ¹² Hãmã kỹrãma heirã, pee pereshukuei katuveamapo mboryshu tuu hareka ishy. ¹³ Kyrã pimbijiche Ñanderu Tumpa ĩñẽẽ, pipykuava rãimi pijapopirã, hãrã heta mãĩnunga kyrãva pijapo. ¹⁴ Haivi Hesu hykuãĩ hẽnojy kuareta hetavarã heishu: Pijasakashyre opaiteva pikuaa kavi verã: ¹⁵ Mba'ety ho'uavare kuimbai myngyashu verã Tumpa hynonde; pyaivi õhẽva rãnga katu myngyashu Tumpa hynonde. ¹⁶ Ĩmẽ'ẽ japysa'iarã, tỹhẽndu. ¹⁷ Hesu hejamashu kuaretarã iche pẽnte oo'ipe, haipe mboireare pyrãndushu; mbaivara he'ise vokava ñẽẽ ñymyhã'ãnga? ¹⁸ Hai heishu reta: Peeavera pikuã kova? Pikuããmba kuimbai houva katuã myngyashu? ¹⁹ Shara icheã pyape, hyepẽĩ vãhẽrã haivĩma õhẽjyshi. Kỹrã Hesu heirã he'isema opaite ho'uavare kyamba. ²⁰ Hãrã heijy: Kuaretare pyaivi õhẽva ñẽẽ porãmba rãnga, myngya. ²¹ Ñandypyaivi rãnga õhẽ mbai porãmba vekua, õmendava ỹnga mãĩ'ijyhea, õmendambape jyrekova, purukava, ²² manarõ, mbai pota raiviva, ñarõva, japuva, ñynotimbaa, kateỹva, juruvaiva, jyroja ijeheva, opaisharei'iva, ²³ opaite kova mbai porãmba õhẽ ñandypyaivi, hãrã ñanymyngya. ²⁴ Haivi Hesu oho Tiro hareka Sidon kyty; haipe iche pẽnte oope potã mbava kuaarã, tẽvã katũã ñemĩ; ²⁵ pẽnte taupe memby kuña Ãña ichepya, hẽndu Hesu he'iahevarã, ou ĩñesu hỹnonde. ²⁶ Kova taupe hai Griega, tẽnta Sirofeniciaivi ouva. Haipe jurure asyshu Hesu, mohẽshi verã Ãñare memby kuña ĩmerea. ²⁷ Tẽvã Hesu heishu: Ma'ẽihe tykarurãni tayre hyvãta peve, porãã jahekyshi tayre houva ñamẽẽshu verã ñaumbare. ²⁸ Hãrã taupe hei: Âñete rãnga, Sheja! Tẽvã ñaumba mesa ipe'iare, hykuaĩ houjy tayre houva ku'ikue mesaivi oava. ²⁹ Hesu heishu: Âñete rãnga rereva, ekuajyvy. Âñã õhẽmashi nymemby kuña. ³⁰ Taupe vãhẽjy oho hẽntaperã, hesha memby kuña ñeno'ẽ hupape. Ôhẽmambashi Ãñakue. ³¹ Hesu õhẽ Tiroivirã. Hasa oho Sidónpi, vãhẽ yyvasu Galileape, hasa oho pañandepo (10) tẽnta õĩpi, yvy Decapolis he'iashuape. ³² Hãrã verushu reta pẽnte japysamba hareka ña'ẽnguva. Hãmã jurureshu reta ipo ñonohe verãre. ³³ Hãmã Hesu hã'ẽĩ ỹngaity rahashi kuimbaire, haipe japysa põĩpyrã, myndyvyjy iporerã pokohe ĩku; ³⁴ haivi Hesu vate mãĩrã hei: “Efata!” (he'iseva: “Jype'a!”) ³⁵ Haipe jypeajy japysa, ĩku jerarã ĩnjeta kavijy. ³⁶ Hãmã Hesu heishu reta avy mbavape mbeu verã, tẽvã kyrãte he'iashuva ñymyrõĩteve opa mbeu reta, ³⁷ shara hãĩrãite hesha retarã hei: “Japo kavi rãnga Hesu, japysambava myhendukajy, ña'ẽnguva mbijetakajy."