¹ Hesu õhẽ haivirã, oho jy'yvy kyty mboireare hãndi. ² Putu'uava jy'ara vãhẽrã, õñepyrõ pyrỹmboi Judiore ñymbatyseape. Kuaretare hẽnduva mbyhaikaviterã hei jyre: Mãĩvira opaite mbai kuaa kova kuimbai? Mãĩvira nõhẽ hai kova mbai kuaakue, hareka mbaikatukue mbaikavi japo heshaha verã? ³ Ha'ẽãra yvyrare mba'apo'ia, Maria memby, Jacobo, Jose, Juda hareka Simon ñymoña hãndiare? Ikõãra jyre jyve ñanymbyteipi, hiindyre? Kuããmba reta hei verã rãĩmi. ⁴ Hãmã Hesu heishu reta: Mba'ety ñĩmiñẽẽ'ia haihuambaipi, jy'yvypẽĩ rãnga haihuhã, hentãrãre hareka hẽntape'õre. ⁵ Hãrã katũã japo mbaikavi heshaha verã, mbovyĩ ñymbairasyva mỹnguera, ipo ñono ĩãrẽrã. ⁶ Hesu mbypy'ãã, shara haire rojãã reta. Haivi Hesu oho pyrỹmboi tẽnta mbyrymba õĩpi. ⁷ Hesu hẽno 12 apostol, hareka momokue mondorã; mẽẽshu mbaikatu mohẽshi verã kuareta ãña ichepy vekuare. ⁸ reta potamba rahava mãĩnũnga pehupi pevarã: Avy pyraha pãhã, ho'uava hareka kyrypoti. Koñei pyraha pẽnte yvyra pirãtahea. ⁹ ymonde pypasa, tẽvã avy pymondea heta pyraha. ¹⁰ Hesu heijyshu reta: Mãĩpi'õ o'ipe picherã, pypytakui haipe pehojy peve haivi. ¹¹ Hãmã ĩmẽ'ẽ potamba pymyvahẽva hẽntape, hareka pynyrẽndusembavarã, pẽhẽ haivi hareka pityshi yvy timbokue pypasa, vokava hai ñymarãndu haire pevarã. ¹² Haivi mboireare õhẽ mbeushu kuaretare Ñanderu Tumpa ĩñẽẽ, heishu ỹteñoma japo verãre mbai porãmbava, hareka Tumpa kyty oujy verãre. ¹³ Heta ãña ichepy vekua mõhẽshi reta, hareka mỹnguera ñymbairasyva asaite kytyherã.. ¹⁴ Hesu opa rupi kuaaha, hãrã mburuvisha Herodes kuamajy verã hei: Juan Bautista kuerajymbakue manovare mbyteivi, hãme rãnga ĩmẽre mbaikatu, mbaikavi japorã heshaha verã. ¹⁵ Ĩrũre heijy: Elias rãnga. Yngavare heijy: Tumpa ĩñẽẽ mbeu'iac, tynonde vekuare rãĩmiva rãnga. ¹⁶ Tẽvã Herodes kova mbai hẽndurã hei: Juan, she rãnga ñaka ajasyjakashi, tẽvã kuerajymba. ¹⁷ Shara Herodes mbyperesokamba Juan hareka ñapitĩka kadenape, tyvy Felipe hỹreko Herodías rehe, shara Herodes rekore. ¹⁸ Juan heishu Herodes: “Põrãny ndyryvy hỹrekõi ryrekoryre verã." ¹⁹ Hai rehe Herodías heshatãã Juan, hãrã pota jukakare, tẽvã katuã; ²⁰ Herodes kyje'ishi Juan, shara kuaa kavite hai kuimbai heko kavivarã, ñyngareko kavihe, hẽndu ĩnjeta'ẽrã ajemai kuaa kaviãshi, tẽvã Herodes potañoĩ hẽndushu Juan. ²¹ Tẽvã Herodias hesha pẽnte ara ou kavishu verã, shara Herodes japo karu vasu ñy'ãño mbotyrã, membeu jyveshu mburuvishare hareka syndarore juhuvishare hareka karai ikokatuva Galileape'õre; ²² karuma ñynoĩrã Herodias memby kuiñatãĩ iche jyroky, hãrã Herodes hareka haipe ẽẽ hãndiare mbyvy'aite reta. Haipe Herodes heishu kuiñatãĩ: Jurure ripotava hãrã she ãmẽẽpondekui. ²³ Hai hei jyvyĩshu: Rirurevapo amẽẽndekui, ajemaĩpo tẽntare shepope'õ mbyteipi kavi rirureshe. ²⁴ Haivi kuñatãĩ õhẽ pyrandushu ishy: Mbaivara airureposhu? Haipe ishy heishu: Jurureshu Juan Bautista ñakãkue. ²⁵ Voka kuñatãĩ nãrẽ'ãĩte ichejy mburuvisha vasu ẽvãperã, jurureshurã hei: Aipota ã'ẽvãĩ rymẽẽshe pẽnte yape Juan Bautista ñakãkue. ²⁶ Vokava mburuvisha vasu mbyvya'ãĩte; tẽvã mẽẽ jepe ĩñẽẽ opavare hỹnonde mẽẽ ñõĩ verã, hãrã katuãma ajerai mẽ'ẽãjy kuñatai jurureshua. ²⁷ Hãmã mburuvisha vasu narẽ'ãĩte mondo pẽnte syndaro veru verã Juan ñakãkue. ²⁸ Hãmã vokava syndaro oho Juan mbyperesoa ñonoavaperã jasyjashi ñaka, yape ñonorã raha mẽẽshu kuñatãi, hãrã hai mẽẽ jyveshu ishy. ²⁹ Juan mboireare kuamarã, ou raha reta hetekue, ñoty verã. ³⁰ Hãmã apostolre jyveru ñymbatyjy hãndi Hesu, haipe mbeushu reta opaite japovare hareka pyrỹmboihe vekuare. ³¹ Hesu heishu reta: Jaha japutuuposhy yvy ikoambaipi. Hesu kỹrãmba hei, shara hetaite kuareta ouva hareka ohova haire ẽvãperã, ẽẽãshu reta karu verãre. ³² Haivi Hesu hareka mboireare jyraha kanoape hã'ẽĩ yvy ikoambaipi ³³ Tẽvã heta'ẽ kuaretare heshava Hesu ohorã, hãrã kuaa retarã opa ñani jyraha hynonderãpe. ³⁴ Hesu vejy kanoaivĩrã, hesha kuareta heta vekuarã, parekotẽ reta, shara avishare ñyngarekoambahea rãĩmi jyrerã, haipe õñepyrõ mboishu reta heta mbai. ³⁵ Ka'aruiterã mboireare jyveru Hesu ẽvãperã heishu reta: Ka'aruitema rãnga, mba'etyvãijy koipi ikova. ³⁶ Mondojymĩte kuaretare, tẽnta hareka ñũũhupi tovareta hou verã. ³⁷ Tẽvã Hesu heishu reta: Pee rãngapo pymẽẽshu hou verãre. Haire heishu: Ohoarapo ovaha pãhã 200 ara mba'apo repykue, opa myngarua verãre? ³⁸ Hesu pyrãndushu reta: Mbovy pãhãra ĩmepyre? Pekua pymãĩheno. Kuaama retarã heishu: Pandepo pãhã hareka mõkue pira. ³⁹ Haivi Hesu heishu ñymambaty vapy verãre kapi'atare, ⁴⁰ hãmã vapyma jyraharã ĩmẽ'ẽ 100 jatyva, ĩrũpe ñymbaty jyve 50, kỹrã ñymbaty jyraha. ⁴¹ Haivi Hesu heky pandepo'ia pãhã hareka mõkue'ia pira, mãĩ ararerã ñymboi ĩãrẽ, pyseã pãhãrã haivi mẽẽshu mboireare mẽmẽẽ hupi verã kuaretare; kyrãĩ japojy mõkue'õ pira opaiteva pevãrã. ⁴² Opaiteva kuaretare karu hareka opa hỹvãta reta. ⁴³ Haivi Hesu mboireare 12 kanata mynyhẽjy pãhã hareka pira pysẽvẽ opamba ho'ua vekua. ⁴⁴ Hãrã haipe ẽẽ 5000 kuimbai karuvare. ⁴⁵ Haivi Hesu heikavishu mboireare arẽã jupi verãre kanoape, oho verã yy hyvaisho kyty Betsaidape, tẽvã hai yy hymbeype ĩme mondojyrãni verã kuaretare. ⁴⁶ Hesu opajyma mondorã, oho jupi yvyturusure ñymboishu verã Ñanderu Tumpa. ⁴⁷ Pỹntumapo'irã, kanoa yy mbyteipima ohova, tẽvã Hesu ĩmẽĩteri'i yvyipi. ⁴⁸ Hesu haivive hesha mboireare mbeveĩ ñymaña jyraha jyrerã, shara yvytu ñakua ou hynonderã. Kõĩma ourã, Hesu vata ou yy ĩãrẽ haire ẽvãpe, hasaĩ ohoshi verã rãĩmi. ⁴⁹ Hãrã haire heshama Hesu yy ĩãrẽ vata ourã, moãteshu reta jykuamba'iarã opa hãse reta; ⁵⁰ shara opãĩ hesha reta, hãrã kyjekue japyraha reta. Tẽvã Hesu ĩñẽẽ mondo raveĩshurã hei: Avy pykyje! Pyrẽĩ! She rãnga! ⁵¹ Hesu jupi hãndi reta kanoaperã yvytu vasukue pytarã, mbyrymaĩ reta vokava hesharã. ⁵² Shara kuãã reta mbaivara he'ise Hesu pãhã mbyhetarã vẽkua, shara mbai rojãã reta. ⁵³ Hasama reta yyvasu hỹmbey kytyrã vãhẽ jyraha yvy Genesaretpe; ñapĩti heja ñykanoare yy hỹmbeype. ⁵⁴ Vejyma reta kanoaivirã, kuaretare areã kuaa reta Hesu, ⁵⁵ opaite vata hupi reta vokava tẽnta, opaivi veruashu ñymbairasy vekua, hupa ryheve, kuaama reta Hesu ĩmẽ'ẽ haiperã. ⁵⁶ Mamaĩpi Hesu ohovape, ñañonoshu tẽntamire, ñũũ hupi hareka tẽnta vasupe, kuaretare raha ñonoshu haperãipi ñymbairasy vekuare, jurureshu reta ñymbairasy vekuare ma'ẽĩhe pokohe verã mondeva hymbeyre; hãrã opaite pokohe vekuare, opa kuerahe mbairasykue.