¹ Vãhẽ jyraha yyvasu hyvaishope, Gadarenore jy'yvype. ² Hesu vejyĩ kanoãivi, areã ou tã'õvẽre õĩvi hỹvãĩtishu pẽnte kuimbai Ãña ichepya, ³ ñymyhẽnta'i tã'õvẽre ẽvãĩpi, mbavamba jepyheva, ajemãĩ kadenape ñapĩntĩha; ⁴ ajemaĩ ipy hareka jyva pokuahashi kadenape, tẽvã opãĩ mỹndoso, mba'ety jepyheva. ⁵ Hãrã ikoñõĩ'iva, ara hareka pyharekue sapuke'i yvytyrusu pãũpi, tã'õvẽre ẽvãipi, opa ñỹmbyperepy ita pysẽvẽ. ⁶ Hãrã mbyryivi Hesu hesharã ñani ou jykoty ou ĩñesu hỹnonde. ⁷ Hãmã hỹnãtu sapukerã hei: Hesu, Ñanderu Tumpa ara vateveva Tay, mbaivara ĩmẽryre shee? Airureĩnde Ñanderu Tumpa heepe avy rivareite shyrehe verã. ⁸ Kỹrã hei, shara Hesu heimbashu: Âña, ẽhẽshi ko kuimbai! ⁹ Haivi Hesu pyrãndushu: Mãrãra'o ndyree? Hãrã hai hei: Legion he'ia rãnga shee, shara yryreta. ¹⁰ Haipe jurure asyshu Hesu, potamba mõhẽ verãre iko jyreaivi. ¹¹ Haipe mbyryã karu ñynoĩ kushi heta vekua, yvyturusu hyvache. ¹² Hãmã Ãñare jurure kavishu Hesu: Mã'ẽĩhe tohoa ticheapy kushire. ¹³ Opa õhẽ kuimbaivirã, Hesu mã'ẽĩhe jyraha opa ichepy kushire, haipe 2000 kushi ẽvã opa ñyvãhẽrã oho oapy yvasukuerã opa mano. ¹⁴ Hãma kushi ñyngareko'iheare opa ñyvãhẽ, hãmã jyraha mbeu ikova tẽntape hareka ñu hupi'iare. Hãrã kuaretare jyraha hesha ikova. ¹⁵ Hãrã vãhẽma jyveru Hesu ẽvãperã hesha kuimbai Ãña ichepy vekua, ñĩmimonde hareka haikavijyma'ẽrã, vapy'ẽ. Hãrã kyje jyre. ¹⁶ Hãmã kuaretare heshava Hesu, mbeu mbaivara ikohe kuimbai Ãña ichepy vekua hareka kushire. ¹⁷ Haipe kuaretare õñepỹrõ jurure kavishu Hesu oho verã jy'yvy retaivi. ¹⁸ Hesu jupijy kanoaperã, ko kuimbai Ãña ichepy vekua, jurure kavishu oho hãndi verã. ¹⁹ Tẽvã Hesu he'iã, koñẽĩ heishu: Ekua nyrẽntape, mbeushu nyrẽtãrãre, heta mbai Ñanderu Tumpa japo ndyreheva, hareka mãrãra ndypareko. ²⁰ Hãrã voka kuimbai oho õñepyrõ mbeu Decapolispe, opa mbai haikaviva Hesu japohe vekua; hẽnduvare opa mbypy'ãã reta. ²¹ Hãmã Hesu hasajy yy hyvaisho kyty kanoaperã, hãrã Hesu y hymbeype pyta, kuareta hetava jatyjyhe yy hỹmbeype. ²² Haivi Hesu ẽvãpe vãhẽ ou pẽnte mburuvisha Judiore ñymbatyseape'õva, Jairo he'iashua, heshamarã ĩñesu hỹnonde. ²³ Jurure jyvyĩshurã hei: Shyrajy mano verãĩma'ẽ, eimĩte ndepo ñono ĩãrẽ hykovejy verã. ²⁴ Hãmã Hesu oho hãndi; kuareta hetava oho jyve hipii hareka opa jasoishu reta. ²⁵ Haipe kuaretare mbytepe ẽẽjy pẽnte taupe 12 añoma pyrarava tuvy vasu, ²⁶ hetama iko asy mbai kuavare ipoipi, opama mombohe kyrypoti ĩmẽtere vekua potate kuerarã, tẽvã mbaveã mynguera. ²⁷ Ko taupe kuaama Hesu he'iahevarã, kuareta hetavare pãũpe ñymboja haykueivirã pokohe Hesu mõndẽva ĩarẽ õva. ²⁸ Taupe pyapẽĩ hei: “Mondevãĩte apokohea, akueramapokui. ²⁹ Hãrã haipevaĩ pytashi tuvykue, hareka hetepy ñandu kueravañymba'asyivi. ³⁰ Hesu ñandu õhẽshi mbaikatu; jerepy hetavare mbyteperã pyrãndu: Mbavara pokohe amondeva? ³¹ Mboireare heishu: Ryhesha rãnga mãrãra opa ndasoi kuaretare, haipe jyvỹĩra rỹpyrãndu: Mbavara poko shyrehe? ³² Tẽvã Hesu mãĩ jyvỹĩ hupi kuaretare hesha verã mbavara pokohe. ³³ Hãmã taupe kyjeitẽrã ryry'i, shara kuaa ijehe mbaivara ikohe, hãrã ou ĩñesu Hesu hỹnonderã opa mbeushu ãñẽteva. ³⁴ Hesu heishu: Shyrajy, riroja rãmẽĩ rykuera. Kapyryĩ ekuajy, shara rykueramahe nymbairasykue. ³⁵ Hesu ĩnjeta teri õvã, vãhẽ ou Judiore ñymbatyseape'õ mburuvisha jokuerea, heishu Jairo: Ndyrajy manoma; mbai verãra rỹmãĩ jyvyĩhe pyrỹmboi'ia? ³⁶ Tẽvã Hesu jasakããhe haire heiva, hãrã heishu mburuvisha Judiore ñymbatyseape'õ: Avy kyje, jyrojaiño. ³⁷ Tẽvã ma'ẽĩa ỹngare mi'ĩrũ, koñei Pedro, Jacobo hareka tyvy Juan. ³⁸ Hãmã vãhẽ jyraha Judiore ñymbatyseape'õ mburuvisha hẽntaperã hesha reta opa iko raiva, jaheova hareka sapukeva, ³⁹ iche jyraha oo iperã heishu reta: Mbaiva rehera opa pikorai hareka pijaheo? Kova kuñatãĩ ray manoã, ocheĩ rãnga'ẽ. ⁴⁰ Haipe kuaretare jojejyre. Tẽvã Hesu opa mõhẽ oo ipe'iare, haivi iche tuu, ishy hareka Hesu mboireare kuñatãĩ ray ẽvãpe. ⁴¹ Hesu pysy ipoperã heishu: Talita, kum! He'iseva: “kuñatãĩ ray, pũ'ã". ⁴² Kuñatãĩ ray haipevãĩ pũãrã vatajy; doce añomãĩre. Kuaretare opa mbyrymaĩ reta vokava hesharã. ⁴³ Tẽvã Hesu heijyvyĩshu reta; potambaa mbavape mbeu verãre, haivi heishu mỹngaru verãre kuñatãĩ ray.