¹ Hesu hykuãĩ õñepyrõ pỹrỹmboijy yvasu hỹmbeype, haipe kuareta hetava ou hai ẽvãpe, hãrã oho vapy pẽnte kanoãperã, ñymbaty'õre pyta yyvasu hymbeype. ² Haipe heta mboishu reta mbai ñỹmỹhã 'ãnga rupii, hãmã pyrỹmboi'ẽrã hei: ³ Pyhẽndu: Pẽnte ñimĩty'ia oho ma'ẽty. ⁴ Ma'ẽtyrã ĩmẽ'ẽ oava pe hymbeype, haipe ou vyrare opa hou. ⁵ Ĩmẽ'ẽjy oava ita pãũpe, yvy jihiavaperã areã hẽño, yvy pyrẽrĩ vape. ⁶ Haivi kuarasy õhẽmarã opa hapy, hapõarã opa jipi. ⁷ Ĩmẽ'ẽ oava kapi'ãti pãũpe, voka ñãnavã vatema ohorã opa jasoi. ⁸ Hãmã ĩmẽ'ẽjy oava yvy kavivape, haipe heta'ia, ĩmẽ'ẽ iava 30, ĩrũ 60 hareka 100 peve pẽnte jypyivi. ⁹ Haivi Hesu heishu reta: Ĩmẽ'ẽ japysa'iarã, tyhẽndu. ¹⁰ Haivi Hesu hã'ẽĩma ñỹnoĩ hãndirã pyrãndushu reta 12 ia mboireare hareka haipe õĩ hãndivare, mbaivara he'ise voka ñẽẽ ñỹmỹhã'ãnga ryheva, ¹¹ Hesu heishu reta: Pee rãnga Tumpa pynymby kuaaka mbai kuaahamba irreino ryheva, tẽvã yngavare mbe'uashu reta ñẽẽ ñỹmỹhã'ãnga rupii; ¹² maĩtẽ jyreare heshãã, hẽndu tẽvãre kuãã, potã Ñanderu Tumpa kyty oujyrã hai hejareishi mbai porãmba japo vekuarã. ¹³ Heijyshu reta: Pikuãra ko ñẽẽ ñỹmyhã'ãnga? Hãmẽra mãrãpo pikuajykui ỹngavare? ¹⁴ Ñimity'ia hai Tumpa ĩñẽẽ mbeu'ia. ¹⁵ Ĩmẽ'ẽ tĩmĩty oava pee hymbeype: Hẽndu Ñanderu Tumpa ĩñẽẽ, tẽvã Ãña ou opa hekyjyshi ñotỹhãtẽvã. ¹⁶ Ĩmẽ'ẽjy timity oava ita pãũpe: Hẽndu Ñanderu Tumpa ĩñẽẽrã areã vy'ape myvãhẽ. ¹⁷ Tẽvã hapo pukuãrã kỹỹã'ẽ, hãmã oushu mbai porãmbarã poi jyroja. ¹⁸ Hãmã ĩmẽ'ẽjy oava kapi'ãti pãũpe, hẽndu Ñanderu Tumpa ĩñẽẽ; ¹⁹ tẽvã ojepy'apy ko yvy ĩãrẽ'õreirã, mbai potakue jytavykashurã, opa ou iãreshi ñẽẽ hẽnduvarã i'ã. ²⁰ Katy ĩmẽ'ẽjy yvy kaviape oava: Haire hẽndu Ñanderu Tumpa ĩñẽẽrã pysyrã japova, hãrã ia 30, ĩrũ 60 hareka pẽnteivi 100 kavi ia. ²¹ Hesu heijyshu reta: Veruhara kuei lampara ñonoã verã mãĩnũnga hyru ipe ti katre ipe? Mba'ety, lampara vateñõĩpo ñonohã sape verã. ²² Mbaety mãĩnũnga ñemiva kuahamba verã; hareka ñomiareva jykuamba verã. ²³ Ĩmẽ'ẽ japysavarã, tyhẽndu. ²⁴ Hãrã heijyshu reta: Pijasaka kavihe ko pyhẽndu pẽĩvare, papisha pijapova rãĩmi katĩĩpo, Ñanderu Tumpa pory jyve pyrehe; hãrã mi ĩrũhãvepojy pekui ko pyhẽnduvaivi. ²⁵ Shara ĩmẽmarea me'ẽhãvepo jyshu; tẽvã mba'etyreva, mĩshĩ ĩmẽtereamikue, hekyha jyvapypojyshi. ²⁶ Hesu heijy: Ñanderu Tumpa rreino rãnga ova pẽnte kuimbai mã'ẽty iva; ²⁷ oche hareka sareko, haivi hasa ara hareka pyhare, hãrã ñotyva hẽño, hareka pũãshu, hai kuamba õvã mãrãra'ẽ. ²⁸ Yvy rãnga ha'ei myhẽño; mbyhapo, mỹhãka haivi mbypoty, mbi'iarã mỹhãỹjy. ²⁹ Haivi javyjemãrã mỹno'õhã, vãhẽma jy'ararã. ³⁰ Hãmã Hesu heijy: Mbaivarerapo ñamyhã'ãnga Ñanderu Tumpa irreino? Ti mãrãva ñỹmỹhã'ãngarapo ñañonohe? ³¹ Ova mostaza hãy mĩshi ñõĩteva, ñotyhãrã mishĩĩ teveva opava mãĩnũnga hãy yvy ĩãrẽ'õvãivi. ³² Hãmã ñotyãrã katy hẽño marẽrẽ'ỹĩteve opa ỹnga yvyraivi, haivi hãkã marẽrẽy, vyra retaave ñymby haitypy haere ñykuarãsyã ipereta. ³³ Kỹrã Hesu pyrỹmboihe heta mãĩnunga ñymyhã'ãnga rupii Ñanderu Tumpa ĩñẽẽ, kuaa kavive verãre. ³⁴ Ñymyhã'ãngambape Hesu ĩnjetããshu reta; tẽvã mboireare hã'ẽĩ õpẽĩ mbeu kavishu reta. ³⁵ Vokava arape ka'aru pỹntumãrã, Hesu heishu mboireare: Jahasa yy hyvaisho kyty. ³⁶ Haivi opajyma mondo kuareta hetavarã, mboireare rahashu Hesu kanoãpe. Ĩmẽ'ẽjy ỹnga kanoãpe ohovare. ³⁷ Hãrã sapy'ãĩ vãhẽ yvytu vasukue, haivi yy iche kanoãperã ajete opa tynyhẽ. ³⁸ Tẽvã Hesu oche'ẽ kanoã huva kyty. Hãmã mombarã heishu reta: Pyrỹmboi'ia! rikuããrã opamãpo ñañapyvỹĩrã? ³⁹ Hesu puãrã ñyngãtashu yvytu hareka yyvasu: Jasaka! Shirĩrĩ'ẽ! Haipema yvytu pyta, yy kuirĩrĩrã ara kavijy. ⁴⁰ Haipe Hesu heishu mboireare: Mãrã'ĩrãra pykyjepi? Pirojããmba teri shyrehe? ⁴¹ Tẽvã mboireare opa kyjerã pyrãndu jyre ijupe: Mbavarajy kova, yvytu hareka yyvasuave japoshu heiva?