1 Hesu ichejy Judiore ñymbatyseape, haipe'ẽ pẽnte kuimbai ipo tinĩva. 2 Hãmã ñomĩ mãĩ jyrehe, hesha verã mỹnguerarapo putu'uava jy'arape, ĩmẽre verãre mbaivarapo heihe reta. 3 Haipe Hesu heishu kuimbai ipo tinĩva: Pũã ñymbou mbytepe. 4 Haipe pyrãndushu ỹngare: Mbaivara katu jajapo putu'uava jy arape, haikavivara ti põrãmbara? Ñapyrỹnguera, ti japurukarapo? Tẽvã haire jasaka peveĩ reta. 5 Haipe Hesu poshy ryheve mãĩ jurirã mbyvy'ãmba, mba'ẽã kuaase retarã, hãmã heishu voka kuimbai: Mỹsymyĩ ndepo. Ko kuimbai ipo mysymyĩrã, kuera. 6 Haivi fariseore opajy õhẽ oho, jyraha ĩnjeta hãndi Herode ryhevare mãrãrapo Hesu juka reta. 7 Hesu hareka mboireare hãndi jyraha yyvasu hymbey kyty, hãmã kuareta hetava oho haykue Galileaivi. 8 Kuama reta mbai vasu haikaviva japorã, ou jyve Judeavi, Jerusalenvi, Idumeavi, Jordan kuarasy õhẽaivi, Tiro hareka Sidonvi, hesha verã. 9 Hãrã Hesu mbeushu mboireare myhẽvãshu verãre kanoã, potã kuareta hetava jasoirã. 10 Shara hetavape mỹnguera, hãrã ñymbairasy vekuare opa jasoi pokohe verãre. 11 Haipe mbai poshyre heshamashurã, ĩñesu hỹnonderã, sapuke: Nde rãnga hai Ñanderu Tumpa tay. 12 Hesu ñyngatashu reta potamba mbeu verãre, mbavara hai. 13 Hesu jupi ita vate'õperã, haipe hẽno pota hẽnovare, hãrã haire ou hai ẽvãpe. 14 Hekapy (12) iko'i hãndi verãre, hareka mondo mbeu verã ĩñẽẽ. Kovare mbyhee Apostol. 15 Hãrã mẽẽshu reta mbaikatu mynguera verã ñymbairasyvare hareka mõhẽ verã mbaiposhy. 16 Kova 12 õ reta hai: Simon, mby heeava Pedro; 17 Jacobo hareka tyvy Juan Zebedeo tayre, mbyheejy reta Boanergues, he'iseva: Hy'apua ray; 18 Andres, Felipe, Bartolome, Mateo, Tomas, hareka Alfeo tay, Jacobo, Tadeo, Simon Canaanpe'õ, 19 hareka Juda Iscariote, Hesu pysyka vekua. 20 Hãmã Hesu hareka mboireare iche pẽnte oope, haipe heta vekua jatyjyhe, hãrã katũa karushi reta. 21 Hesu hẽtãrãre kuaamarã oujy heka reta; shara heimbahe reta , kuakua mba'ia. 22 Moise mbypara vekua pỹrỹmboi'iheare, ouva Jerusalenvi, hei jyvehe reta: “Beelzebu, Ãña juhuvisha rãnga hejashu mõhẽ verã, mbaiposhy kuere.” 23 Hesu hẽnorã mbeushu reta pẽnte ñymỹhã'ãnga heiva: Mãrãrapo Ãña mõhẽjy ỹngava Ãña? 24 Pẽnte tẽnta ijupii ñymby vaishorã, katuã kỹỹ iko. 25 Hãmã pẽnte oope'õre ñymbyvaisho jyre ijeherã, oho porãã ñõĩpo. 26 Kỹrãijy ãña ñimbijaorã hareka pũã ijupiirã katuã kỹỹ'ẽ, vãhẽ ñõĩpo japyape. 27 Mbavẽapo iche kuimbai pỹrãtava hoo'ipe manarõshu verã, ñapĩnti rãniãrã, hãmerãpo kapyry manarõshu. 28 Ãñetẽĩteva hai pee, Ñanderu Tumpa hejarei ñõĩposhu kuimbaire mbai porãmba japo vekua hareka ñẽẽ hei vekua. 29 Tẽvã, Espiritu Santo jaheheva hejaharei'ãiteiposhu; ĩmepohe opa ara pevarã. 30 Kỹrã Hesu hei, shara heihe reta Ãña espiritu ĩmerea. 31 Haivi ou Hesu ishy hareka tyvyre, tẽvã katuapeĩ ñynõi, haivĩĩ hẽnõka reta. 32 Hãrã kuareta hetava Hesu vapy'i jurivare heishu: Ndesy hareka ndyryvyre katuape ndyreka jyre. 33 Hesu heishu reta: Mbava retara shesy hareka shyryvyre? 34 Haivi mãĩhe juri vapy'õva retarã hei: Kõõ'õvã reta rãnga hai shesy hareka shyryvyre. 35 Opaite japoshuva Sheru potava, hai reta rãnga, shyryvy, shiĩndy hareka shesy.