¹ Mbovy arama jyrã Hesu ichejy Capernaumpe. Kuaahama hoo ipe ĩmẽ'ẽrã, ² heta ravĩ kuaretare ou jatyhe õche javevẽã peve, haipe Hesu mbeushu reta Ñanderu Tumpa ĩñẽẽ. ³ Hãmã ũrũndy kuimbai veru pẽnte vatamba vekua Hesu ẽvãpe. ⁴ Hetaite kuareta haipe'õrã katuãmã mỹvãhẽ reta Hesu ẽvãperã, oo ĩãrẽivi hese mombushu reta, haipi mbyvejy reta kuimbai vatamba vekua hupa ryheve. ⁵ Hesu hesha marãra haire jyrojahe, hãrã heishu vatambava: Shy ray, mbai porãmba rijapo vekua heja reima ndyhevi. ⁶ Haipe vapy ñynoivare Moise mbypara vekua pyrỹmboi'iheare pyapẽĩ hei ñynõĩ: ⁷ “Mãrã'ĩrãra kova kuimbai kỹrã ijeta? Jahe ranga'i. Mbavarapo hejarei ñande mbai porãmba jajapo vekua? Pẽnteĩ rãnga'ẽ, voka hai Ñanderu Tumpa. ⁸ Hesu kuaaravĩ mbaivara hei ñynoĩ pyape, hãrã pyrãndushu reta: Mãrã'ĩrãra kỹrã pypya pimbijeta pẽĩ? ⁹ Mbaivara javaĩa jaishu ko vatamba vape: “Hejaha reiima ndyhevi mbai porãmba rijapo vekua”, ti jaira poshu: “Pũã hupi ndurupa, ekuajyvy”? ¹⁰ Pikuaa verã, She Kuareta tay rãimĩ ai vekua, ĩmẽ'are mbaikatu yvy ĩãrẽ ahejareii verã mbai porãmba vekua. Hãmã heishu vatamba vekua: ¹¹ She hai nde. “Pũ'ã. Hupi ndurupa, ekuajy nyrẽtape”. ¹² Hãmã haipevãĩ vatamba'ia pũã, hupi huparã õhẽjy oho opavare hỹnonde, hãma opa mbyrymaĩ reta, hareka õmombai vasu Ñanderu Tumpaperã hei jyre: Mãĩpia rãnga kỹrãva mbai jahesha. ¹³ Hãmã Hesu õhẽ ohojy yvasu hymbey kyty, haipe heta kuaretare ou jatyhe hãrã hai mboishu reta. ¹⁴ Hasa oho'irã hesha Levi, Alfeo tay, vapy'ẽ tẽnta Roma pevarã okorase'õpe, haipe Hesu heishu: Ei shimi'ĩrũ. Levi pũãrã oho hãndi. ¹⁵ Hãmã Hesu vapyma'ẽ mesape Levi hẽntaperã, heta tẽnta jurureva okorase'iare, hareka heko porãmba'ia retaave ou vapy hãndi, hareka mboireareta jyve; shara heta'ẽ hairetava ouva haykue. ¹⁶ Hãmã Moise mbypara vekua pyrỹmboi'iheare hareka fariseore, hesha Hesu karu ñynõĩ hãndi heko porãmba'iare hareka tẽnta jurureva okorase'ia retarã, pyrãndu jyreshu Hesu mboireare: Mãrã'ĩrãra pynymboi'ia, heko porãmba'iare hareka tẽnta jurureva okorase'iare karu hãndi? ¹⁷ Hesu hẽndu vokavarã heishu reta: Mambaimba'ia ikotẽveãhe pỹrỹ pỹhãno'ia, koñeĩ ñymbairasy'ivaĩ. She aĩã ãhẽno heko kavivape, koñeĩ heko porãmba'ia retaĩ rãnga. ¹⁸ Juan Bautista mboireare hareka fariseore haipe kavi karuã ñynõĩ reta, hãmã ĩmẽ'ẽ ou pyrãndushua Hesu: Mãrã'ĩrãra Juan hareka fariseo mboireare karuã ñynoĩ hai Ñanderu Tumpa pevarã; hãmã rỹmboiryrea reta katy japoã hai? ¹⁹ Hesu heishu reta: Katura karuãkuei õmendavape õre ĩmẽ ñynõĩ hãndi õmendavarã? Voka temẽ ĩmẽ teri'ẽ hãndi retarã katuãpo karuã ñynoĩ. ²⁰ Tẽvã, vãhẽ pokui ara voka temẽ hekyashi verãre, haiperãpo karuã ñynoĩkui. ²¹ Mba'ety mbyvyvy verã mondeava py'ahuva tuja vekuare, voka mondeava pysẽvẽ py'ahuva mãtarã tivishaitevepo tuja vekua myndoro. ²² Haereka mba'ety ñonova vino vakapi tuja vekuapy, vino pyahuva myndoroĩ vakapi tuja hãmã opa iñohẽ vino vakapi katy sosoro; vino py'ahuva mbyhyrua ñõĩpo mbai hyru py'ahuvapy. ²³ Putu'uava arape Hesu hasa oho koo kueipi, hãrã mboireare mynõõ jyraha jyre trigo. ²⁴ Hãmã fariseore heishu: Mãĩhe, mãrã'ĩrãra rymboiryreare japo japoamba verã putu'uava arape? ²⁵ Hãmã Hesu heishu reta: Mapeãmba pimbijeta mbaivara David japo ñymbahy'irã hareka iko'i hãndiare? ²⁶ Mãrãra David tupaope iche, pai ruvisha vasu Abiatar jy'arape, hai hou pãhã kapyryva Tumpa pevarã, mbavamba katu houva, pai retaĩ ñõĩte katu hou, hãmã mby ho'uka jyve opaite ẽ hãndiare. ²⁷ Hesu heijyshu reta: Voka putu'uava ara rãnga japoha kuaretare pevãrã, japohã kuareta ara putu'uava pevãrã. ²⁸ Hãrã Kuareta tay rãĩmi ou vekua yvy ĩãrẽ, putu'uava ara juhuvisha jyve.