¹ Kristo, Ñanderu Tumpa tay Ñẽẽ kavi õñepyrõhea. ² Heiva rãĩmi, Tumpa ĩñẽẽ mbeu'iaa Isaias jykuatiape: “Kope ãmondo ajokueva nynonderã, myhẽvã verã ndyraperã; ³ ñyhẽndu pẽnte ñẽẽ sapuke'ia yvy ikoambaipi: “Pymyhẽvã Ñanderu Tumpa haperã, pypeashu pe symyĩ ohova. ⁴ Kỹrã Juan oho ñimiñẽẽ yvy ikoambaipi: Heishu Israel reta oujy verã Ñanderu Tumpape, hareka ñymỹngaraikarã Ñanderu Tumpa hejareiishi verã mbai porãmba japo vekua. ⁵ Hãmã opaite Judeavare hareka Jerusalenpe'õre, oho jasakahe verã Juan ĩñẽẽ. Mbeuma reta mbai porãmba japo vekuarã, Juan mỹngaraishu reta yy syryva Jordanpe. ⁶ Juan mondeva hai kamello haakuevi, hareka pirekue kuuare jokuajy, hĩmbiu hai tuku, hareka hẽẽvã kaa hupi'õ. ⁷ Ñimiñẽẽ'ẽrã hei: Shaykue ou pẽnte ñymbaikatuve shyheviva, katumba she airoa ajorashi verã jypasa ĩsha. ⁸ She apyrỹ mỹngarai yypẽi; Haipo pyny mỹngaraikui Espiritu Santope. ⁹ Hãmã voka arape Hesu õhẽ tẽnta Nazaretvi ẽvã yvy Galileape, hãrã Juan mỹngaraishu Jordan yy syryvape. ¹⁰ Hãmã õhẽjy yyvirã hesha jypeashu ara vate, hareka vejy ĩãrẽ Espiritu Santo pykasu rãĩmi. ¹¹ Hãmã ñyhẽndu ñẽẽ ara vateivi heiva: Nde hai shy Ray ahaihuva, ndee rupii shypya hory. ¹² Haivi Espiritu Santo raha Hesu yvy ikoambaipi. ¹³ Haipe pyta 40b ara, hãmã voka ara pukukue ãña pya hãshu, hãrã hai iko mymba saitevare mbyteipi, hareka Tumpa jokuevare ou mboryshu. ¹⁴ Juan Bautista mbyperesohamarã, Hesu oho Galilea kyty mbeu verã Ñanderu Tumpa ĩñẽẽ kaviva. ¹⁵ Hesu hei: “Vãhẽma Ñanderu Tumpa jy'ara, ñymỹ kõõ ou, peijy piñymbeu Tumpape hareka pyroja ñẽẽ kavi". ¹⁶ Hesu oho yvasu hymbeypi Galileaperã, hesha Simon hareka tyvy Andres, ity ñynõĩva jypysare yype; hai reta rãnga pira nohẽ'iare. ¹⁷ Hesu heishu reta: Pei shimi'ĩrũ, hãrã ajapopo pyndyhevi kuareta nohẽ'iare mbai porãmbaivi. ¹⁸ Haipe vãĩ opa heja jypysa retarã oho hãndi. ¹⁹ Haivi Hesu oho poshyjyrã heshajy Zebedeo tayre, Jacobo hareka tyvy Juan, ñykanoape ñono kavi ñynõĩ jypysare. ²⁰ Haipevãĩ hẽnoshurã, heja reta tuu Zebedeo hareka mboryreare ñykanoape, haivi oho hãndi reta Hesu. ²¹ Hãmã Hesu hareka mboireare vãhẽ jyraha Capernaunperã, putu'uava jy'arape Hesu iche Judiore ñymbatyseape pyrymboi. ²² Opavare hairã hesha hai pyrỹmboi heva, hai mboishu reta yngare ikotẽvẽmbahea rãĩmi, hareka Moise mbypara vekua pyrỹmboi'iheare rãĩmiã pyrỹmboi hai. ²³ Hãmã ĩmẽ'ẽ Judiore ñymbatyseape'ia pẽnte kuimbai mbai poshy ĩmẽrea sapuke'irã hei: ²⁴ Mbaivara ripota yryhevi, Hesu Nasareno? Reira opa irijuka verã? She arykuaa mbavara nde. Nde hai Ñanderu Tumpa mbouva, heko kaviva. ²⁵ Hesu ñyngãta espiritu porãmbaperã hei: Jasaka, ẽhẽshi ko kuimbai. ²⁶ ãña hỹnatu opa mbyryry kuimbai, hareka sapukerã õhẽshi. ²⁷ Opaite haipe'õre myngyjerã õñepyrõ pyrãndu ijupe reta: Mbaivarajy kova? Mãrã pyrỹmboi py'ahuva rajy? Ko kuimbai rãnga ñymbaikatu rupii mbai poshy retave japoshu hai heiva! ²⁸ Oparupii ravĩ Galilea juri'õvã retaipi Hesu kuaaha. ²⁹ Õhẽjy Judiore ñymbatyseaivirã Hesu oho Jacobo hãndi Juan, Simon hareka Andres hẽntape. ³⁰ Simon hỹreko ishy ĩmẽ'ẽ hupare ñãka hasy ryheve; hãrã mbe'uashu Hesu. ³¹ Haivi Hesu ñymbojahe Pedro hỹreko ishyrã, pysy ipope mupũãrã, haipe vãi opashi ãka rasykue, hãmã ñyngarekoma'ẽhe reta. ³² Ka'aruite kuarasy ichema'ia, heta veruha ñymbairasy vekua Hesu ẽvãpe, hareka mbai poshy ĩmẽreare; ³³ hãrã voka tẽnta ijare opa ñymbaty õchepe. ³⁴ Hãmã Hesu mỹnguera mãrãrã gãtu ñymbairasy vekua, hareka mbai poshy ĩmẽreare opa mohẽshi, Hesu mẽ'ẽãshu mbai poshy ĩnjeta verã, shara haire kuaa mbavara hai. ³⁵ Kõ'eĩ pỹntuteri vekua Hesu õhẽ tẽntaivirã, pũã oho yvy ikoambaipi, haipe jurure Ñanderu Tumpape. ³⁶ Simon hareka ñi'ĩrũre hãndi jyraha heka Hesu, ³⁷ heshama retarã heishu: Opãĩ ndyreka jyre. ³⁸ Hesu katy heishu reta: Jaha tẽntamire mbyrymba õipi haipi ambeu verã ñẽẽ kaviva, ha'ẽrã rãnga shymbouha. ³⁹ Kỹrã Hesu õhẽ oho Galilea juri'õ retaipi, Judiore ñymbatyseape pyrỹmboihe ñẽẽ kavi, hareka mõhẽ mbai poshyre. ⁴⁰ Pẽnte kuimbai kuru porãmba'ia ou Hesu ẽvãpe, hỹnypỹã jatykarã heishu: Nde pota shy mỹnguerarã, shy mỹnguerapo. ⁴¹ Hesu parekorã, pokoherã heishu: Aipota rãnga, kuera! ⁴² Hãmã haipevãĩ opashi kurukuerã, kuera. ⁴³ Hesu narẽ ãĩte mondojyrã, hei jyvyĩshu: ⁴⁴ mbeukui mbavape; ekuaĩ ijeshakashu pai, hareka mẽẽ rỹmẽẽ verã Moise mbypara vekua heiva rãĩmi, heshaha ndyrehe verã rykueramava. ⁴⁵ Ko kuimbainy õhẽ ohorã, mbeu raha mbaivara ikohe; hãrã hai rehe Hesu katuvẽã iche ijeshakajy tẽntaipi, yvy ikoambaipi iko. Haipe opaivi ohovare oho hai ẽvãpe.