¹ Hesu õhẽ Capernaumvirã oho Judea kyty, hareka yvy ẽvã kuarasy õhẽãivi yy syry Jordanpe. Haipe jatyjyhe kuareta heta vekua, hãrã hykuãi mboijyshu reta, kuei japosea rãimi. ² Haipe ñymbojahe Fariseore pya rããshu verãrã pyrãndushu reta, katura pẽnte temẽ poishi hỹreko. ³ Hai heishu reta: Marãra hei pee aryka'e Moise? ⁴ Haire hei: Moise mbypara vekuape rãnga hei, pẽnte kuimbai katu poishi hỹreko, mẽẽshu kuatia poishia ryheva. ⁵ Haivi Hesu heishu reta: Pyndypya tãtaivi rãnga, Moise hejamba kova pijapo verã. ⁶ Tẽvã jypyivivãimba Ñanderu Tumpa japo “kuimbai hareka taupe." ⁷ “Hãmeara kuimbai hejapo tuu hareka ishy, iko hãndi verã hỹreko, ⁸ hãrã mõkue'iare pẽnte kuareta rãĩmimapo iko”; hãrã jyrekovare mõkueveama iko ñynoĩ, koñeĩ pẽnteĩ jyreva rãĩmi. ⁹ Hãrã Ñanderu Tumpa mypẽntevare katuã kuareta mbypoika ijuhuvi. ¹⁰ Ĩmema ñynoijy hẽntaperã, Hesu mboireare hykuaĩ pyrãndujyshu reta poi ijuhuvia ryheva. ¹¹ Hesu heishu reta: Ĩmẽ'ẽ kuimbai poishia hỹrekorã yngava rekojya, mbai porãmba japohe tynondeite rekotẽ vekua. ¹² Ĩmẽ'ẽ taupe ĩme poishia ỹnga kuimbai rekojya, mbai porãmba japohe tynondeite rekotẽ vẽkua. ¹³ Haivi Hesu veruhashu sanjayre pokohe verãre; tẽvã mboireare poshy jyreshu veru'õre. ¹⁴ Hesu hesha vokavarã poshype heishu reta: Pyma'ẽĩhe sanjayretou shyvache, avy pijocha; shara Ñanderu Tumpa ẽvãpe haire rãimivã pevarã hai. ¹⁵ Ãñetẽiteva hai pee: Ĩmẽ'ẽ myvãhẽmbava Ñanderu Tumpaivi ouva sanjay rãimiva, icheãpo Ñanderu Tumpa ẽvãpe. ¹⁶ Haivi hupi sanjayre, ipo ñono ĩarẽrã heihe reta ñẽẽ kaviva. ¹⁷ Hesu oho jyma verã, ñani ou pẽnte kunumi, ĩñesu hỹnonderã pyrãndushu: Pyrỹmboi'ia heko kaviva, mbaivarapo ajapo apity verã tykove opambava? ¹⁸ Hesu heishu: Mãrã'ĩrãra rere she hekokaviva? Mba'ety rãnga hekokaviva, koñẽĩ Ñanderu Tumpa. ¹⁹ Rikuama kavi rãnga Ñanderu Tumpa ĩñẽẽ: “Avy myporã'i jyrekoma vare, avy puruka, avy manarõ, avy ĩnjeta rei ndapishare, avy ndapu; japo nde ru hareka nde sy hei ndeva." ²⁰ Haivi kunumi hei: Pyrỹmboi'ia, shyndei airã vãĩ rãnga opa ajapo kovare. ²¹ Hesu pareko ryheve mãĩhe, hãrã heishu: Pẽnte mbai mba'ety nde rijapo verã: ekua, opa ẽvende ĩmeryreare, hãrã hepykue mẽmẽshu pavete'iare. Hãmerãpo ripity iko katuva ryheva vate arapy; haivi ei shimi'ĩrũ. ²² Vokava kunumi hẽndurã mbypy'ã, hãrã pyamba ryheve ohojy, shara iko katuva. ²³ Hesu mãĩhe juri õ retarã heishu mboireare: ¡Javai veposhu ikokatu vare iche verã Ñanderu Tumpa ẽvãpe!. ²⁴ Mboireare myngyje kova mbai hẽndu retarã; tẽvã Hesu heijyshu reta: Shyrayre, javaive rãngashu hai pẽnte kuareta ikokatuva iche verã Ñanderu Tumpa ẽvãpe!. ²⁵ Javaiãve rãngashi hai kamello hasa verã ju sakuaipi, ikokatuvare pevarã, Ñanderu Tumpa ẽvãpe. ²⁶ Kova mbai mboireare hẽndu retarã kyjeiteve jyreta, haipe pyrãndu ijupe reta: Akuarã mbavatẽpo oho jepekui? ²⁷ Hesu mãĩhe retarã hei: Kuaretare pevãrã javaishu hai vokava; tẽvã Ñanderu Tumpa pevãrã javaiã; shara Hai pevãrã mba'ety katumba. ²⁸ Haivi Pedro heishu: Ore rãnga opava mba e hejaha, ouha ndipi verã. ²⁹ Hesu heishu: Ãñetẽĩ teva hai pee, ĩmẽ'ẽ hejava ho, tyvy, hĩndy, tuu, ishy, hỹreko, tayre, jy yvy, shyreheva hareka ñẽẽ kaviva rehe. ³⁰ Heja vekua hẽndakuepe, (100) vepo hipityjy ã'ẽ vãĩ ko yvy ĩãrẽ; ĩmẽarapo ho, tyvy, hĩndy, ishy, ta'y, hareka yvy, hasa asy, tẽvã manorã, hipitypo tykove opambava. ³¹ Hãrã heta ã'ẽ ñytynonde iare, taykue po ẽjy. Heta taykue iare, ñytynonde pojykui. ³² Oho reta Jerusalen kyty, haivi Hesu mboireare tỹnõnde ohoshu retarã, opa mỹngyje, hareka haykue oho vare kyje ryheve jyraha. Hesu hykuãĩ hẽnojy hã'ẽĩ ẽvãpe (12) mboireare, mbeujyshu verãre mbaivarapo ikohe: ³³ Jaha rãnga jai Jerusalen kyty, haipe Kuareta Tay rãimi ou vekua ko yvy ĩãrẽ, mẽ ẽãposhukui pai ruvisha, hareka Moise mbypara vekua pyrỹmboi'iheare, haire jururepo jukaha verã, haivi mẽẽpojyshu reta tẽnta ỹngape'õre. ³⁴ Ñymbyhory hareka myndyvypohe, nuparã jukapo reta. Tẽvã mbahapy arapepo pũãjykui manovare pãũvi. ³⁵ Santiago, hareka Juan, Zebedeo tayre, ñymboja Hesu ẽvãperã heishu reta: Pyrỹmboi'ia, pota rãnga rijapo ore, pẽnte mbai jururehande verã. ³⁶ Hesu pyrãndushu reta: Mbaivara pipota ajapo pyrehe? ³⁷ Haire hei: Ryvapyma rẽĩ mburuvisha vasu himbipeaperã, mã'ẽĩhe tyvapyhavekui, pẽnte ndakata kyty hareka irũ ndasu kyty. ³⁸ Hesu heishu reta: Pikuãã rãnga ko pirureva; Peera pẽĩjyve pyhasa asy verã, she ahasa asy verã rãĩmi? Katurapo peuvekui irova she hau verã? ³⁹ Haire hei: Ôĩha rãnga hasa verã. Hesu heishu reta: Ãñete rãnga peupokui irova hareka pyhasa asypokui she ahasa verã rãimi. ⁴⁰ Tẽvã pyvapy verã shakata hareka shasu kyty sheeãpo ãmẽẽpe, vokava Sheruĩpo mẽẽkui opaite õĩ kavi'õ retape. ⁴¹ Hãrã ĩrũ 10 ia mboireare hẽndurã, poshy jyreshu Santiago hareka Juan. ⁴² Hesu hẽnoshu retarã hei: Pee rãnga pikuaa kuei mburuvishare, mãrãra hẽnta ĩrũre reko ipope, hãrã haire mbytepe'ẽjy vateve'õre, reko asyshu reta. ⁴³ Pynymbytepe kỹrããpo hai: Pota vateve'ia pynymbytepe, tymbory ỹngava. ⁴⁴ Ĩmẽ'ẽ pota tynonde'ivarã, opavare tijokue. ⁴⁵ She, Kuareta tay rãĩmi ai vekua yvy ĩãrẽ, aiã apyrokue ai verã, koñeĩ jokueha verã rãnga hareka amẽẽ verã shyrykove, hetavape amondo jepe verã mbai porãmbaivi. ⁴⁶ Haivi vãhẽ jyraha Jerikope. Hesu õhẽjyma oho voka tẽntaivi mboireare hãndi hareka kuareta hetavarã, pẽnte heshamba kũvãipia Bartimeo he'iashua Timeo tay, pe hỹmbeype vapy'i jururete'ẽrã. ⁴⁷ Hẽndu Hesu Nasareno hasa ohovarã, õñepyrõ sapukerã hei: ¡Hesu, David Tay, shyparekomitẽvẽ!. ⁴⁸ Heta'ẽ poshyshua pota jasaka'ẽrã, tẽvã hai hỹnatuvemba sapukejy: ¡David Tay, shyparekomitẽvẽ! ⁴⁹ Haipe Hesu oho ñymbourã hei: Pỹhẽno. Hẽno reta heshamba kũvãipiarã heishu: Narẽã pũ'ã, nyrẽno'i. ⁵⁰ Haipe heshamba kũvãipia mombo jasoirearã, opo vasu pũãrã ou Hesu ẽvãpe. ⁵¹ Haipe Hesu pyrãndushu: Mbaivara ripota ajapo ndyrehe? Hãmã heshamba kũvãipia heishu: Pyrỹmboi'ia, pota rãnga aheshajytẽvẽ. ⁵² Hesu heishu: Ekuajyvy, rirojarã rykuerama. Haipevãi heshashamba kũvãipi vekua heshajyrã, oho Hesu haykue