¹ Hesu hareka mboireare vãhẽ jyraha yvyturusu olivo Betaniape, tẽntami Betfagé hyvache, tẽnta Jerusalenpe. Haipe Hesu mondoshu mõkue mboirearetarã, ² heishu: "Pekua pyvãhẽ tẽnta ñanynonde'õpe, pichemãrã pyheshapokui pẽnte mbirikaray ñapĩtĩãvã, nde'iave teri opohahea; pijora perukui. ³ Ĩmẽ'ẽ mbava pyrãndupe mãrã'ĩrãra pijora, pereshukui: “Ñandeja rãnga pota rahahashu, arẽandapo verukajyndekui." ⁴ Jyraha retarã hesha mbirika ñapitiãvã pe hỹmbeype, hãrã haire jora veru. ⁵ Hãmã haipe'iare pyrãndushu: Mbaivẽrãra pijorapeĩ mbirika? ⁶ Haire heishu Hesu heishuva rãĩmi; hãrã ma'ẽihe raha reta. ⁷ Haivi verushu reta Hesu mbirikami, hãrã monde vekua nono ĩãrẽ retarã, Hesu opohe. ⁸ Heta'ẽ mondeva mbipysova oho verãipi, ĩmẽ'ẽjy yvyra hãka jasyjarã hỹnonde ñono rahava pehupi. ⁹ Haivi tynonde ohovare hareka haykue ouvare, õñepỹrõ sapuke reta: ¡Hosanna! ¡Haikavite ko ouva Ñanderu Tumpa heepe! ¹⁰ ¡Ñanderu Tumpa tymaĩ kavihe David rãĩmi mburuvisharã ouva! ¡Tymbyvetehashu Ñanderu Tumpa, vateve'õ! ¹¹ Hesu iche Jerusalenperã, oho tupaoperã opa mãĩ hupi mãrã'ẽ. Haivi jyraha Betaniape 12 mboireare hãndi, shara ka'arumarã. ¹² Voka arajyape, õhẽma reta Betaniaivirã, Hesu ñandu ñymbahy. ¹³ Haipe mbyryivi hesha pẽnte igo jypy hoky heta'õ, hãrã oho mãĩhe i'ãra'ẽ. Vãhẽma hyvacherã mba'ẽã heshapy, hokykuerei, shara nde'iave jy'ararã. ¹⁴ Haipe Hesu heishu igo jypy: Atẽñoma mbava toukui ndi'ia! Mboireare hẽndu vokava ñẽẽ. ¹⁵ Hãmã vãhẽ jyraha Jerusalenpe, Hesu iche tupaope, hãrã opa mohẽ tupao hapype mba'ova'õ hareka mbijapara mesa kyrypoti mbyhepy'õ kuaretare pevarã, hareka pykasu õvẽnde'õre vapyhea. ¹⁶ Hãrã Hesu hejãã mbava raha timbipory tupao hapype. ¹⁷ Haivi õñepyrõ mboishu kuaretaretarã hei: Ñanderu Tumpa ĩñẽẽpe hei kavi: “Sheru ho, oo jurureha ipe verã he'ihaposhu opaite tẽntare pevarã”, tẽvã pee pijaposhi manarõ'iare ikua. ¹⁸ Hãmã haipe hẽndu vokava pai ruvisha hareka Moise mbypara vekua pyrỹmboi'ihea reta hãrã heka mãrãrapo jukashu, haire kyjeshi, hetaitema kuaretare mbyry mãĩhea ñẽẽ kavi pyrỹmboihearã. ¹⁹ Ka'arumajyrã õhẽ reta vokava tẽntaivi. ²⁰ Kõ'ẽĩ hasa jyraha igo ẽvãipirã, hesha reta vokava igo opa tini hapoivive. ²¹ Pedro mãnduarã heishu Hesu: Pyrỹmboi'ia mãĩhe, igo jypy rijahehe vekua opamba tini. ²² Hãrã Hesu heishu reta: Pirojahe Ñanderu Tumpa. ²³ Ãñetẽĩteva hai pee, ĩme'ẽ heishuva ko yvyturusu: “Syry hareka japara yyvasupe”, pya mõkue ryhevembape japo hareka roja katu heiva iko verãrã, iko ñõĩposhu. ²⁴ Hãrã hai pee: Pirojahe Ñanderu Tumparã, opava mãĩnũnga pirureva pimboipeĩrã, pyroja ĩmẽma pyre verãrã, mẽ'ẽã ñoĩpope. ²⁵ Pimboi pẽirã, pyheja reishu ĩmẽ pyre porãmba papisha hãndirã, hãrã Ñanderu vate arapy'õ, hejarei jyve pyhevi verã porãmba pijapo vekua. ²⁶ Hãrã pyheja reiãshu papisha japo porãmba vekuarã, Ñanderu vate arapy'õ hejareiãpo jyve pyhevi porãmba pijapo vekua. ²⁷ Hãmã oujy reta Jerusalenperã, Hesu vata'i tupao hapyperã, ñymboja ẽvãpe pai ruvishare, Moise mbypara vekua pyrỹmboi'iheare hareka kuakuavare, ²⁸ hãrã pyrãndushu : Mãrãva mbaikatupyra rijapo kova? Mbavara mẽẽnde mbaikatu rijapo verã kovare? ²⁹ Hesu heishu reta: She apyrãndupo jyve pee pẽnte mbai; pere she, hãrã ambeupo jyvepekui mãrãã rupiira ajapo ãĩ kova. ³⁰ Mbavara mbou Juan pyrỹmỹngarai verã Ñanderu Tumpa ti kuaretara? peresheno. ³¹ Haire õñepyrõ ĩnjeta ijupirã hei: “Tumpa rãnga mboushu, jairã heipojy ñande: “Hãmera, mãrã'ĩrã pyrojãmbashu?” ³² Ti jairapo kuaretare mbouva rãnga”? Hãmã kyje jyreshi kuaretare moa puãhe retarã, shara opavare roja ãñetẽĩte Juan hai Tumpa ĩñẽẽ mbeu'iae Tumpa mbouvarã. ³³ Hãrã hei reta Hesupe: Kuaahãny. Hãmã Hesu hei jyveshu reta: Ambeu'ãpo jyve pee marãva mbaikatu rupiira ajapo ãi kova mbai.