¹ Hesu ĩnjetashu reta ñymyhã'ãnga rupiirã hei: Pẽnte kuimbai ñotỹ uva jy'yvype, opa mangorarã, haivi japokajy uva ñamihã verãpe. Mũpũãjy pẽnte oo vateva, haivi ñyngareko hareka mãĩ'ẽ verã opava rehe. Haivi poryka hepyre jy'yvy ã'ãmo mba'apo iaretaperã oho mbyry. ² Vãhẽma uva mỹno'õhã verã araperã, mondo pẽnte jokuerea mba'apo õre õpe, raha verã uva ia ña'ãporã. ³ Tẽvã haire pysyrã nũpa voka jokuehava, haivi iporãĩ mondojy reta. ⁴ Haivi ijarã'õ mondojy ỹnga jokuerea, vokavape ñaka jokashi retarã heta heheishu reta. ⁵ Ko karai hykuãĩ ỹngava mondojy, tẽvã vokavape juka reta. Hãrã kyrã hetava mondorã ĩmemba'ẽ nupãhavã, hareka jukahava. ⁶ Hãmã koñemahea hembyshu tay haihuva, mondorã hei pyape: “Shyray rãnga, mba'ẽãpo japohe retakui.” ⁷ Opaite mba'apo iare hei ijupe reta: “Kova rãnga hai mbai ijarã; pei jajuka, hãrãpo ña'ãpõrãtẽ vẽkua pyta ñandekui." ⁸ Haivi pysyrã juka reta, hãrã nohẽ mombo reta hetekue uva rẽndaivi. ⁹ Haivi Hesu pyrãndu: Mbaivara katu japo uva heta'õ ija? Oupo opa juka mba'apo iare hãrã mẽẽpo ju'uva rẽnda ỹngava e11.32 Tumpa ĩñẽẽ mbeu'ia Karai ĩñẽẽpe: "profeta." retape. ¹⁰ Pimbijetãra Ñanderu Tumpa ĩñẽẽ kavivape heiva: Oo japo iare mombo vekua vokava ita, ã'ẽ ñonoha oo jypy vapyhe verã. ¹¹ Ñanderu Tumpa rãnga japo kova, hãrã haikavi ñande kova mbai heshaha verã. ¹² Hãrã oñehã jyre mbyperesoka verã Hesu, shara kuaa reta mbai ñymyha'ãnga mondoha ñynõĩherã. Kyje jyre kuaretare hetavaivirã; ma'ẽĩhe ohojy. ¹³ Haivi mbouhashu Hesu ẽvãpe Fariseore hareka Herodes ryhevare, ĩnjeta porãrã ñonovaishu verãre. ¹⁴ Kovare ohorã heishu: Pyrỹmboi'ia, kuaaha rãnga niñẽẽ añetẽĩtevarã, mbaveã rykyjeshi, rỹma'ẽãhe mãrãva kuaretara, rỹpyrỹmboi ãñẽteĩ jyvehe Ñanderu Tumpa hape: Katura me'ẽhashu kyrypoti mburuvisha vasu Cesar, ti mba'ety? Mẽ'ẽarapokui, ti mba'ety? ¹⁵ Tẽvã Hesu kuaa japurei jyrerã heishu: Mãrã'ĩrãra shypyarãpeĩ? Perushe pẽnte nikere tamãĩhe. ¹⁶ Hãrã verushu, Hesu hesharã pyrãndushu reta: Mbava ha'ãnga hareka heera ñonoãhe? Haire heishu: Mburuvisha vasu Cesar. ¹⁷ Hesu hei: Mburuvisha Cesar ña'ãpova pymẽẽjyshu mburuvisha Cesar, Ñanderu Tumpa ña'ãpova pymẽẽjyshu Ñanderu Tumpa. Mbyry mãĩ reta kỹrã heishu retarã. ¹⁸ Hãrã ou Saduseore Hesu ẽvãpe. Haire rojãã manova hykojy verã; hãrã pyrãndushu reta Hesu: ¹⁹ Pyrỹmboi'ia, Moise mbypara vekuape rãnga hei: Pẽnte kuimbai manoshi hyrekorã, tẽvã mymembyãrã tyvy õendajyhe tichey hỹrekokue mimoña verã tichey manoshi vekuaivi. ²⁰ ãmã iko jyre 7 kuimbai pẽnte ovare; tynondeiteva õmendahe, tẽvã manoshirã mymembyã. ²¹ Haivima mõkuehea õmendajyhe, tẽvã hykuãĩ manorã mymembyã jyve; mbahapyhea kỹrãmijy. ²² Hãrã kỹrã 7 õre opaĩ õmendatẽhe taupe, tẽvã mbavẽã haire pẽnteva heja hĩjapo. Koñemahea mano jyve vokava taupe. ²³ Haivi manovare kuerajymarã: Marãva hỹrekorãĩterapokui, shara 7 õre opa pavẽĩ õmendatẽhẽ vokava taupe? ²⁴ Hesu heishu reta: Pijavy rãnga, pikũã Ñanderu Tumpa iñẽẽ hareka Ñanderu Tumpa ñymbaikatu. ²⁵ Manovare kuerajyma araperã, kuimbai hareka taupe õmendaveamapokui. Shara ikoposhi Tumpa jokuevare rãĩmi vate arapy. ²⁶ Manovare kuerajy verãperamba pimbijetã Moise jykuatiape heiva, mãrãra Ñanderu Tumpa ĩnjetashu Moise vycheri hãka hẽndy õĩvirã hei: “She hai Abraham, Isaac hareka Jacob ñu Tumpa." ²⁷ Tumpa rãnga ha'ẽã manovare ñu Tumpa, hykove'iare ñu Tumpa rãnga hai. Mããty rãnga pijavypẽĩ. ²⁸ Heshama Hesu haikavi heishu reta, pẽnte Moise mbypara vekua pyrỹmboi'ihea, hẽndu ijao ñynõirã, ñymbojahe pyrãndushu: Marãvara Ñanderu Tumpa iñẽẽ haikaviveva? ²⁹ Hesu heishu: Haikaviveva ñẽẽ rãnga hai kova: “Hẽndu Israel, Ñanderu Tumpa pẽnteĩ rãnga'ẽ. ³⁰ Haihu Ñanderu Tumpa ndypyaivive, ndykove ryheve, mbai kuaakue ryheve, hareka opaite nypyrãtakue ryheve. Kova hai Ñanderu Tumpa ĩñẽẽ haikaviveva. ³¹ Haivi mõkuehea kyrã heijy: “Haihu ndapisha nde rijyhaihuva rãimi." Mba'ety haikaviveva kova mokue'õ retaivi. ³² Hãmã Moise mbypara vekua pyrỹmboi'ihea heishu: Haikavite, pyrỹmboi'ia, ãẽtẽite ko rereva: Pentẽi'ẽ Ñanderu Tumpa, mba'etyjy yngava ha'ẽĩ ẽẽ. ³³ Jahaihu Ñanderu Tumpa ñandypyaivi, opa mbai kuaakue ryheve, ñandyrykove ryheve, ñanypyrãtãkue ryheve hareka jahaihu ñandapisha jaijyhaihuva rãimi, haikavive mymba jajuka hareka jahapy vaivi Ñanderu Tumpa hee. ³⁴ Hesu, hẽndu ĩnjeta kavitẽrã, heishu: Mbyryã rẽĩshi Ñanderu Tumpa ẽvãpe. Hãrã mba'ẽã mbava pyrãndujyshu ³⁵ Hesu pyrỹmboi'ẽ tupaoperã pyrãndu: Mãrã'irãra Moise mbypara vekua pyrỹmboi'iheare hei reta, Kristo David tayva? ³⁶ David teiva rãnga hei Espiritu Santo rupii: Ñanderu Tumpa heishu Sheja: “Vapy shakata kyty, añonopeve ndyreshatamba'iare ndepy ipe." ³⁷ David teiva rãnga hẽnoshu “Sheja”, Marãrapo akuarã David tayjy? Heta'ẽ haipe kuareta jatyva, vy'ape hẽndu ñynoĩ Hesu ĩñẽẽ. ³⁸ Hesu pyrỹmboirã heishu reta: “Pimoãshi Moise mbypara vekua pyrỹmboi'iheare, haireta rãnga haikavishu iko mondeva pukuherã, pota marãnduha reta vatahava retaipi karai vasure rãimi. ³⁹ Haire heka haikavivevape vapy verã Judiore ñymbatyseape, hareka ñymyhẽnda kavi karu vasu ikova retaipi. ⁴⁰ Hãrã puku rã'ãnga ñymboi reta, hekyshi verã ĩme manovare hookuemire. Haire hasyitevepo nupãhãkui. ⁴¹ Pẽnte arape Hesu vapy'ẽ kyrypoti Tumpa pevãrã mbatyha'õ hyvache, mãĩ'ẽhe marãra kuaretare ñono ñynoĩpy kyrypoti; iko katuvare heheta ñonopy. ⁴² Haipe vãhẽ oujyve ĩme manoshi vekua pavete'ia, mõkue nikere sa'i ovale vekuami ñonovepy. ⁴³ Haipe Hesu hẽno mboirearetarã heishu: Ãẽtẽĩteva hai pee, ko ĩme manoshia pavetetẽ ia kyrypoti hyrupe hetave ñono opava retaivi. ⁴⁴ Opava reta rãnga hembyshu vekuaĩ veru mẽẽ, tẽvã ko pavetetẽ ia opa veru mẽẽ ĩmẽrea, karutẽhe verã vekua.