¹ Hesu õhẽ tupaoivirã, pẽnte mboirea heishu: Pyrỹmboi'ia, mãĩndavehe ko ita hareka tupao, mãrãra tivisharã mashyã seve! ² Hesu heishu: Ryheshara kova oo vasukuere? Pẽntẽapo ĩmẽkui ita jyvohy'õ, opaitepo mbaihakui. ³ Hãmã oho reta yvyturusu Olivo heta õpe tupao hyvache, haipe Hesu vapy'ẽrã, Pedro, Jacobo, Juan hareka Andres pyrãndushu reta hã'ẽĩ õpe: ⁴ Mbaipeiterapo jehu kova mbai? Mbaiva jyheshava ranirapo ẽẽkui, kova ikomapotarã? ⁵ Hesu oñepyrũ heishu reta: Pymãĩ kavi avy mbava pynymbytavykui. ⁶ Hetapo ou shyreepe heiva: “She hai Kristo”, hãmã hetapepo mbytavy. ⁷ Pyhẽnduma mbe'ua ou ñyrãrovarã, avy pykyje, shara kyrãñoĩpo iko; tẽvã ha'ẽã japyma verã. ⁸ Hãmã tẽnta hareka mburuvishare opapo puã ijehe; ikopo opa rupii yvy ryry, õĩpojy ñymbahy hareka jaheo vasu; kova mbai hai jyhasa asy tynonde'õvã. ⁹ Tẽvã pingareko katu pindijehe. Shara ĩmẽpo'ẽ pyndypysykarã pyndyrahava mburuvishare hỹnonde hareka punũpa verã Judiore ñymbatyseaipi, shyryheva peerã piñyhẽnopo mburuvisha vasu hareka huvishare hỹnonde, shyreepe piñymbeushu verãre. ¹⁰ Shara ndei teri ara japyrã, mbe'uañõĩpo ko Ñẽẽ Kaviva opa tẽnta retaipi. ¹¹ Hãmã pyndyrahama mburuvishare hỹnonderã avy pejepy'apyhe pere verã, hareka avy pypya pimbijetarãni, vokava ñẽẽ me'ẽãpeva pere, shara ha'ẽã pee pĩnjeta verã; Espiritu Santoi rãnga. ¹² Hãmã ĩmepo'ẽ kuimbai mẽẽva tyvy jukaha verã, terure mẽẽpo tayre; hãrã tyrayre ñymbyvaishopohe tuu hãrã jukakapo. ¹³ Hãrã opavare pyndyreshatãpo shyryhevaperã, tẽvã tantangãtu'õ japyapeve, vokavapo oho jepekui. ¹⁴ Pyheshama ko mbai porãmba'eiteva ẽẽ, ẽmbatẽ verãpe Tumpa ĩñẽẽ mbeu'ia Daniel heiva rãĩmirã, (ko mbijetava tikuaa mbaivara he'ise) hãrã Judeape'iare toho tiñemi yvyturusu ẽvãipi; ¹⁵ hãmã hoo ĩãre'iva, avy tyvejy nohẽ verã mãĩnũnga hoo ivi; ¹⁶ hãrã kaa hupi ohova, avy toujy tyheka mondeva. ¹⁷ Pavetepo'i taupere purua'iva, hareka pyrỹmykambu teri'ia voka arape! ¹⁸ Pirure katushu Ñanderu Tumpa potãã jehupe kova mbai ro'yma irã. ¹⁹ Vokava arape ẽpo jyhasa asy tivishava arykaimba heshahava ikorã, Ñanderu Tumpa jypy japorãvãĩ ko yvy, ã'ẽpeve hareka ikovẽãmapo kutyve. ²⁰ Ñanderu Tumpa mykõipiã vokava ararã, mba'etypo ohojepeva, hãmã hai pyhỹrõvare rehẽĩ mykõipĩĩpo vokava ara. ²¹ Ĩmẽ'ẽ heipeva: “Pymãĩ, kope'ẽ Kristo." Ti” ãumpe'ẽ”, avy pyroja. ²² Shara oupo tykove japu, hei ijeheva hai Kristo, hareka Tumpa ĩñẽẽ mbeu'ia japuva, heta mbaipo heshaha verã japo pyrymbytavy verã, katupo hai jyve Ñanderu Tumpa pyhỹrõva. ²³ Pingareko katu pẽĩ, ambeuma pee kova mbai ndei teri ikorã. ²⁴ Vokava arape, jyhasa asy hasamarã, kuarasy opapo overã pỹntukui hareka jasy sapeveãmapokui. ²⁵ Jasy tatare opapo oa vate araivi, hãrã mbai arapy'õre mbaikatu opapo õmyĩ. ²⁶ Haipe ijyheshapo ko Kuareta rãĩmi ou vekua yvy ĩãrẽ oujyma avãpỹntupy, mbaikatukue hareka himbipekue ryheve. ²⁷ Hãmã hai mondopo jokuevare mbaty verã hai pyhỹrõvare urũndy yvytu pejuvaivi, yvy japyaivi hareka vate ara japypeve. ²⁸ Ko igo jypyivi pikuaa ñymyhã'ãnga: Hãkã hovyrã õhemashu hokyrã, pikuaa ara haku vãhẽmapojyrã. ²⁹ Kỹrãpo jyve pee pyheshama kova mbai jehurã, pikuaapo Kuareta tay rãĩmi aiko vekua õchepema ãĩrã. ³⁰ Ãñẽtẽĩte hai pee, opapo iko kova mbai ndeiteri kuaretare ã'ẽvare opaite manorã. ³¹ Yvy hareka arapy'õre opapo hasa, tẽvã shiñẽẽ hasããpo hai. ³² Tẽvã vokava ara hareka ora mba'ety kuava, Tumpa jokuevare arapy'iare hareka Ñanderu Tumpa taytẽvã kuãã jyve, koñẽĩ Tuu kuaa. ³³ Pingarekopẽĩ, avy peche, hareka pirure katu shara pikuãa mbaipera vãhẽpo voka ara. ³⁴ Kuareta mbyry ohova rãĩmi; hoo hejashu jokuevare, hãmã mẽẽshu pepẽnteĩ japo verã, hãrã õchepe ñyngareko'õ heishu avy oche verã ³⁵ Hãrã avy peche, shara pikuaã mbaipera oujypo oo ija, ka'arurã, pyhare mbytepe, uru ñyrãvãpe, kõi ourãra, ti kõ'ẽira. ³⁶ Mãhẽ ourã pyndysapyakui pechepẽĩrã. ³⁷ Kova haipeva opava retape hai: Avytei peche.