¹ Hãrã mõkue araima'ẽ paskua verã, arete pãhã jylevaduramba, hãmã pai ruvisha hareka Moise mbypara vekua pyrỹmboi'iheare heka marãrapo pysyka Hesu, mbytavy rupii juka verãre; ² hãrã hei reta: Avy jajapo aretepe, mahẽ hẽnta'õre pũã ñandyrehekui. ³ Hesu ĩme'ẽ Betaniape, Simon, kuru porãmba'i vekua hẽntape, mesapema ñynõĩrã, vãhẽ ou pẽnte taupe veruva mbai hyru tynỹhẽ'õ mbai pisheka kavi hepyva ryheva, nohẽrã ñohẽhe mbai pisheka kavi Hesu ñakãre. ⁴ Hãrã haipe õre poshyjyrerã hei reta: Marã'irãra jyvareareihe mbai pisheka kaviva? ⁵ Katutẽ õvendea 300 ara mba'apova repykuere, hãmã hepykue me'ẽãtẽshu pavete'iare. Haipe pya ohõãhe retarã poshy jyreshu taupe. ⁶ Tẽvã Hesu hei: Pyma'ẽĩhe, marãnga pyma'ẽĩãhe? Mbai haikaviva rãnga hai japo shyrehe. ⁷ Pavetevare ĩmeñõĩpo pynymbyteipi, hãrã potama haikaviva pijapoherã pijapopohe reta, tẽvã she opa arããpo aiko pynypãũpi. ⁸ Kova taupe hipityshuvaipi japo, shãkare ñohẽ mbai pisheka hareka shyrete, shotyãrã verã. ⁹ Ãñetẽĩte hai pee: Mãĩpi mbe'uhavaipi ko Ñẽẽ kaviva yvy jerekue, mbe'uhapo jyve kova taupe japo shyreheva hareka mãndu'apohe. ¹⁰ Judas Iscariote, hai jyve 12 Hesu mboireare ryheva, oho pai ruvishare ẽvãpe ñono verã Hesu haire ipope. ¹¹ Hãrã hẽndumashu retarã vya jyre, haivi mẽẽshu reta kyrypoti, hãmã Judas heka marãrapo ñono Hesu haire ipope. ¹² Ara tynodevape arete pãhã jylevadurambava hou reta, hareka avisha ray jukaha Paskuarã arape, mboireare heishu: Mapera ripota myhẽndahande Paskuape reu verã? ¹³ Hesu mondo mõkue mboirea retãrã, heishu: Pekua tẽntape. Haipe pĩvãitipo hãndi pẽnte kuimbai kambushipe yy rahava; pekua hipikui. ¹⁴ Mãĩpi oho ichevape oo ija pereshukui: “Pyrymboi'ia rãnga he'ika: “Mape'õ oo'ipera haupo hãndi amboi areare Pascuape ho'uava?" ¹⁵ Hãrã hai heshakapope pẽnte oo vasu vate'õ opama ẽvã; haipepo pymyhẽvã ñande. ¹⁶ Hãmã mboireare õhẽ jyraha voka tẽntaperã, hesha reta Hesu heishua rãĩmi; hãrã haipe myhẽvã reta Paskuape ho'ua verã. ¹⁷ Pỹntuma'irã Hesu hareka mboirea, 12 iare oho hãndi haipe. ¹⁸ Haipe mesape karuma ñynoirã Hesu heishu reta: Ãñẽtẽĩte hai pee, pẽnte pynymbytepe'õ, akaru ãĩ hãndiva shymẽẽkui. ¹⁹ Haire oñepyrũ mbyvy'ã, hãrã pepẽntei pyrãndushu reta: Sherapokui? ²⁰ Hesu heishu reta: Pẽnte 12 pẽiva, peratupe pãhã ãmaky ãĩ hãndiva. ²¹ Ko Kuareta tay rãĩmi ou vekua yvy ĩãrẽ rãnga ohoñõĩpo kuatia ñẽẽ kaviva heiheva rãĩmi, tẽvã ¡pavetepokui pysykava kova Kuareta tay rãimi ou vekua yvy ĩãrẽ! Haikavivetẽshu verã ko kuimbai o'ãã ko yvy ĩãrẽrã. ²² Karuma ñynoirã, Hesu heky pãhã ñymboi ĩãrẽrã, pyseã mẽẽshu retarã hei: Pe'u, kova hai shyrete. ²³ Haivi hekyjy vino ho'uapya, ñymbi ĩãrẽrã mẽẽshu mboireare, hãrã opaiteva hou reta. ²⁴ Heijyshu reta: Kova hai shuruvy, ñaimby py'ahuva ryheva, ñohẽa verã opava retare. ²⁵ Ãñẽtẽĩte hai pee, hauveamapokui ko uva tyy, haujypeve voka arape vino py'ahuva, Ñanderu Tumpa ẽvãpe. ²⁶ Hãmã opama pyrahe ñymboiva ryhevarã, õhẽ oho reta yvyturusu Olivo heta'õpe. ²⁷ Hesu heishu reta: Ko pỹnturã opaitevapo shynotikui, Ñẽẽ kaviva heiva rãĩmi: “Jukahaposhi avisha ñyngarekoite'ihea, hãrã jy'avishare opapo ñymomohẽshikui.” ²⁸ Tẽvã, akuerajymarã ahapokui pynynonderã Galileape. ²⁹ Hãrã Pedro heishu: Opaĩpo ndyreja retakui, tẽvã she ha'ẽã aryreja verã. ³⁰ Hesu heishu: Ãñetẽĩte hainde, ã'ẽ ko pỹnturã, ndei uru mõkue ñyrãrã, mbahapy kavipo shyñomikui. ³¹ Tẽvã Pedro hei jyvyĩ: Katupo amano jyve nendiekui, mapeãpo ãrĩñomikui. Hãrã kỹrã pãveĩ hei reta ĩrũre. ³² Hesu hareka mboireare hãndi vãhẽ jyraha Getsemani he'iashuape, hãrã Hesu heishu reta: Pyvapy kope, ahapo ãĩmboishu Ñanderu Tumpa. ³³ Hãrã raha Pedro, Santiago, hareka Juan. Hesu õñepyrõ mbyrymairã, pya vy'ãã. ³⁴ Hesu heishu: Avya ãĩte rãnga amanopotarã; pypyta kope, avy pechekui. ³⁵ Hesu oho poshy hỹnonde, haipe ĩñesurã syva mboja peve yvyrerã jurureshu Ñanderu Tumpa: katurã mbyhasa shyhevi ko mbai pohyva ahasa verã. ³⁶ Ñymboirã hei: Abba, Sheru, nde rãnga opa mbai javaiã rijapo verã; heky shyhevi kova mbai pohy ahasa verã. Tẽvã avy tiko she aipotava, kõñẽi nde ripotava tiko. ³⁷ Hesu oujy mboireare õperã hesha ocheñynoi reta, hãrã heishu Pedro: Simon, recherarẽĩ? Katu ãĩteira kỹỹ recheãmiterẽĩ? ³⁸ Avy peche, pirure katu mahẽ pyndypyarã'ãkui: Peeara pykỹrẽyte mbai haikaviva pijapo, tẽvã pyndyrete kãngy. ³⁹ Hesu hykũãĩ oho ñymboijyshu Ñanderu Tumpa, hei vekua rãĩmi katĩ heijy. ⁴⁰ Oujyrã hesha mboireare ochejy reta, shara hypehyitema retarã, kuãã heishu verãre. ⁴¹ Hesu mbahapy oujyvape heishu: Peche, hareka puputupẽĩ kate. Haikavima, vãhẽma Kuareta tay rãĩmi ou vekua yvy ĩãrẽ mẽ'ẽhã heko porãmba iare ipope. ⁴² Pupũã jaha, shara vãhẽserima ou shymẽẽva. ⁴³ Hesu ĩnjeta teri'ẽ vẽkua, vãhẽ ou Judas Icariote hai jyve pẽnte 12 mboireare ryheva, kuareta hetava ou hãndi kyse hareka yvyra ipope veru reta. Voka pai ruvisha, Moise mbypara vekua pyrỹmboi'iheare, hareka kuakuavare jokueva. ⁴⁴ Judas pyrypysykava heishu: “Hovape apyteshuvapo hai, pypysykui hareka kapyry pyrahakui." ⁴⁵ Hãmã Judas ñymboja Hesu ẽvãperã hei: Pyrỹmboi'ia! Hãrã pyteshu. ⁴⁶ Haivi pysy Hesu perã, ñapĩtĩape raha reta. ⁴⁷ Hãmã pẽnte haipe õ nohẽ jykyserã, poryhe pai ruvisha jokuerearã nambi hyvaisho jasyja shi. ⁴⁸ Hãrã Hesu heishu kuaretare: Mãrã'ĩrãra pepope peru kyse hareka yvyra shyraha verã, manarõ'ia rãĩmi? ⁴⁹ Opa ara rãnga ãĩ she pyny pãupe apyrỹmboi tupaope, tẽvã shy pysyãpi. Kova rãnga jehu hekope kavi Ñanderu Tumpa ĩñẽẽpe heiva iko verã. ⁵⁰ Hãmã opaite mboireare heja Hesu, hãrã opa ñemi reta. ⁵¹ Hãmã pẽnte kunumi savana pẽĩ ñymama ia oho haykue, hẽrã syndarore pysy; ⁵² tẽvã kunumi savana tĩvã hejarã, hãrã nanitei ñyvãhẽ. ⁵³ Hãmã rahashu reta Hesu pai vasure hỹnonde, opaiteva ñymbaty pai ruvishare, kuakua vare hareka Moise mbypara vekua pyrỹmboi'iheare. ⁵⁴ Hãmã Pedro mbyryĩ oho i Hesu haykue, pai juhuvishare hoo jykora peve vãhẽ. Haipe Pedro vapy hãndi syndarore tata hyvache jypee ñynoi. ⁵⁵ Hãmã pai juhuvishare, Judiore juhuvisha heka ñynoi mãrãrapo ñono vaishu Hesu, jukaka verã; tẽvã vãhẽãshu reta. ⁵⁶ Hãmã hetatẽ mba'ety vekua hei heva, tẽvã ĩñẽẽpe opa jyvavy reta. ⁵⁷ Hãmã ĩmẽ'ẽ puãrã ñẽẽ mbijapuva Hesu, heiva: ⁵⁸ Ore hẽnduha heirã: “She opapo aitykui ko tupao kuimi japo vekua, tẽvã mbahapy arape amupuãpojy ỹngava, ha'ẽã kuimbaire japova.” ⁵⁹ Hãmã haipe jyvyĩ pẽnte ñẽẽ peã ñynoi reta. ⁶⁰ Haipe kuaretare mbytepe pũã paire juhuvisharã pyrãndushu Hesu: Mba'ẽãrapo rere? Ryhẽnduara mbaivara hei ñynõĩ ndyrehe? ⁶¹ Hãmã Hesu mba'ẽã hei. Hãmã paire juhuvisha hykuãi pyrãndu jyshu: Ndera hai Kristo, Ñanderu Tumpa heko kaviva Ray? ⁶² Hesu hei: She hai. Pee pyhesha pokui Kuareta tay rãĩmi ou vekua yvy ĩãrẽ, vapyma Ñanderu Tumpa mbaikatu jakata kyty, hareka oujy ara vateivi ãvãpỹntupy. ⁶³ Hãmã paire juhuvisha mỹndoro mõndevarã hei: Mbai verãra ỹnga jaikotẽvẽpo jyhe mambeu ñande verã? ⁶⁴ Pyhẽnduma rãnga ĩnjeta põrãhe Ñanderu Tumpa; Marãra pereshu? Hãmã opaiteva hei hereta: Tymano!. ⁶⁵ Hãmã haipe ã ãmokue õñepyrõ myndyvyhe, hesa jokua shirã nũpa retarã hei: Mbeu mbavara nũnũpa!. Hãmã Syndarore nũpa jyre Hesu hovaipi. ⁶⁶ Hãmã Pedro ẽẽ teri oo jykorapy jiche kytyrã, ou pẽnte taupe pai ruvishare jokuerea, ⁶⁷ hãmã hesha Pedro jypee ẽ tata hyvache, ñymbou mãĩ herã heishu: Nde rãnga riko rei jyve hãndi Hesu Nasareno. ⁶⁸ Pedro ñomirã hei: Aikuaanyshu, hareka aikuã vãĩjy voka rereva. Hãrã Pedro õhẽ katuape, hãmã haipe uru ñyrã. ⁶⁹ Hãmã voka taupe heshajy Pedro, hãrã hei haipe õ retape: Kova kuimbai haijyve hai ryheva. ⁷⁰ Pedro katy hykũãĩ ñomijy, haivi haipe õre hei jyvyĩshu reta: Ãẽte rãnga ndee jyve hai ryhevare, Galileava nde, hãrã haire rãĩmi rĩnjeta jyve. ⁷¹ Hãmã Pedro õñepyrõ ĩnjeta porã, hãrã ĩñẽẽ mẽẽ vape hei: Aikuã rãnga voka kuimbai, pee pĩnjetahe sheva. ⁷² Haipe uru mokuehea ñẽẽjy. Hãmã Pedro mãnduahe Hesu heishu vekua: “Ndei teri uru mokue ñẽẽrã, mbahapy jypo nde shiñomi reikui." Pedro mãndua vokava reherã õhẽ katuape, haipe jaheote i.