¹ Hãmã kõĩma ou vape, pai ruvishare hareka Moise mbypara vekua pyrỹmboi'iheare, hãndi kuakuavare ñymbaty ĩnjeta reta, haivi raha reta Hesu pokuaha vape ñono verã Pilato ipope. ² Haipe Pilato pyrãndushu: Ndera hai Judiore juhuvisha vasu? Hesu heishu: Ndema rãnga rere rẽĩ. ³ Hãmã pai ruvishare ĩñẽẽ mombo ñynõĩhe Hesu, ñonovaishu verãre: ⁴ Hãmã Pilato hykuãĩ pyrãndu jyshu: Mba'ẽã rapo rere? Mãĩhe, heta mbai porãmba he ia ndyrehe. ⁵ Tẽvã Hesu mba'ẽã hei; hãmã Pilato kuavẽãma hei verã. ⁶ Voka arete Pascua arape Pilato jypykuaa mohẽ ñõĩva pẽnte kuimbai peresoivi, kuaretare jurureva. ⁷ Haipe ĩmẽ'ẽ peresope pẽnte kuimbai Barravas he'iashua, hai hareka ñi'ĩrũre hãndi pẽnte ñyrãrõpe purukarã. ⁸ Hãmã ou Judiore hetava jurureshu verã Pilato poishi verã pẽnte kuimbai, kuei japosea rãĩmi. ⁹ Hãmã Pilato heishu reta: Pipotara apoijyshi pee Judiore juhuvisha vasu? ¹⁰ Pilato kuaa jyve pai juhuvishare heshatã rehẽĩ mbyperesoka jyre Hesu. ¹¹ Hãmã pai juhuvishare mỹkyrẽy jyvỹĩ kuaretare sapukerã jurure verã Pilatope Barravas poishi verã. ¹² Hãmã Pilato pyrãndu jyshu reta: Mbaivara pee pipota akuarã ajapohe, pymbyheva Judiore juhuvisha vasu? ¹³ Hai reta sapukerã hei: ¡Mbysavava kurusure!. ¹⁴ Hãmã Pilato heijyshureta: Mbaivara hai porãmba japo? Hai reta katy hỹnãtuve sapuke reta: ¡Mbysavava kurusure!. ¹⁵ Hãmã Pilato pota haikavi ẽẽ hãndi retarã, poishi Barravas; hãrã mẽẽshu syndarore nũpãka verã Hesu, haivi mẽẽ Hesu mbysavava verã kurusure. ¹⁶ Hãmã syndarore raha Hesu Pilato juhuvisha vasu ho ipe hee “Pretorio,” hãrã haipe syndarore opa mbatyka. ¹⁷ Hãmã Hesu hetere ñonoha mondeava pỹtãva, hãrã ñonohã ñakare pẽnte korona juuvi ñopeãva. ¹⁸ Hãmã oñepyrũ Hesupe ñymby horyape marãndurã heishu: Ore ỹrỹnỹpỹa jatyka nynõnde! Nde hai Judiore juhuvisha vasu!. ¹⁹ Hãmã nũpa reta ñakaipi pẽnte yvyrape, hãrã myndyvy hovare, hareka ĩñesu ra ãnga hỹnonde reta. ²⁰ Hetama Hesu ñymby horyhe retarã, hekyjy shi reta mondeava pỹntava, hãrã Hesu ha ei mondeva mỹmondekajy reta, hãrã nõhe katuape raha mbysavava verã kurusure. ²¹ Pẽnte kuimbai Cirenepe ia Simón heiashua, Alejandro hareka Rufo tuu, ñũũvi oujyva. Hãmã haipi hasarã, miñerã mbyrahaka reta Hesu jukurusu. ²² Hãmã rahashu reta Hesu pẽnte henda “Golgotape” he'iashuape, he'iseva: Tãka kãvẽ rẽnda. ²³ Hãmã mẽẽshu reta vino irova mbihi ava hou verã, tẽvã Hesu ho uã. ²⁴ Hãrã hupishu reta Hesu kurusure, haipe syndarore mbijajao ñynõĩ reta Hesu monde vekua, dadopy jyvarerã ity ñynõĩ yvype hesha verãre mbaivara pepẽntẽipo raha. ²⁵ Hãmã kõĩ mbyte nũnga vape, hupishu reta kurusure. ²⁶ Hãmã pẽnte mbyparava ñonohã kurusu ñakare mbaiva rehera jukaha, heiva: “Judiore juhuvisha vasu." ²⁷ Hãrã haipe mbysavava hãndi mõkue manarõ'iare, pẽnte jakata kyty hareka ĩrũ jasu kyty. ²⁸ Hãmã kyrã iko voka Ñanderu Tumpa ĩñẽẽ kavivape heiva: “Mbai porãmba japo ia reta mbivacheha." ²⁹ Hãmã haipi hasava ĩñẽẽ mombohe Hesu, ñãka mbyvava jyrerã hei reta: Mbah!, nde rãnga tupao rityrã, mbahapy arape rũmupuã jyvẽrã nda. ³⁰ Rysyry rãngapo rẽĩvavi, vejyshi kurusu. ³¹ Kỹrã ñymby hory jyve hereta Hesu, pai ruvishare hareka Moise mbypara vekua pyrỹmboi'iheare. Hei ijupe reta: Hetape japo kavi tẽvã, ijehema mbai ãĩte japo haikaviva. ³² Hãmã ko Kristo, Judiovare juhuvisha vasu, ã'ẽ tyvejy kurusuivi heshaha verã hãmã rojahapo jyve. Hãmã voka mbysavava hãndiva kurusure poshyre jyveshu. ³³ Vãhẽma ka'aru nũnga vape, opaite yvy jerekue opa timimbi, ka'aruite mbahapy ora peve. ³⁴ Hãmã Hesu hỹnãtu sapukerã hei: Eloi, Eloi, Lama sabactani? vokava he'ise: Sheru Tumpa, Sheru Tumpa, Mãrã'ĩrãra sheĩ shyreja? ³⁵ Hãrã haipe õre hẽndumarã hei jyre: Pyhẽnduno, hẽnoma ẽTumpa ĩñẽẽ mbeu'ia Elia. ³⁶ Hãmã pẽnte hairetava ñani ou mãky verã esponja vinagrepe, hãmã jokua yvyra takuara japyrerã mby houka, hãrã hei: Pyma ẽĩhe, jahesha nga Elia ou mbyvejyshukui. ³⁷ Hãrã Hesu hỹnãtu sapuke jyrã, jeky. ³⁸ Haivi tupao vasupy õ savana tivishava mbyteipi soro, vateivi hareka yvykyty. ³⁹ Hãmã syndaro ruvisha Romano, ñymbou i Hesu hỹnondeva hesha kyrã jekyrã, hei: Añetẽĩte mba kova kuimbai hai Ñanderu Tumpa tay. ⁴⁰ Hãmã ĩmẽ'ẽjyve haipe taupere mbyryivĩ maĩ ñynõĩ; haire mbytepe ẽ Maria Magdalena, Maria, Jakobo ndei veva hareka Jose ishy, hãndi Salome. ⁴¹ Hãmã kova taupere hai Hesu mi ĩrũ jyreva Galileape irã, ijokueka jyreshu; hãrã heta ẽjy ĩrũ taupere oho hãndi vekua Jerusalenpe. ⁴² Hãma ka'aru pỹntuma, ñai kavi verã jy arape, hareka putu'uava jy ara seri vape. ⁴³ Hãma ou Jose Arimateape ia, kuimbai heko kaviva, hãrã mburuvishare hãrõ ñynõĩ jyve Ñanderu Tumpa Êvape, hãmã kyjeã icheshu Pilato jurureshu verã Hesu hetekue. ⁴⁴ Hãmã Pilato mỹngyje hẽnduma mbe ua Hesu jekyrã, haivi hẽnoka syndaro ruvisha pyrãndushu verã jekymara. ⁴⁵ Hãmã kua kavi syndaro ruvisha juruivirã, mẽ ẽkashu Hesu hetekue Jose. ⁴⁶ Hãmã Jose ovama savana kavivarã, mbyvejy Hesu hetekuerã ñomapy. Haivi raha ñono ita jo oa vekuapy, hãrã ita vasu pẽi mbotyjy ĩãrẽ. ⁴⁷ Maria Magdalena, hareka Maria Jose ishy kua reta mapera Hesu hetekue ñonõha.