¹ Hasama putu'uhava ararã; Maria Magdalena, Maria Jacobo ishy, hareka Salome, ova reta mbai pisheka raha ñonohe verã Hesu hetekue. ² Tynonde ara semana õñepyruape kõ ẽĩ kuarasy õhẽñõĩte, oho reta Hesu hã õve ñotyãvape. ³ Taupere hei jyraha ijupe: Mbavãtepo mbysyry ñandekui ita vasu tã õvẽ ẽvãpe õ hõche mbotyha pya? ⁴ Tẽvã mãĩ retarã hesha ita vasu mbotyha pya ẽvẽkuape veama ẽ. Kova ita rãnga marẽỹĩteve vekua. ⁵ Ichema reta voka ita jo'oava hapyperã, hesha reta jakata kyty kunumi mondea tĩva pukuhea vapy ẽ; haipe taupere opa kyje japyraha. ⁶ Hai heishu reta: Avy pykyjeite, pee rãnga pyhekapi Hesu Nazareno, kurusure mbysavava vekua. Hai rãnga hykove jyma, mba'etyma kope. Pymãĩ ñonoã vekuape, hendakueima ẽ. ⁷ Pekua pymbeushu mboire vekuare hareka jyve Pedro: Hai ohopo pynonderã Galileape; haipepo pyheshajyshukui, hei pee vekua rãĩmi. ⁸ Hãmã taupere õhẽjy tã õvẽ ẽvãivirã, opa ryry hareka kyje ryheve ñanijy jyraha. Hãrã mba'ẽã mbavape hei, shara kyjeite reta. ⁹ Hesu hykove jymarã, voka semana õñepỹrõ verãpe kõ ẽĩ, Maria Magdalena rãni ijeshakashu, (7) mbai poshy ĩmẽrerã mohẽshi vekua. ¹⁰ Haivi oho mbeushu Hesu mi ĩrũreare, jaheo hareka vyamba õre. ¹¹ Hẽndu reta Hesu hykove jya, hareka Maria Magdalena heshajyshua, tẽvã haire rojã. ¹² Haivi, Hesu hykuãi ỹngai ijeshaka jyshu mõkue mboireare, jyraha jyre ñu kytyrã. ¹³ Haire oho mbeu jyveshu ĩrũre, tẽvã haire rojã reta. ¹⁴ Haivi koñema heape Hesu ijeshakajy (11) mboireare retape, haire vapy ñynõĩ mesaperã. Ñyngãtashu reta jyrojã, hareka pya rãtaite retarã, shara rojã reta hykove jyrã hesha vare mbeutẽ jyrerã. ¹⁵ Haivi heishu reta: Pekua opa rupii yvy jerekue, hareka pymbeushu opaite kuaretare ko ñẽẽ kaviva. ¹⁶ Ĩmẽ'ẽ rojava hareka ñymyngaraika varã ohojepepo, tẽvã rojambava jahea pohe. ¹⁷ Ko mbaikavi heshaha verã mĩ'ĩrũpo opaite rojavare: Shy reepe mohẽ pokui mbai poshy, ĩnjetapo ñẽẽ py'ahuvape; ¹⁸ pysypo reta mboi, hareka houpo mbai purukava tẽvã mba'ẽãpo japohe reta, ipo ñono ĩãrã ñymbairasyvarã, kuerapo. ¹⁹ Opama ñimiñẽẽshu retarã, Ñanderu Hesu hupihajy vate arapy, hãrã vapy Ñanderu Tumpa jakata kyty. ²⁰ Hãrã haire oho mbeu ñẽẽ kaviva opa rupi, Ñanderu Hesu mboryshu reta. Hãmã my ãñete ĩñẽẽre mbaikavi heshaha verã iko vekua rupi. Amẽn.