¹ Haivi Hesu õhẽ oho hãndi mboireare heta tẽnta vãsu hareka tẽnta mire õĩpi, ñimiñẽẽ hareka mbeu Ñanderu Tumpa irreino ryheva. ² Kỹrã mĩ'ĩrũ jyve heta taupere mbai poshy mohẽ shi vekuare hareka mynguera vare mbairasyivi. Haire mbytepe ẽ Maria, Magdalena he'iashua, Hesu mohẽ shi vekua mbai poshyre. ³ Oho jyve Juana, Chuza hỹreko, Herodes jy kyrypoti ñyngareko ihea; hareka Susana, hãndi heta ỹngare mboryva ĩmẽreare ryheve. ⁴ Heta õhẽva kuaretare tẽnta retaivi hesha verã Hesu, hãrã heta ñymbaty reta. Haipe mbeushu reta ko ñẽẽ ñymyhã ãnga: ⁵ Pẽnte ñymity ia õhẽ ñõty verã mbai rãy. Hãrã ma ẽtymãrã, ĩmẽ'ẽ oava pehupi, opa pyrõãhe, hareka vyrare opa hou. ⁶ Ĩmẽ'ẽjy oava ita paũpe; heñoteã opa jipi yvy ñakyãshurã. ⁷ Ĩrũre oajy ju heta õ paũpe, heñotẽa ñanava jyvache hẽñõ hãndiva opa jasoi. ⁸ Tẽvã ĩmẽ'ẽ mbai rãy oava yvy kaviape. Hẽñorã ia peve pẽnte hãỹvi. Hesu opa hei kovarã hynatu heishu reta: Japysa iare, tyhendu. ⁹ Hãmã Hesu mboireare pyrãndushu: Mbaivara he'ise vokava ñẽẽ ñymyhã ãnga? ¹⁰ Hesu heishu reta: Pee rãnga Ñanderu Tumpa pymby kuaaka mbai ñemiape õ irreino ryheva; tẽvã ỹngare ãĩjetashu ñẽẽ ñymyhã ãnga rupii, hãrãpo mãĩte ivare pyta hesha mbava rãĩmi, hareka hẽndurã pyta kũaa reta. ¹¹ Kova rãnga he'ise ñẽẽ ñymyhã ãnga ñimity ia ryheva: Mbai rãy rãnga hai Ñanderu Tumpa ĩñẽẽ; ¹² mbai rãy oava pehupi, hai hẽnduva Ñanderu Tumpa Ĩñẽẽ. Tẽvã ou ãña opa hekyjyshi pyaivi ñẽẽ kaviva, potã jyroja hareka oho jeperã. ¹³ Mbai rãy oa vekua ita pãupe rãnga hai Ñanderu Tumpa Ĩñẽẽ hẽndurã, vy ape rojava; tẽvã hapo pukũãrã, sapyãĩtẽĩ jyroja, oumashu mbai porãmbarã, poi jyroja. ¹⁴ Mbai rãỹ oava ñana pãupe hai hẽnduva Ñanderu Tumpa Ĩñẽẽ. Tẽvã ohorã mbeve katu kangy, ojepy apyitẽrã, mbai pota kuere, hareka mbai porãmba vãĩ pota japo i, hãrã i ã. ¹⁵ Mbai rãy oava yvy kaviape hai hẽnduva Ñanderu Tumpa Ĩñẽẽ, pya kaviva hãndi hekope kavi nãtu, hareka japova ñẽe hẽndu vekua, hãrã ia kavi hasa asyte ia. ¹⁶ Mbaveã myhẽndy mbai sapeka ñono verã mbai hyrupe ti katre ipe; vate rãnga ñono iche ouvare sapehe verã. ¹⁷ Kỹrã jyve mba'ety mbai javai õ heshamba verã, mba'ety mbai ñemiape õ kuaamba verã, hareka õhẽmba verã kõĩvape. ¹⁸ Hãrã pyhẽndu kavi kova: Ko ĩmẽrea me ẽãve poshu hetave re verã, tẽvã mba'ety reva mĩshĩ ĩmẽte rea mikue opapo hekya shi. ¹⁹ Haivi ou Hesu ishy hareka tyvyre hai ẽvãpe, tẽvã katuã vahẽ ohoshu reta hetaite kuaretarã. ²⁰ Ĩmẽ'ẽ mbeushua Hesu: Nde sy hareka ndy ryvyre katuape jyre, pota ndyresha reta. ²¹ Hesu heishu reta: Hẽndu hareka japova Ñanderu Tumpa ĩñẽẽ, hai reta rãnga she sy hareka shy ryvyre. ²² Pẽnte arape Hesu jupi kanoape mboireare hãndi, hãrã heishu: Jahasa yyvasu hyvaisho kyty. Haivi oho reta. ²³ Haivi ohoma retarã Hesu oche. Haipe sapy ãĩ vãhẽ yy ĩãrẽ yvytu vasu ñakuarai ouva, õñepyrõ kanoa opa tynyhẽ yykue miñapyvỹĩ verãĩma õ rãĩmi. ²⁴ Haivi momba jyre Hesu perã heishu: Pyrỹmboi'ia! Pyrỹmboi'ia! ñañapỹvyĩma rãngapo! Hesu pũãrã ñyngãtashu yvyty vasu hareka yy ñãrõvã, haipe poo ẽrã ara kavijy. ²⁵ Haivi Hesu heishu mboireare: Mbaivara ikoshi pirojakue? Tẽvã haire hairãĩte hesha, hãrã kyje ryheve pyrãndu ijupe reta: Mbavarajy ko kuimbai ĩnjetashu yvytu hareka yyvasurã japoshu heiva? ²⁶ Hasype vãhẽ jyraha yvy Gadarape yyvasu hyvaishu kyty, Galilea hyvache. ²⁷ Hesu vejymarã vãhẽ oushu pẽnte kuimbai voka tẽntape õ, kurimba mbai poshy ĩmere vekua. Ñimimonde jymba hareka ikojy mbava hẽntape, tã õvere õĩpĩ i. ²⁸ Heshama Hesu perã ĩñesu hỹnonderã sapuke: Hesu, Tumpa vateve õ Ray, mbaivara ĩmẽ are nendie? Airure nde avy jahe shyrehe. ²⁹ Kỹrã hei shara Hesu heishu mbai poshy õhẽshi verã. Hetajy mbai poshy pysy jyshu, hãrã pyta verã pẽnte hendapẽĩ, ñapintiha kadenape ipo hareka ipyre, tẽvã opaĩ myndoso ijuhuvi, hãrã mbai poshy rahashu yvy ikoambaipi. ³⁰ Hesu pyrãndushu: Mãrãra hei o ndyree? Hãrã hai hei: Legion he ia rãnga she. Kỹrã hei shara heta jyre mbai poshy ichepy vekua. ³¹ Hãrã ko mbai poshyre jurureshu Hesu, avy mondo verãre yvykua vasu Ãña ẽvãpe. ³² Haipe mbyryã karu ñynõĩ kushi hetava yvyturusure, hãrã mbai poshyre jurureshu Hesu ma ẽĩhẽ ichepy verã kushire hetepy. Hãrã Hesu ma ẽĩhẽ reta. ³³ Hãmã mbai poshyre õhẽshi ko kuimbai hãrã opa jyraha ichepy kushire, kushi hetava vekua vateivi opa oapy yyvasu, haipe opa mano. ³⁴ Kushi ñyngareko iheare heshama ikovarã, opa myngyje, hãrã oho mbeu reta tẽntaipi hareka ñũũ hupi mbaivara iko. ³⁵ Hãmã kuaretare opa jyraha mãĩhe iko vekua, vãhẽ jyraha Hesu ẽvã perã hesha reta kuimbai mbai poshy õhẽshi vekua, vapy ẽ Hesu hỹnonde, ñimi mondema hareka hai kavi jyma ẽ; hãrã opa kyje reta. ³⁶ Haipe hesha vare mbeushu reta, mãrãra myngueraha voka mbai poshy ĩmere vekua. ³⁷ Haipe Gádarape iare jurure jyreshu Hesu oho verã haivi, kyjeite jyrerã. Hesu jupi kanoa perã ohojy. ³⁸ Ko kuimbai mbai poshy õhẽshi vekua jurureshu Hesu mi ĩrũ verã, tẽvã Hesu he iãshu oho hãndi verãrã heishu: ³⁹ Ekuajy nyrẽtape, mbeu Ñanderu Tumpa japo ndy reheva. Ko kuimbai ohorã, õñepyrõ mbeu opa rupii Hesu japohe vekua. ⁴⁰ Hesu oujyma yyvasu hyvaishoivirã, kuareta hetava horyi jyre, shara opaiteva hãrõ ñynõĩ. ⁴¹ Haivi vãhẽ ou pẽnte kuimbai Jairo he'iashua, Sinagoga pe õ mburuvisha, haipe ĩñesu Hesu hỹnonderã, jurureshu oho verã hẽtape; ⁴² shara ĩmere pẽnte ia tajy, ãñoma rea, mano verãĩma õ. Hesu oho marã, kuareta hetava oho hipi, hãrã opa jopy rahashu reta. ⁴³ Haire mbytepe ẽ pẽnte taupe japomava (12) ãño hasyva tuvy vasuivi, opama mẽẽva ĩmerea pajeva retape, tẽvã mbaveã katu mỹnguerashu. ⁴⁴ Ko Taupe ñymbojahe Hesu haykueivirã pokohe mondeva hymbeyre, haipe vãĩ ñandu pytashi tuvykue. ⁴⁵ Haipe Hesu pyrãndu: Mbavara poko shy rehe? Mba veãma heishu poko hearã, Pedro hareka ñi'ĩrũre hei: Pyrỹmboi'ia, ko kuareta hetava rãnga opa ndasoi hareka opaivi nymaña ñynõĩ reta, hãrãra rỹpyrãndujy: “Mbavara poko shy rehe? ." ⁴⁶ Hesu hei jyvyĩ: ĩmẽ'ẽ poko shy reheva, aikua ãĩ ĩmẽ amynguerava shy mbaikatupyrã. ⁴⁷ Hãmã taupe kuahe ñemĩãrã, ryry ryheve ou ĩñesu Hesu hỹnonde. Haipe mbeu opavare hỹnonde mãrã'ĩrãra pokohe, hareka mãrãra kuera. ⁴⁸ Haipe Hesu heishu: Shy rajy, rirojarã rykuera. Kapyrỹĩ ekuajy. ⁴⁹ Hesu ĩnjeta teri õ vãhẽ ou Jairo ẽvãpe pẽnte jokueavarã heishu: Ndy rajy manoma, ỹteño mãĩhe pyrỹmboi'ia. ⁵⁰ Hesu hẽndu vokavarã heishu Jairo: Avy kyje. Jyrojaiño, hãrã ndyrajy oho jepe pokui. ⁵¹ Vãhe jyraha Jairo hẽntaperã. Hesu mã ẽĩã he iche hãndi ỹngavare, koñeĩ Pedro, Jacobo, Juan, hãndi kuiñatãĩ ray ishy hareka tuu. ⁵² Opaite jaheo hareka mbasy ñynõĩhe reta kuiñatãĩ ray manorã. Tẽvã Hesu heishu reta: “Avy pijahe o. Ko kuiñatãĩ ray manoã, ochei rãnga ẽ." ⁵³ Haivi joje jyre Hesu, shara kuaa reta manomava. ⁵⁴ Hesu pysy ipoperã, hỹnatu ĩnjetashurã hei: “Kuiñatãĩ ray, pũ ã!." ⁵⁵ Haipe hykove jyrã, pũã; hãrã Hesu mẽ ẽkashu hou verã. ⁵⁶ Tuu hareka ishy retany pya myngyje vokava; tẽvã Hesu heishu reta, potamba mbavape mbeuvare ko iko vekua.