¹ Hesu opa ñimiñẽẽshu kuareta retarã, oho apernaumpe. ² Haipe iko huvisha Romape õ ĩmẽrea pẽnte jokuerea haihuva, hai ñymbairasy hareka mano verãĩma õ. ³ Hãmã hẽndu voka huvisha Hesu he ia hevarã, mondo ẽvãpe kuakuavare Judio ryheva, jurureshu verã ou mynguerã verã jokuerea. ⁴ Haire ñymboja Hesu ẽvãperã jurure jyvỹĩshu retarã hei: Haikavi rãngapo rymbory jyve kova huvisha; ⁵ haihu rãnga ñany rẽta, hareka hai teiva japoka ore Sinagoga. ⁶ . Hãrã Hesu oho hãndi reta. Tẽvã kõõĩma ẽshi hoorã, mburuvisha mondo ñi'ĩrũre Hesu ẽvãpe he'ikashu: Karai, avy ajeteã tõĩ ndekui, she rãnga shy reko porã riche verã shero ipe; ⁷ hãme rãnga she teivãã ahaje rẽĩvape. Erẽĩshu pẽnte ñẽẽ hãrã ajokue area kuerapo. ⁸ She rãnga ãĩ jyve mburuvisha ipope, hãrã ĩmẽ are jyve syndarore shepope. Haishu pẽnteva oho verãrã, oho; hãmã ĩrũre haishu ou verãrã, ou; ĩmẽ'ẽ ajapokashu verã ajokue arearã, japo. ⁹ Hesu hẽndu Centurion ĩñẽẽrã hesha rãĩte, hãmã mãĩhe mĩ'ĩrũrea retarã hei: Ãẽteva hai pee, Israel vare mbytepe aheshã teri kỹrãite jyrojava ko kuimbai rãĩmi. ¹⁰ Oujy mburuvisha hẽntape jokueava retarã, hesha jokuearea ñymbairasyva kuerama. ¹¹ Haivi Hesu oho pẽnte tẽnta Nain he'iashua kyty, mĩ ĩrushu mboireare hareka kuaretare hetava. ¹² Vãhẽ serima jyraha tẽnta perã hesha rahaha pẽnte manova ñotỹa verã, ĩme mano shia memby kuimbai koñẽĩ rea. Heta haipe hẽnta ĩrũre mĩ'ĩrũshu ĩme manoshia. ¹³ Hesu hesha taupe ĩme manoshia, parekoiterã heishu: Avy jahe o. ¹⁴ Hesu ñymboja herã pokohe ta õvẽ ẽpya; haipe rahavare pyta. Hesu heishu mano vekua: Kunumi, She hai nde: Pũ ã!. ¹⁵ Haipe kunumi mano vekua pũã vapyrã õñepyrõ ĩnjeta, haivi Hesu mẽẽ jyshu ishy. ¹⁶ Heshama reta kovarã, opa kyje reta hãrã omombaishu reta Ñanderu Tumpa, hei jyre: Pẽnte Tumpa ĩñẽẽ mbeu’ia mbaikatuva pũã ñany mbytepe. Heijy reta: Ñanderu Tumpa ou mbory hẽnta ĩrũre. ¹⁷ Hãrã opaite Judea hareka juri õ retaipi kuaaha Hesu japova. ¹⁸ Juan hẽndu opaite kova mbai, shara mboireare mbeushu, haivi hẽno mõkue hai mboireare, ¹⁹ mondo Hesu ẽvãpe pyrãndushu verã, haira ãñete Kristoou verã, ti ĩmera ẽjy ỹnga hãrõa verã. ²⁰ Hãmã Juan jokuevare vãhẽ Hesu ẽvãperã heishu: Juan Bautista rãnga ỹrỹmbou pyrãnduha nde verã, haira nde Kristoou verã ti ĩmera ẽjy ỹnga hãrõa verã. ²¹ Haipe kavi Hesu mynguera heta ñymbairasy vekua, iko asyva, hãndi mõhẽ mbai poshyre, hareka heta mynguera heshamba kũvãĩpiare. ²² Haivi Hesu heishu reta: Pekua pymbeushu Juan ko pyheshava hareka pyhẽnduva. Pymbeushu marãra hẽshamba kũvãĩpia, heshajy; vatajy mba iare, vatajy; hete kuru porãmba vare, myngueraha; japysamba iare, hẽndujy; mãno vekua, kuerajy; hareka pavete'iare mbe uashu ñẽẽ kaviva. ²³ Vyapo poimba jyroja shy reheva. ²⁴ Juan jokuevare opajyma ohorã, Hesu õñepyrõ ĩnjeta Juan rera hei: Mbaiva pyhesha verãra peho yvy ikoambaipi? Takuara yvytu mbyvava õra? ²⁵ Mbaivara akuarã peho pyhesha?, pehora pyhesha pẽnte kuimbai ñimimonde kavi ia? Pee pikuaa, ñimimonde kavi ia hareka vy ape ia, mburuvisha vasu hoo ipi ia hai. ²⁶ Mbaivara akuarã peho pyhesha?, pẽnteTumpa ĩñẽẽ mbeu'ia ñimiñẽẽ iara? Kỹrã she hai pee, pyhesha pẽnte mbai vasuvevaTumpa ĩñẽẽ mbeu'iaivi. ²⁷ Juanre rãnga Ñanderu Tumpa kuatia ñẽẽ kaviva ĩnjetaherã hei: Amondo ajokueva nynonderã, myhẽva verã ndy raperã. ²⁸ She hai pee, mba'ety kuimbaire mbytepe mbai vasuveva Juan Bautistaivi; tẽvã mishiveva Ñanderu Tumpa Êvãpe, mbai vasuvepo shi hai. ²⁹ Opaite kuareta hẽnduvare hareka kyrypoti okora iare Roma pevarã ñymyngaraikashu reta Juan, kuaakavi reta Ñanderu Tumpa heko kavivarã. ³⁰ Fariseore hareka Moise mbypara vekua pyrỹmboi'iheare, ñymyngaraika mbashuare Juan, mba'ẽãshu haire pevarã Ñanderu Tumpa potãtẽ japo heare. ³¹ Hesu heijy: Mbaiva rera ambivachepo ko kuaretare ã'ẽ vare? mbaiva pera ova? ³² Oova sanjayre vapy jyvavare õre plazape, sapuke jyreshu ñi'ĩrũ retarã hei: “Mbopuape mimby, tẽvã pirokyã; pyraheape mbyrahe pavete ova, tẽvã pijahe oã." ³³ Ou Juan Bautista, houmba pãhã hareka vino; peeny pereshu mbai poshy ĩmẽrea. ³⁴ Haivi aijyve, Kuareta tay rãĩmi akaru hareka hauva vino, hãrã pere she: Akaruiteva hareka aka uiteva, añimĩ ĩrũ aihea heko porãmba hareka kyrypoti okora iare Roma pevarãre hãndi. ³⁵ Tẽvã Ñanderu Tumpa mbai kuaakue ijyheshahe mbai japo kavi vekua rupii. ³⁶ Pẽnte Fariseo jurureshu Hesu oho karu verã hẽntape, hãrã oho vapy ẽ mesape karu verã. ³⁷ Haivi pẽnte taupe heko porãmbava voka tẽntape ia,kuama Hesu oho karu Fariseo hẽntaperã, vãhẽ ou pẽnte mbai hyru ryheve tynyhẽ õ mbaipisheka kavi. ³⁸ Jaheo ryheve vãhẽ Hesu ipy ẽvãpe, saypẽĩ johe. Haivi ñakahapy mĩtĩni jyshu, pyterã ñohẽhe ipyre mbai piseka kavi. ³⁹ Fariseo jurureshu vekua Hesu oho karu verã heshama vokavarã hei pyape: “Ko kuimbai ãẽte haiTumpa ĩñẽẽ mbeu'iarã, kuaa tẽvẽrã mãrãva taupera poko ẽhe, taupe heko porãmba rãnga hai." ⁴⁰ Haipe Hesu heishu Fariseo: Simon, ĩmẽ are pẽnte mbai hai nde verã. Fariseo hei: Mbeu she, pyrỹmboi'ia. ⁴¹ Hesu heijy: Mõkue kuimbai mẽẽjy tẽshu verã kyrypoti porykashuape. Pẽnteva mẽẽjy poshu 500 ara repy, ĩrũ 50 ara repy. ⁴² Katuveãma mẽẽjy retarã, kyrypoti porykava mõkue veape hejarei shi reta. Ã'ẽ mbeu sheno: Mbavara mõkue õ retaivi haihu veposhu? ⁴³ Simon hei: She pevarãra hetave heja reishi vekua. Hesu heishu: Ãẽte rãnga rereva. ⁴⁴ Hesu mãĩhe tauperã heishu Simon: Ryheshara ko taupe? Aiche je ndero ipe tẽvã rỹmẽ ẽã sheje yy shepy ajohepy verã; ko taupe ny mbijahu shepy saype, hãrã mĩtĩnijy ñaka haapy. ⁴⁵ Nde shypytẽa je shy mãrãndurã, hainy iche ourãvãĩ poia pyte shepy mõkue ryheve. ⁴⁶ Rykytyã je shãkare asaite, hainy ñohẽ mbai pisheka kaviva she pyre. ⁴⁷ Hãme rãnga hai nde, heta mbai porãmba japo vekua hejaha reima shi, shara pyryhaihuite; tẽvã kuareta mĩshĩ hejaha rei shiany, mĩshĩ heshaka jyhaihu. ⁴⁸ Haivi Hesu heishu taupe: Mbai porãmba rijapo vekua hejaha reima ndyhevi. ⁴⁹ Hãrã ĩrũre mesape ẽ hãndiare, õñepyrũ hei ijupe: Mbavara jy ko kuimbai mbai porãmba vekuaave heja rei ia? ⁵⁰ Hesu heishu taupe: Rirojarã reho jepema, kapyryĩ ekuajy.