¹ Pẽnte ara putu'uava jy arape Hesu hasa oho koo kueipi, hãrã mboireare mynõ trigo hãỹ, hãmã ipope jasyjarã hou jyre. ² Hãmã Fariseore pyrãndushu: Mãrã'ĩrãra pijapo mba tẽvẽrã pijapo pẽĩ putu'uava jy arape? ³ Hãrã Hesu heishu: Pimbi jetãra pee Ñanderu Tumpa kuatia ñẽẽ, mbaivara David hareka ñi'ĩrũre japo arykai opa ñymbahyrã? ⁴ David iche tupaoperã, pysy pãhã kapyryva Ñanderu Tumpape myhẽvãha õrã hou, hãrã mẽẽ jyveshu ẽẽ hãndiare, mbava kuareta mba hou tẽvẽrã, koñeĩ pai retãĩpo hou. ⁵ Hesu heishu: Kuareta tay rãĩmi ou vekua yvy ĩãrẽ, ĩmẽre mbaikatu putu'uava jy arare. ⁶ Hãmã ĩrũ ara putu'uava jy arape, Hesu iche Sinagogape pyrỹmboihe Ñanderu Tumpa ĩñẽẽ. Hãrã haipe ĩmẽ'ẽ pẽnte kuimbai ipo jakata tãta vekua; ⁷ hãrã Fariseore hareka Moise mbypara vekua pyrỹmboi'iheare ñemiã pẽĩ mãĩ jyrehe Hesu, hesha verã mynguera rapo putu'uava jy arape, haivi heka verã mãrãrapo ñono vaishukui. ⁸ Hesu opa kuaa haire pyape hei ñynoĩva, hãrã heishu kuimbai ipo tãtavape: Pũã, ñymboy kuaretare mbytepe. Hãrã kuimbai pũã ñymboy. ⁹ Haipe Hesu heishu ĩrũre: Apyrãndupo pee pẽnte mbai: Mbaivara katu jajapo putu'uava jy arape: Haikavivara? Ti porãmbava?, Ñapyrỹ mynguera? Ti japuruka? ¹⁰ Hãrã Hesu mãĩhe opaite kuaretare juri õ, hãrã hei kuimbai ipo tãtavape: Ndepo mbipyso. Kuimbai kỹrã japo, haivi kuera ipo. ¹¹ Hãmã haipe poshyiteve jyre, hãrã pyrãndu jyre ijupe mbaivara katu japohe Hesu. ¹² Voka arape Hesu oho yvyturusu ĩãrẽ jurure verã, hãrã haipe pỹntu pukukue jurure Ñanderu Tupape. ¹³ Hãmã kõĩ jyrã Hesu hẽno mboireare mbyteivi hai mondo verã, vokavape mbyhee “apostol." ¹⁴ Vokava hai: Simon, Hesu mbyhee Pedro, hãrã tyvy Andres, Jacobo, Juan, Felipe, Bartolome, ¹⁵ Mateo, Tomas, Jacobo Afeo tay, Simon mbyheeava “Zelote." ¹⁶ Judas Jacobo tyvy, hareka Judas Iscariote Hesu pysyka vekua. ¹⁷ Hesu vejy hãndi yvyturusuivi mboireare, hãrã ñymbaty reta ñũũ kyamba õpe, mboireare hareka kuaretare oho hãndiva, Judea, Jerusalen, Tiro, hareka Sidon hỹmbeyvi, jyveru jasakahe verã Hesu ĩñẽẽ, hareka myngueraha verã mbairasyivi. ¹⁸ Opaite iko asy i vekuare mbai poshy ipope Hesu opa mynguera jyve. ¹⁹ Hãmã opava kuaretare pota poko jyrehe Hesu, shara ĩmẽre mbaikatu mynguera verã opaite ñymbairasyva. ²⁰ Hesu mãĩhẽ mboireare, heishu reta: Pyvy apo pee pyndy paveteva, pa ãporã rehe Ñanderu Tumpa Êvãpe. ²¹ Pyvy apo pee ã'ẽ pinimbahyva, pee pynyvãtapo reherã. Pyvy apo pee ã'ẽ pijaheova, pee pupuka verã rehe ²² Pyvy apo pee kuaretare pyreshatã, hareka pimi ĩrũ seãrã, ĩñẽẽ poshy peerã hãrã ma ẽrã vea japo pyndy ree mbai porãmbava rãĩmi shyree pyhaihurã rehe. ²³ Pyvy apo, hãrã pyny tynyhẽpo vy akueivi vokava arape, shara hetavepo mẽ ẽhãjy pee vate arapy; kỹrãĩ japo jyve hereta arykaivaTumpa ĩñẽẽ mbeu'iare. ²⁴ ¡Tenga pee piko katuva, ã'ẽ vãĩ pyvya pẽĩva! ²⁵ ¡Tenga pee ã'ẽ pynyvãta pẽĩva, pimbahypo pikui!. ¡Tenga pee ã'ẽ pupuka piva, vãhẽ pokui ara pijaheo verã!. ²⁶ Tenga pee opavare ĩnjeta kavi pyndy reherã, kỹrãĩ japo jyvehe tynonde shiareTumpa ĩñẽẽ mbeu'ia japure. ²⁷ She katy hai pee shy rẽndu pẽĩva: Pyhaihushu pyndy raihu mbavare, pijapo kavihe pyndy reshatamba iare, ²⁸ ñẽẽ kaviva pymombohe porãmba ĩnjeta i pyndy reheva, pirurehe ñẽẽ porãmba hei i pyndy reheva. ²⁹ Hãmã ĩmẽ'ẽ ndy rova hyvaishoipi nupavarã mẽẽjyshu ndy rova hyvaisho. Ĩmẽ'ẽ rỹmondea ĩãrẽ õ heky ndyhevivarã, mã ẽĩhe tyrahajy ĩrũ rỹmondeva. ³⁰ Ĩmẽ'ẽ jurure ndevarã mẽẽshu; hareka na ãpoa heky rei ndyhevia avy jurure jyshu mẽẽjy nde verã. ³¹ Opavare pipota japo pyndy reheva rãĩmi, kỹrã pijapo jyve opava retare. ³² Pee pyhaihupi pyndyraihu ia pẽĩrã, mbaiva haikavivara pijapo? Heko porãmba ia retave rãnga kỹrã japo jyve. ³³ Hãrã haikavi japo pyndy reheva pẽĩ, pijapo kaviherã, mbaiva haikavivara pijapo? Heko porãmba ia retave rãnga kỹrã japo jyve. ³⁴ Hãmã pee mbai pyporykashu, mõã mbai myngoviajy pee varã mẽĩ, mbaiva haikavivara pijapo? Heko porãmba ia retave rãnga mbai poryka jyve hapisha retape hareka hãrõ myngovia jyshu verãre. ³⁵ Pee katy pyhaihupo pyndy resha tamba iare, hareka pijapopo haikaviva; pyporyka mbaiva mba pyhãrõ myngoviajy pee verã. Kỹrãrãpo hetave myngovia jy pee kui. Hãrã ikopo pyndy hevi Ñanderu Tumpa vateve arapy õ tay. Hai rãnga pya kavi jyve mbai hesha kuambaa hareka pya ñarõ vare hãndi. ³⁶ Pijyparekopo, Ñanderu Tumpa vate arapy õ pyndy parekova rãĩmi. ³⁷ Avy pijapo porãhe papisha, mãhẽ Ñanderu Tumpa porãmba japo jyve pyndy rehekui. Avy pijahehe papisha, mãhẽ Ñanderu Tumpa jahe jyve pyndy rehekui. Pyheja reishi papisha porãmba japo pyndy reheva, hãrã Ñanderu Tumpa heja reipo jyve pyndyhevi mbai porãmba vekua. ³⁸ Pymẽẽ, hãrã Ñanderu Tumpa mẽẽpojy pee. Mẽẽpo pee jyvosape hekope kavi, jopya kaviva, makãtãhã kavipya hareka tynyhẽ õ. Pee pymẽẽva rãĩmi papishape, kỹrãipo Ñanderu Tumpa mẽẽ jyvepe. ³⁹ Hesu mbeushu reta ko ñẽẽ ñymyhã ãnga: Katurapo pẽnte heshamba kũvãĩpia ñyngarekohe ĩrũ hapisha heshamba kũvãĩpia? O ãrapo mõkue ryheve yvykuape? ⁴⁰ Mba'ety mbo earea vateve ẽshia mboirea, hekope kavi ñymbo ekarã mboirea rãĩmipo jyve. ⁴¹ Mãrã'ĩrãra rỹmãĩhe yvyra kui ndy ryvy hesape õ, hãmã rỹmã ẽãhe yvyra mãrẽỹva ẽva ndyresape? ⁴² Mãrãrapo rereshu ndy ryvy: “Shy ryvy, tanohẽ ndy hevi yvyra kui ndy resapy õ”, nde jyve ryhesha mba rẽĩva yvyra mãrẽỹva ndy resapy õ? Tykove hova mõkue ia!, nohẽ rãni yvyra mãrẽỹva ndy resapy õ, haiperã katu ryhesha kavi rynohẽ verã yvyra kui ndy ryvy hesape õ ⁴³ Mba'ety yvyra haikaviva ia porãmba, hareka mba'ety yvyra porãmba ia kaviva. ⁴⁴ Opaite yvyra jypy ia reĩ ijy kuaa mãrãvara; ñamyno õã higo yvyra ju hetarea jypyivi, hãmã vycheri jypyivi japo õa uva. ⁴⁵ Hãrã kuimbai pya kaviva, mbaikavivãĩ hei, shara haikavivãĩ pyape ẽ; hãrã kuimbai heko porãmba katy, mbai porãmbavãĩ hei, shara porãmbavãĩ pyape ẽ. Hãrã ñandy pyape tynyhẽva ñaĩjeta ñandi juruipi. ⁴⁶ Marã ĩrãra shy rẽnopi, “Sheja, Sheja”, tẽvã pijapoã she hai peeva? ⁴⁷ Haipo pee mbavapera ova ouva shy rendape, hẽndu shiñẽẽ, hareka japova haishua: ⁴⁸ Ova pẽnte kuimbai hoorã japo verã, joo rãnishu yvykua hareka kype japo mỹvãhẽshu peve ita, hãrã ñono hoo jypyrã ita ĩãrẽ. Haivi sapy ãĩ ou yy syry vasu pyrãntava hareka ñunũpa he oore, tẽvã katuã õmy hẽndaivi shara haikavite mbyvapyha ita ĩãrẽ. ⁴⁹ Hãrã hẽnduva tẽvã japombava she haiva ova kuimbai japo vekua hoorã yvy ĩãrẽĩ, yvykua joombashua; haivi tivishama ou yy syryvarã ñunũpahe oorã mbijapara hareka opa mambai.