¹ Pẽnte jyape Hesu ẽẽ yyvasu Genesaret hymbeype, vãhẽ jyverushu kuareta hetava opa jasoi, pota hẽndu reta Ñanderu Tumpa ĩñẽẽrã. ² Hesu hesha mõkue kanoa mba'ety ẽpya hareka kõõve ẽshia yy hymbeivi, pira nõhẽ iare vejymba shi reta yvype, johe verã jypysare. ³ Hesu jupi pẽnteva kanoape Simon ña ãpoapy, haivi jurureshu mbyry katu ñono verã yy hymbeivi. Haipe Hesu vapy kanoa perã, haivive õñepyrõ ñimiñẽẽshu kuaretare. ⁴ Opama ñimiñẽẽrã heishu Simon: Ekua typyve õpe, haipe pymombo pyndy pysare pynohẽ verã pira. ⁵ Simon heishu: Pyrỹmboi'ia, pyhare pukukuepe rãnga mba'apoha iheje, mbaimba nohẽãva; tẽvã nde rererã arahapo amombojy pysa. ⁶ Hãmã ityma pyrã, hetaite pira oapyrã, õñepyrõma soro shi reta jypysa. ⁷ Hãrã hẽno ñi'ĩrũre ẽvã ĩrũ kanoape ou mboryshu verãre. Hãrã jyverurã, mynyhẽ voka mõkue kanoa pira hetava, ajete ñapyvyĩ shi reta ñykanoare. ⁸ Simon, hesha vokavarã, ĩñesu Hesu hỹnonderã hei: Syrỹĩ shy hevi, shi Ija, she rãnga hai heko porãmba. ⁹ Shara Simon hareka ñi'ĩrũre myngyje pira heta nõhẽva rehe. ¹⁰ Jacobo hareka Juan Zebedeo tayre, Simon ñi'ĩrũre kyjeĩ jyve. Hesu heishu Simon: Avy kyje; ã'ẽ kuaretare nohẽ i verãpo ndekui. ¹¹ Haivi veru jyma kanoa yy hymbey perã. Opa heja haiperã Hesu haykue jyraha reta. ¹² Hesu ĩmẽ teri ẽ pẽnteva tẽntape, sapya vãhẽ ou pẽnte kuimbai kuru porãmbava, hãrã heshama Hesu perã, hỹnỹpỹa jatyka hỹnonde. Hova yvyre ñono peve jurure asyshurã hei: Sheja, ripota shy mynguerarã, shymynguerapo. ¹³ Haipema Hesu poko herã hei: Aipota ãrỹnguera. Rykuerama. Vokava opa heirã kuru porãmbava opa kañy shi. ¹⁴ Hãmã Hesu heishu: Avy mbavape mbeu verã vokava. Ekuaĩ ijeshakashu pai, hareka mẽẽ ijoheha kaviva ryheva Moise mbypara vekua, paire hesha verã rykueramava. ¹⁵ Hãrã haipe Hesu hỹrãkuave opa rupii. Haivi heta kuareta ñymbaty jasakahe verãre ĩñẽẽ, hareka ñymyngueraka verã mbairasy kueivi. ¹⁶ Hesu katy oho mbava ẽ mbaipirã, haipe jurure. ¹⁷ Pẽnte ara jyape Hesu pyrỹmboi ẽvãpe, vapy ñynõĩ haipe Fariseore hareka Moise mbypara vekua pỹrỹmboi iheare ouva opaiteva tẽnta Galilea, Judea hareka Jerusalenvi; hãrã Ñanderu Tumpa mbaikatu ẽẽ Hesure mynguera verã ñymbairasyva. ¹⁸ Haivi õhẽ ou kuimbaire veruva tupa ryheve pẽnte kuimbai japava, hãrã potatẽ mĩje jyre o ipe, ñono verãre Hesu hỹnonde. ¹⁹ Tẽvã vãhẽãshu reta mãĩvi rapo mĩje shara kuaretare hetaiterã. Hãrã jupĩ reta o ĩãrẽrã heky reta teha, haivĩma mbyvejy reta ñymbairasyva hupa ryheve haire mbytepe Hesu hỹnonde. ²⁰ Hesu heshama haire jyroja herã, hei ñymbairasy vape: Kuimbai, nymbai porãmba vekuare hejaha reima ndyhevi. ²¹ Hãrã Moise mbypara vekua pyrỹmboi'iheare hareka Fariseore pyapẽĩ hei jyre: “Mbavara jy ko kuimbai hei tamba verã rãĩmi hei? Mbaveã katu hejarei mbai porãmba vare, Ñanderu Tumpa ñõĩtepo.” ²² Tẽvã Hesu kua ẽ haire pyape hei õrã heishu reta: Mbaiva rehera kỹrã pypya pimbĩjeta pẽĩ? ²³ Mbaivara javaĩã jaishu ko kuimbai: “Nymbai porãmba vekua hejaha reima ndyhevi”, ti ja ẽĩra poshu: “Pũã, vata”? ²⁴ Aheshakapo pee ko kuimbai rãĩmi ouva yvy ĩãrẽ, ĩmẽre mbaikatu yvy ĩãrẽ, heja reii verã mbai porãmba. Haivi Hesu heishu kuimbai japava: Haipo nde, pũã, hupi ndurupa hãrã ekua ñyrẽtape. ²⁵ Haipe vãĩ kuimbai japava pũã hỹnonde reta, hupa hekyrã omombai vasu Ñanderu Tumpa ohojy hẽnta kyty. ²⁶ Opavare hesharã mbyry mãĩ reta, hãrã omombai vasu Ñanderu Tumpape, haivi kyje ryheve hei jyre: Mbai vasuveva jahesha ko arape. ²⁷ Kova mbai oparã Hesu õhẽjy, haivi hesha pẽnte kuimbai tẽnta pevarã kyrypoti okora õ, Levi he'iashua, vapy ẽ okorase õpe. Hãrã Hesu heishu: Ei shaykue. ²⁸ Levi pũãrã opava mãĩnũnga hejarã, oho Hesu haykue. ²⁹ Haivi Levi japo karu vasu hẽntape Hesu pevãrã, heta ẽjyve tẽnta pevãrã kyrypoti okorase iare, hareka ĩrũre vapy ñynoi hãndi mesape. ³⁰ Tẽvã Moise mbypara vekua pyrỹmboi'iheare hareka Fariseore ĩñẽẽ mombo jyrehe Hesu mboireare hãrã heishu reta: Mãrã'ĩrãra pee pykaru hareka piñy mbyu hãndi tẽnta pevarã kyrypoti okorase iare, hareka mbai porãmbape iare hãndi? ³¹ Hesu heishu reta: Mambai mba ia ikotevẽãhe, pyrypyhano iare, ñymbairasy ivãĩ. ³² She aiã aheno heko kavivape, heko porãmba ia retapẽĩ, ñymbeujy verãre. ³³ Hãmã kuaretare pyrãndushu Hesu: Mãrã'ĩrãra Juan Bautista mboireare hareka Fariseore py yĩ karuã hareka haire jurure, hãrã rỹmboi ryrea retany karu hareka ñymbyu ñõĩ hai reta? ³⁴ Hesu heishu reta: Katurapo pee pymyngaruã hẽno hakavare õmendava ẽ verãpe, tẽmẽrã ĩmẽ teri ñynoi hãndirã? ³⁵ Tẽvã vãhẽ pokui ara tẽmẽrã ẽ veama hãndi verãre, hãmerãpo voka arape karuã ñynoĩkui. ³⁶ Hesu hei jyshu reta kova ñymyhã'ãnga: Mba'ety chĩchĩva pẽnte mondeava py'ahuva pỹsẽvẽ mbojahe verã mondeava ndeshiva sorovare. Kỹrã japorã myporãã mondeava py'ahuva; ĩãrẽva mondeava py'ahuva porãã ẽẽjy ndeshi vare. ³⁷ Hãrã mba'ety ñonova vino py'ahuva vakapi tujapy kỹrã japorã, vino py'ahuva myndoropo vakapi, haivi jyvare reipo ijehe vino hareka jyve vakapi. ³⁸ Hãrã vino py'ahuva mbyhyrua ñõĩpo vakapi py'ahuvapy, hãrãpo mõkue ryheve kỹỹ poryha. ³⁹ Mba'ety mbava kỹrẽy houva vino ndeshi vekuaivi, pota ñõĩpo houkui py'ahuva, hei ẽrã: ” Ndeshiva kapyryve."